ദുബായില്‍ കലാമണ്ഡലം പഠനകേന്ദ്രം

ചെറുതുരുത്തി: കേരള കലാമണ്ഡലം ദുബായില്‍ പഠനകേന്ദ്രം തുടങ്ങും. ദുബായ് വിഷന്‍ എന്ന സാംസ്കാരിക സംഘടനയുമായി സഹകരിച്ചാണ് കലാമണ്ഡലം പഠനകേന്ദ്രം തുടങ്ങുന്നത്.

നൃത്തം, ശാസ്ത്രീയസംഗീതം, കഥകളിസംഗീതം എന്നീ വിഷയങ്ങളില്‍ വരുന്ന ഓണക്കാലത്തോടെ ഇവിടെ ക്ലാസുകള്‍ ആരംഭിക്കും. ദുബായ് കലാകേന്ദ്രത്തിലെ അടിസ്ഥാനസൗകര്യങ്ങള്‍ തൃപ്തികരമാണോയെന്ന് ദുബായ് കേന്ദ്രം സാംസ്കാരികവകുപ്പ് സെക്രട്ടറി ടി. ബാലകൃഷ്ണനും കലാമണ്ഡലം സെക്രട്ടറി കല്പറ്റ ബാലകൃഷ്ണനും പരിശോധിച്ചു.

ദുബായിലെ പഠനകേന്ദ്രത്തിലെ സ്ഥലസൗകര്യങ്ങള്‍ തൃപ്തികരമാണെന്ന് ദുബായില്‍ നിന്നും മടങ്ങിയെത്തിയ കലാമണ്ഡലം സെക്രട്ടറി കല്പറ്റ ബാലകൃഷ്ണന്‍ അറിയിച്ചു. അമേരിക്കയിലും കുവൈറ്റിലും കലാമണ്ഡലത്തിന്റെ പഠനകേന്ദ്രങ്ങള്‍ തുടങ്ങാന്‍ ചില സംഘടനകള്‍ സന്നദ്ധത പ്രകടിപ്പിച്ചിട്ടുണ്ട്. ഇവിടങ്ങളിലെ സ്ഥലസൗകര്യങ്ങള്‍ പരിശോധിച്ചശേഷം ഇക്കാര്യത്തില്‍ തീരുമാനിക്കും.