ഒ. വി. വിജയന് എഴുത്തച്ഛന്‍ പുരസ്കാരം

തിരുവനന്തപുരം: സംസ്ഥാന സര്‍ക്കാരിന്റെ ഈ വര്‍ഷത്തെ എഴുത്തച്ഛന്‍ പുരസ്കാരത്തിന് ഒ.വി. വിജയന്‍ അര്‍ഹനായി. വിജയന്റെ കോട്ടയത്തുള്ള വീട്ടില്‍ ചെന്ന് സാസ്കാരികമന്ത്രി ജി. കാര്‍ത്തികേയന്‍ ഇക്കാര്യം അറിയിക്കുകയായിരുന്നു.

ഒരു ലക്ഷം രൂപയും ശില്പവും അടങ്ങിയതാണ് അവാര്‍ഡ്. ഡോ. എം. ലീലാവതി ചെയര്‍മാനായുള്ള അഞ്ചംഗ അവാര്‍ഡ് സമിതിയാണ് വിജയനെ പുരസ്കാരത്തിനായി തിരഞ്ഞെടുത്തത്. എന്‍. പി. മുഹമ്മദ്, എം. തോമസ് മാത്യു, പെരുമ്പടവം ശ്രീധരന്‍, സാസ്കാരിക സെക്രട്ടറി ടി. ബാലകൃഷ്ണന്‍ എന്നിവരാണ് സമിതിയിലെ മറ്റ് അംഗങ്ങള്‍.

തിരുവനന്തപുരത്ത് ദര്‍ബാര്‍ ഹാളില്‍ നടക്കുന്ന ചടങ്ങില്‍ മുഖ്യമന്ത്രി എ. കെ. ആന്റണി വിജയന് അവാര്‍ഡ് സമ്മാനിക്കും. അവാര്‍ഡ് ദാന തീയതി പിന്നീട് അറിയിക്കുമെന്ന് കാര്‍ത്തികേയന്‍ പറഞ്ഞു.

ഖസാക്കിന്റെ ഇതിഹാസം, ധര്‍മപുരാണം, ഗുരുസാഗരം, മധുരംഗായതി, പ്രവാചകന്റെ വഴി, തലമുറകള്‍ എന്നിവയാണ് പ്രധാന രചനകള്‍.

കഥയിലും നോവലിലും ആഖ്യാനശൈലി പുതുക്കിപ്പണിത വിജയന്‍ ഇപ്പോള്‍ പുതിയ നോവലിന്റെ പണിപ്പുരയിലാണ്.

ഗുരുസാഗരത്തിന് 1990 ല്‍ കേരള സാഹിത്യഅക്കാദമി അവാര്‍ഡും 1991ല്‍ വയലാര്‍ അവാര്‍ഡും ലഭിച്ചു. 1997-ലെ മുട്ടത്തുവര്‍ക്കി പുരസ്കാരം ഖസാക്കിന്റെ ഇതിഹാസത്തിനായിരുന്നു. 1999-ല്‍ എം.പി. പോള്‍ അവാര്‍ഡ് വിജയന്റെ തലമുറകള്‍ക്കായിരുന്നു.