കലാമണ്ഡലത്തിന് ദുബായ് ശാഖ
തിരുവനന്തപുരം : നടനകലയുടെ ആസ്ഥാനമായ കേരള കലാമണ്ഡലത്തിന് ദുബായ് ശാഖ വരുന്നു.
സാംസ്ക്കാരിക മന്ത്രി ജി. കാര്ത്തികേയന് അറിയിച്ചതാണ് ഈ വിവരം. ചെറുതുരുത്തിയിലെ ആസ്ഥാനത്തിന് പുറമെ സ്ഥാപിക്കുന്ന ആദ്യ കലാമണ്ഡലം ശാഖയാവും ദുബായിലേയത്. കേരളത്തില് നിന്നും ദുബായ് സന്ദര്ശിച്ച സാംസ്ക്കാരിക വകുപ്പുദ്യോഗസ്ഥര് ബന്ധപ്പെട്ടവരുമായി ഇതുസംബന്ധിച്ച ചര്ച്ച നടത്തിയെന്ന് മന്ത്രി അറിയിച്ചു.
കലാമണ്ഡലം സംഗീത നൃത്ത കേന്ദ്രം, ദുബായ് എന്നാണ് ശാഖയുടെ പേര്. കെട്ടിടമടക്കം ശാഖ തുടങ്ങുന്നതിനുളള എല്ലാ നടപടികളും പൂര്ത്തിയായി. ഗംഭീരമായ ചടങ്ങില് സ്ഥാപനത്തിന്റെ ഉദ്ഘാടനം നടത്തുമെന്ന് സാംസ്ക്കാരിക മന്ത്രി അറിയിച്ചു.
സ്ഥാപനത്തിന്റെ നടത്തിപ്പു ചെലവുകളെല്ലാം ദുബായ് സെന്റര് തന്നെ വഹിക്കും. അധ്യാപകരെ ചെറുതുരുത്തിയില് നിന്നും ഊഴമനുസരിച്ച് കൊണ്ടുപോകും. ഇത്തരമൊരു സ്ഥാപനത്തിന് മധ്യപൂര്വേഷ്യയില് നിന്നും ഏറെക്കാലമായി ആവശ്യമുയരുകയാണെന്ന് കാര്ത്തികേയന് പറഞ്ഞു.
കഥകളി, മോഹിനിയാട്ടം, തുളളല്, പഞ്ചവാദ്യം മുതലായവയുടെ പരിശീലനത്തിനായി മഹാകവി വളളത്തോള് സ്ഥാപിച്ചതാണ് കേരള കലാമണ്ഡലം. ഇപ്പോള് കഥകളി, കൂടിയാട്ടം, മോഹിനിയാട്ടം, വോക്കല് സംഗീതം, വാദ്യോപകരണങ്ങള് എന്നിവയില് പരിശീലനം നല്കുന്നുണ്ട്.