തകഴിച്ചേട്ടന്‍ എല്ലാം കാണുന്നുണ്ട്

ആലപ്പുഴ: മക്കളേ, തകഴിച്ചേട്ടന്‍ ഇതെല്ലാം കാണുന്നുണ്ട്- കാത്തച്ചേച്ചിയാണ് പറയുന്നത്. സര്‍ക്കാരിന്റെ സാംസ്കാരിക വകുപ്പിനെതിരെയാണ് കാത്തച്ചേച്ചിയുടെ ഈ പയ്യാരം.

തകഴിയുടെ ജന്മഗൃഹമായ ശങ്കരമംഗലം സംരക്ഷിക്കാനായി ചോദിച്ചപ്പോള്‍ കേരളത്തിലെ സാംസ്കാരികവകുപ്പ് വലിയവായില്‍ വച്ചുനീട്ടിയത് വാഗ്ദാനങ്ങളുടെ ഒരു നെടുങ്കന്‍ ലിസ്റാണ്. പക്ഷെ എല്ലാം വെള്ളത്തില്‍ വരച്ച വരപോലെയായി- വാര്‍ത്താലേഖകരോട് സംസാരിക്കുമ്പോള്‍ കാത്തച്ചേച്ചിയുടെ തൊണ്ടയല്പം ഇടറിപ്പോയി.

ഇപ്പോള്‍ കേരള സര്‍ക്കാരിന്റെ പുരാവസ്തുവകുപ്പിന്റെ മ്യൂസിയമാണ് ശങ്കരമംഗലം തറവാട്. കേരളസാഹിത്യഅക്കാദമി ശങ്കരമംഗലത്ത് സംഘടിപ്പിച്ച അനുസ്മരണച്ചടങ്ങിനിടെയായിരുന്നു വാര്‍ത്താലേഖകര്‍ കാത്തച്ചേച്ചിയുമായി സംസാരിച്ചത്. ചടങ്ങ് സംഘടിപ്പിച്ച സാഹിത്യഅക്കാദമിയെങ്കിലും തകഴിസ്മാരകത്തിന് സമ്മര്‍ദ്ദം ചെലുത്തണം-കാത്തച്ചേച്ചി തന്റെ മനസ്സിലെ ആഗ്രഹം തുറന്നുപറഞ്ഞു.

സാഹിത്യകാരന്‍മാര്‍ കൂടിച്ചേര്‍ന്ന ഈ മുഹൂര്‍ത്തത്തില്‍ അദ്ദേഹമുണ്ടായിരുന്നെങ്കില്‍ കാത്തേ എന്നു വിളിച്ച് തൊടിയിലെല്ലാം ഓടി നടന്നേനെ. ഇപ്പോള്‍ റോഡില്‍ പോകുന്ന ചിലര്‍ കളിയാക്കാനോ എന്തിനോ കാത്തേ എന്ന് നീട്ടിവിളിയ്ക്കുന്ന സംഭവവും കാത്തച്ചേച്ചി വാര്‍ത്താലേഖകരോട് വിശദീകരിച്ചു.

ആളുകളുടെ ഈ വിളികേള്‍ക്കുമ്പോള്‍ ഉറക്കത്തിലാണെങ്കിലും ഞാനപ്പോള്‍ ചാടിയെഴുന്നേല്ക്കും. അദ്ദേഹം വന്ന ്വിളിക്കുകയാണെന്ന് തോന്നിപ്പോകും. ടിവിയില്‍ തകഴിയെക്കുറിച്ചുള്ള പരിപാടി വന്നതില്‍പ്പിന്നെയാണ് ആളുകള്‍ ഇങ്ങിനെ വിളിക്കുന്നത്.- കാത്തച്ചേച്ചി പറഞ്ഞു.

സാഹിത്യസമ്മേളനത്തില്‍ തകഴിപഞ്ചായത്ത് പ്രസിഡന്റ് ഡി. പ്രഭാകരന്‍ പിള്ള അക്കാദമിയോട് തട്ടിക്കയറി. കാരണം അക്കാദമി ബ്രോഷറില്‍ തകഴിയുടെ ചരമദിനം തെറ്റായാണ് ചേര്‍ത്തിരുന്നത്. ഏപ്രില്‍ 10 എന്നതിന് പകരം ഏപ്രില്‍ നാല് എന്നാണ് ബ്രോഷറില്‍ അച്ചടിച്ചിരിക്കുന്നത്.