അജീഷിന്റെ കഥ പറഞ്ഞ പൊന്മാൻ, അനിമൽ ട്രയോളജിയിലെ എക്കോ; 2025ലെ മികച്ച ചിത്രങ്ങൾ ഇതാ...

Updated: Monday, December 29, 2025, 15:57 [IST]

ഈ വർഷം അവസാനിക്കാൻ കേവലം രണ്ട് ദിനങ്ങൾ മാത്രമാണ് ഇനി ശേഷിക്കുന്നത്. മലയാള സിനിമയെ സംബന്ധിച്ചിടത്തോളം ഏറ്റവും നല്ല വർഷങ്ങളിൽ ഒന്നാണിത്. മോളിവുഡിന്റെ മാർക്കറ്റ് 300 കോടി എന്ന മാന്ത്രിക സംഖ്യ തൊട്ട വർഷം. കൂടാതെ തുടരും, എമ്പുരാൻ പോലെയുള്ള വലിയ കളക്ഷൻ നേടിയ ചിത്രങ്ങൾക്കും ഈ വർഷം തിയ്യേറ്ററുകൾ സാക്ഷ്യം വഹിച്ചു. ഏറ്റവും ഒടുവിൽ തിയേറ്ററുകൾ ഇളക്കി മറിച്ച് നിവിൻ പോളിയുടെ സർവ്വം മായയും തകർത്തോടുകയാണ്.

എന്നാൽ ശരിക്കും പറഞ്ഞാൽ ബോക്‌സ് ഓഫീസ് കണക്കുകൾ കൊണ്ട് മാത്രമല്ല ഈ വർഷം തലയുയർത്തി നിൽക്കുന്നത്. കണ്ടന്റ് ഓറിയന്റഡ് ചിത്രങ്ങൾ ഒരുപിടി ആസ്വാദകരുടെ പ്രശംസ, അതിപ്പോൾ രാജ്യത്തിൻറെ ഏത് കോണിൽ നിന്നായാലും കിട്ടിയ ഒരു വർഷം കൂടിയായിരുന്നു ഇത്. അത്തരത്തിൽ പ്രേക്ഷകരുടെയും നിരൂപകരുടെയും അഭിപ്രായം ഏറ്റവും കൂടുതൽ സ്വന്തമാക്കിയ ചില ചിത്രങ്ങൾ ഏതൊക്കെയെന്ന് നോക്കാം.

പൊന്മാൻ: ജ്യോതിഷ് ശങ്കറുടെ അരങ്ങേറ്റ ചിത്രമായ പൊൻമാൻ സാങ്കേതികമായി മറ്റൊരു തലത്തിൽ നിൽക്കുന്നതും മികച്ച പ്രകടനങ്ങളാൽ ശ്രദ്ധേയവുമാണ്. കൊല്ലം തീരദേശത്ത്, ഇന്നും വ്യാപകമായ സ്ത്രീധന സമ്പ്രദായത്തെയും അതിലെ അപകടകരമായ കണ്ണികളെയും തൊഴിലാളി ജീവിതങ്ങളെയും ചിത്രം അവതരിപ്പിക്കുന്നു. ചിത്രത്തിലെ ബേസിൽ ജോസഫിന്റെ പ്രകടനം ഈ വർഷത്തെ ഏറ്റവും മികച്ചവയിൽ ഒന്നാണ്.

തടവ്: സ്വതന്ത്രരായിരിക്കുമ്പോഴും യഥാർത്ഥ ജീവിത സ്വാതന്ത്ര്യം ലഭിക്കുന്നുണ്ടോ എന്ന ചോദ്യം തടവ് ഉയർത്തുന്നു. പുറംലോകത്തെ ജീവിതം തനിക്ക് ലഭിച്ച നീതിരഹിത ശിക്ഷയായി കാണുന്ന ഒരു സ്ത്രീയുടെ കഥയാണിത്. പക്ഷപാതമില്ലാതെ കേന്ദ്രകഥാപാത്രത്തെ അവതരിപ്പിക്കുന്ന ഈ ചിത്രം, സാധാരണ കാര്യങ്ങളുടെ സൗന്ദര്യവും സ്വാധീനവും മനോഹരമായി ചിത്രീകരിക്കുന്നു. ബീന ആർ ചന്ദ്രന് മികച്ച നടിക്കും, ഫസിൽ റസാഖിന് മികച്ച നവാഗത സംവിധായകനും സംസ്ഥാന അവാർഡ് ലഭിച്ച ചിത്രമാണ് ഇത്.

പത്ത്: ജിതിൻ ഐസക് തോമസിന്റെ പത്ത് മനുഷ്യന്റെ അടിസ്ഥാന രാഷ്ട്രീയവും ജീവിതത്തിന്റെ ആവശ്യകതകളും ചർച്ച ചെയ്യുന്ന വേറിട്ട പ്രമേയം അടങ്ങിയ ഒരു ചിത്രമാണ്. ഇത് സംവിധായകന്റെ മുൻ ചിത്രങ്ങളായ 'അറ്റൻഷൻ പ്ലീസ്' (2021), 'രേഖ' (2023) എന്നിവയിൽ നിന്ന് വേറിട്ടുനിൽക്കുന്നു. ഒരു ഡോക്യുമെന്ററി ശൈലിയിൽ ഒരു പാട്ടിന്റെ ഉത്ഭവം തേടുന്ന ഈ ചലച്ചിത്രത്തിൽ മോക്യുമെന്ററി ഘടകങ്ങളും ഉൾപ്പെട്ടിട്ടുണ്ട്.

ഫെമിനിച്ചി ഫാത്തിമ: ഫാസിൽ മുഹമ്മദിന്റെ അരങ്ങേറ്റ ചിത്രമായ ഫെമിനിച്ചി ഫാത്തിമ ജിയോ ബേബിയുടെ 'ദി ഗ്രേറ്റ് ഇന്ത്യൻ കിച്ചനുമായി' (2021) സാമ്യം പുലർത്തുന്നു. സ്ത്രീകൾ സ്വയം ശബ്‌ദമുയർത്തുമ്പോൾ, പുരുഷാധിപത്യ വ്യവസ്ഥകൾ എങ്ങനെ തകരുന്നു എന്ന് ഇരു ചിത്രങ്ങളും കാണിക്കുന്നു. ഇതൊരു ഫീച്ചർ ഫിലിം രൂപത്തിലുള്ള സൃഷ്‌ടിയാണ്. മതത്തിന്റെയും കുടുംബത്തിന്റെയും വ്യവസ്ഥാപിത ചട്ടങ്ങൾ സ്ത്രീകളുടെ വിധേയത്വത്തിൽ എങ്ങനെ നിലനിൽക്കുന്നുവെന്നും, വിധേയത്വമാണ് ഏക ജീവിതമെന്ന് പഠിപ്പിച്ച സ്ത്രീയുടെ യാഥാർത്ഥ്യങ്ങളും ഇത് വരച്ചുകാട്ടുന്നു.

എക്കോ: ദിൻജിത്ത് അയ്യത്താനും ബാഹുൽ രമേശും ചേർന്ന് ഒരുക്കിയ എക്കോ, 'സംരക്ഷണം' എന്ന ആശയത്തെ ആഴത്തിലും ആകർഷകമായും വിശകലനം ചെയ്യുകയും രാഷ്ട്രീയവൽക്കരിക്കുകയും സങ്കീർണ്ണമാക്കുകയും ചെയ്യുന്നു. മികച്ച രചനയും ആശയരൂപീകരണവും കൊണ്ട് ചിത്രം വേറിട്ടുനിൽക്കുന്നു. സന്ദീപ് പ്രദീപ് ഈ തലമുറയിലെ ഏറ്റവും കഴിവുള്ള മലയാള യുവനടൻമാരിൽ ഒരാളാണെന്ന് ഈ ചിത്രം അടിവരയിടുന്നു. അനിമൽ ട്രയോളജി എന്ന് വിശേഷണമുള്ള ഈ സീരീസിലെ മുൻ ചിത്രങ്ങൾ കിഷ്‌കിന്ധാകാണ്ഡവും, കേരള ക്രൈം ഫയൽസ് രണ്ടുമാണ്.