കലാമണ്ഡലം സ്പോണ്‍സര്‍മാരെ തേടുന്നു

ചെറുതുരുത്തി: കലാമണ്ഡലത്തിലെ കഥകളിശില്പങ്ങള്‍ക്ക് ആടയാഭരണങ്ങള്‍ നിര്‍മ്മിക്കാന്‍ സ്പോണ്‍സര്‍മാരുടെ സഹായം തേടുന്നു. കലാമണ്ഡലം ആര്‍ട്ട് ഗ്യാലറിയില്‍ പ്രദര്‍ശിപ്പിക്കുന്നതിന് ഫൈബര്‍ ഗ്ലാസില്‍ ആര്‍ടിസ്റ് നമ്പൂതിരി ഉണ്ടാക്കിയ ശില്പങ്ങള്‍ക്ക് ആടയാഭരണങ്ങള്‍ തീര്‍ക്കാനാണ് കലാമണ്ഡലം അധികൃതര്‍ സ്പോണ്‍സര്‍മാരെ തേടുന്നത്.

ആര്‍ട്ട് ഗ്യാലറിയിലെ പ്രദര്‍ശനത്തിന് ശേഷം ഈ ശില്പങ്ങളിലെ ആടയാഭരണങ്ങള്‍ അഴിച്ചുമാറ്റി കോപ്പറയില്‍ നഗ്നമാക്കിയിട്ടിരിക്കുകയായിരുന്നു. ഇതിനെതിരെ വിമര്‍ശനമുയര്‍ന്നപ്പോഴാണ് വീണ്ടും ആടയാഭരണങ്ങളും കിരീടവും അണിയിച്ച് ശില്പങ്ങളെ സ്ഥിരമായി പ്രദര്‍ശനത്തിനുവയ്ക്കാന്‍ കലാമണ്ഡലം അധികൃതര്‍ തീരുമാനിച്ചത്. എന്നാല്‍ ആടയാഭരണങ്ങളും കിരീടവും നിര്‍മ്മിക്കാന്‍ കലാമണ്ഡലത്തിന്റെ കയ്യില്‍ പണമില്ല. അതുകൊണ്ടാണ് സ്പോണ്‍സര്‍മാരെ അന്വേഷിക്കുന്നത്.

ശില്പങ്ങളുണ്ടാക്കാന്‍ മൊത്തം അഞ്ചുലക്ഷം രൂപയാണ് ആര്‍ടിസ്റ് നമ്പൂതിരിക്കു നല്കിയതെന്ന് കലാമണ്ഡലം സെക്രട്ടറി ഡോ. കല്പറ്റ ബാലകൃഷ്ണന്‍ പറഞ്ഞു. ആടയാഭരണങ്ങള്‍ക്കും കിരീടത്തിനും ആറ് ലക്ഷം രൂപ ചെലവ് വരും. ഈ തുക സ്പോണ്‍സര്‍മാര്‍ വഴി സമാഹരിക്കും.