അരുന്ധതീറോയിയ്ക്ക് ഫ്രഞ്ച് പുരസ്കാരം

പാരീസ് : ഇക്കൊല്ലത്തെ ഫ്രഞ്ച് സാഹിത്യ പുരസ്കാരം അരുന്ധതീറോയിയ്ക്ക്. ഫ്രാന്‍സിലെ യൂണിവേഴ്സല്‍ അക്കാദമി ഏര്‍പ്പെടുത്തിയ ബഹുമതിയാണ് അരുന്ധതിയെത്തേടിയെത്തിയത്.

വര്ണ്ണവിവേചനത്തിനും അസഹിഷ്ണുതയ്ക്കും സ്ത്രീ വിവേചനത്തിനുമെതിരെ പ്രവര്‍ത്തിക്കുന്ന എഴുത്തുകാര്‍ക്കാണ് അവാര്‍ഡ് ഏര്‍പ്പെടുത്തിയിരിക്കുന്നത്. ഏകദേശം30 ലക്ഷം രൂപ (68,000 ഡോളര്‍) ആണ് സമ്മാനത്തുക.

സാഹിത്യത്തിലെ സമഗ്ര സംഭാവനകള്‍ക്കൊപ്പം മനുഷ്യാവകാശങ്ങള്‍ക്കു വേണ്ടി നടത്തിയ പോരാട്ടവുമാണ് അരുന്ധതിയെ അവാര്‍ഡിനര്‍ഹയാക്കിയത്.മുന്‍ചെക്ക് പ്രസിഡന്റും നാടകകൃത്തുമായ വാക്ളവ് ഹാവലിനു ശേഷം ഈ പുരസ്കാരം ലഭിക്കുന്ന രണ്ടാമത്തെ എഴുത്തുകാരി അരുന്ധതിയാണ്.

അരുന്ധതിയുടെ ഗോഡ് ഓഫ് സ്മാള്‍ തിംഗ്സ് എന്ന നോവലിന് 1997 ലെ ബുക്കര്‍ പ്രൈസ് ലഭിച്ചിരുന്നു. നവംബര്‍ 12 തിങ്കളാഴ്ച പാരീസിലെ സോര്‍ബോണ്‍ യൂണിവേഴ്സിറ്റിയില്‍ നടക്കുന്ന ചടങ്ങില്‍ ഫ്രഞ്ച് വിദ്യാഭ്യാസമന്ത്രി ജാക്ക് ലാംഗ് അവാര്‍ഡ് സമ്മാനിക്കും.