എസ്പിസിഎസ്സിനെ തകര്‍ത്തത് വിജയന്‍: പത്മനാഭന്‍

കണ്ണൂര്‍: സാഹിത്യ പ്രവര്‍ത്തക സഹകരണസംഘത്തിന്റെ(എസ്പിസിഎസ്) ഇന്നത്തെ അധ:പതനത്തിന് കാരണം എം.എന്‍. വിജയനാണെന്ന് ടി. പത്മനാഭന്‍. എന്‍ബിഎസ്സിന്റെ ഓണക്കാല പുസ്തകോത്സവം ഉദ്ഘാടനം ചെയ്യുകയായിരുന്നു പത്മനാഭന്‍.

പിണറായി വിജയനോ പൂച്ചാലി ഗോപാലനോ എല്‍ഡിഎഫോ അല്ല. പുരോഗമന സാഹിത്യസംഘവും അതിന്റെ ആചാര്യനായ എം.എന്‍. വിജയനുമാണ്. മറ്റൊരു കാരണക്കാരന്‍ പ്രൊഫ. രമേശ് ചന്ദ്രനാണ്.

സംഘത്തിന്റെ പ്രസിഡന്റ് പൂച്ചാലി ഗോപാലന്റെ കാലത്തുള്ള എസ്പിസിഎസ്സിന്റെ പുസ്തകങ്ങള്‍ ഞാന്‍ നോക്കി. പലതും ശിവകാശിയില്‍ പടക്കം പൊതിയാന്‍ മാത്രം ഉപയോഗിക്കാന്‍ പറ്റുന്ന കടലാസ്സുകളായിരുന്നു. ഇതിലധികവും പുരോഗമന കലാസാഹിത്യ സംഘക്കാരുടെ പുസ്തകമാണ്. ഇതിങ്ങനെ വരാന്‍ കാരണം എം.എന്‍. വിജയനും രമേശ് ചന്ദ്രനുമാണ്. - പത്മനാഭന്‍ പറഞ്ഞു.

എം.എന്‍. വിജയനോട് എനിക്ക് ഇഷ്ടക്കേടില്ല. എഴുതുന്നത് ഗഹനമായ കാര്യങ്ങളാണ്. പക്ഷെ എനിക്കൊന്നും മനസ്സിലാകാറില്ല. - ടി. പത്മനാഭന്‍ പറഞ്ഞു.

കഥാകൃത്ത് ടി.എന്‍. പ്രകാശ് അധ്യക്ഷനായിരുന്നു. പ്രൊഫ. മുഹമ്മദ് അഹമ്മദ്, കെ. പ്യാര്‍, എ.പി. ജയശീലന്‍, ടി.പി. ഭാസ്കരപ്പൊതുവാള്‍ എന്നിവര്‍ സംസാരിച്ചു.