അഹിംസയുമായി യേശുദാസ്
ദില്ലി: ഏപ്രില് ആറ് വെള്ളിയാഴ്ച ദില്ലിയിലെ സംഗീതപ്രേമികളെ സംബന്ധിച്ചിടത്തോളം അഹിംസാ ദിനമാണ്. ഈ ദിനം നയിക്കുന്നത് ഗാനഗന്ധര്വന് യേശുദാസും.
ഈയിടെ അഹിംസ എന്ന പേരിലിറങ്ങിയ യേശുദാസിന്റെ ഇംഗ്ലീഷ് ആല്ബത്തിലെ ഗാനങ്ങള് യേശുദാസ് നേരിട്ടവതരിപ്പിക്കുകയാണ് . അഹിംസാദിനം എന്നു പേരിട്ടിരിക്കുന്ന ഈ സംഗീത പരിപാടി ദില്ലിയിലെ ഹോട്ടല് അശോക് കണ്വെന്ഷന് ഹാളിലാണ് നടക്കുക. അമേരിക്കയിലെ സംഗീതജ്ഞന് റിക്കാര്ഡോ ബാരന്റെസ് ആണ് അഹിംസാ എന്ന സംഗീത ആല്ബത്തിലെ ഗാനങ്ങള് ചിട്ടപ്പെടുത്തിയത്.
ഈ ആല്ബത്തിലെ പ്രധാന ഗാനം സംഗീതം സമാധാനത്തിന് എന്ന സന്ദേശപ്രചരണത്തിന്റെ ഭാഗമായി യുനെസ്കോ പാരീസില് സംഘടിപ്പിച്ച പരിപാടിയില് യേശുദാസ് അവതരണഗാനമായി അവതരിപ്പിച്ചിരുന്നു. ടാഗോര് , മഹാത്മാഗാന്ധി, ജര്മ്മന് പ്രവാചകന് തോമസ് കെംപിസ് എന്നിവരുടെ കവിതകളില് നിന്നാണ് അഹിംസയിലെ ഗാനങ്ങള് ചിട്ടപ്പെടുത്തിയത്. ഇതിന് പുറമെ അമേരിക്കന് കവിതകളും ഉപയോഗിച്ചിട്ടുണ്ട്. ലോകപ്രശസ്ത സംഗീതജ്ഞരായ യാനി, ജോര്ജ്ജ് സന്താന എന്നിവരും അഹിംസയിലെ ഗാനങ്ങള് ചിട്ടപ്പെടുത്താന് സഹായിച്ചിട്ടുണ്ട്.
ചെന്നൈയിലെ സ്കന്ദ സ്കൂള് ഓഫ് പെര്ഫോമിംഗ് ആര്ട്സിലെ നര്ത്തകര് യേശുദാസിന്റെ ഗാനങ്ങള്ക്കൊത്ത് വേദിയില് ചുവടുവയ്ക്കും. ഐടിഡിസിയുടെ സാംസ്കാരിക വിഭാഗവും ഹോട്ടല് അശോക തിയറ്ററും ചേര്ന്നാണ് ഇത് സംഘടിപ്പിക്കുന്നത്. കഴിഞ്ഞ വര്ഷത്തെ സമാധാനത്തിനുള്ള യുനെസ്കോയുടെ സംഗീത പുരസ്കാരം യേശുദാസിനായിരുന്നു.