വിജയന് വേണ്ടി കമലയുടെ പ്രാര്‍ത്ഥന

കൊച്ചി: മലയാളകഥാലോകത്തിന്റെ മുഖം മാറ്റിയെഴുതിയ രണ്ട് പ്രതിഭാശാലികള്‍ വര്‍ഷങ്ങള്‍ക്ക് ശേഷം കണ്ടുമുട്ടിയപ്പോള്‍ വാക്കുകളേക്കാള്‍ നിറഞ്ഞുനിന്നത് മൗനം. സമസ്ത കേരള സാഹിത്യപരിഷത്തിന്റെ മലയാള വാരാചരണം ഉദ്ഘാടനം ചെയ്യാന്‍ കൊച്ചിയിലെത്തിയതായിരുന്നു ഒ.വി. വിജയന്‍.

കോട്ടയത്തേക്ക് മടങ്ങും വഴി, താന്‍ അനുജത്തിയായി കരുതിപ്പോന്ന കമലാ സുരയ്യയെ കാണണമെന്ന് മോഹം. വിജയന്റെ കൂടെ സഹോദരി ഉഷയും ഭാര്യ തെരേസയും ഉണ്ടായിരുന്നു. കമലയുടെ എറണാകുളത്തെ കടവന്ത്രയിലുള്ള റോയല്‍ മാന്‍ഷനിലെത്തിയപ്പോള്‍ പക്ഷെ ഇരുകൂട്ടര്‍ക്കും സംസാരിക്കാന്‍ ഏറെയൊന്നുമുണ്ടായില്ല.

രോഗത്തിന്റെ കാഠിന്യം മൂലം വിജയന്‍ അധികനേരവും സോഫയില്‍ മൗനിയായി ഇരുന്നു. വിജയന്റെ കാലുകള്‍ നീരുവന്ന് വീര്‍ത്തിരുന്നു. സാഹിത്യപരിഷത്തിന്റെ മലയാളവാരാചരണ ഉദ്ഘാടനം മൂന്നാം നിലയിലുള്ള ഒരു ഹാളിലായിരുന്നു. അവിടേക്ക് പടികള്‍ കയറിച്ചെന്നതുകൊണ്ടാണ് വിജയന്റെ കാലുകളില്‍ നീരുവന്നത്. കമലയ്ക്ക് തന്റെ ദേഷ്യം അടക്കാന്‍ കഴിയുന്നുണ്ടായിരുന്നില്ല: വയ്യാത്ത വിജയനെ മൂന്നുനില നടത്തിച്ചവരെ തല്ലണം- സ്നേഹമുള്ളവര്‍ വിളിക്കുമ്പോള്‍ ചെല്ലാതിരിക്കാനാകുമോ?- കമലയുടെ രോഷം അടക്കാന്‍ വേണ്ടി ഉഷ പറഞ്ഞു.

സോഫയിലിരിക്കുകയായിരുന്ന വിജയന്റെ ശോഷിച്ച കരങ്ങള്‍ കമല തലോടി. അപ്പോഴാണ് ഉഷ കമലയോട് വിജയേട്ടന് വേണ്ടി പ്രാര്‍ത്ഥിക്കാന്‍ നിര്‍ദേശിച്ചത്. ഉടനെ കമല ഇസ്ലാമിക ശൈലിയില്‍ വിജയന് വേണ്ടി യാസിന്‍ ചൊല്ലി പ്രാര്‍ത്ഥിച്ചു. പിന്നെ എല്ലാവരും ഒന്നിച്ചിരുന്ന് ഊണുകഴിച്ചു.