പി.പരമേശ്വരനെതിരെ എഴുത്തുകാരികള്‍

തിരുവനന്തപുരം: കമലാ സുരയ്യ എഴുത്തഛന്‍ പുരസ്കാരത്തിന് അര്‍ഹയല്ലെന്ന ഭാരതീയ വിചാര കേന്ദ്രം ഡയറക്ടര്‍ പി. പരമേശ്വരന്റെ പ്രസ്താവനയില്‍ പ്രതിഷേധിച്ച് എഴുത്തുകാരികള്‍ മുന്നോട്ടുവന്നു.

കമലാ സുരയ്യയുടെ കൃതികളെ സംബന്ധിച്ച് പി. പരമേശ്വരന്‍ നടത്തിയ പരാമര്‍ശങ്ങള്‍ അപക്വവും നിക്ഷിപ്ത താത്പര്യം നിറഞ്ഞതുമാണെന്ന് 11 എഴുത്തുകാരികള്‍ ഒപ്പുവെച്ച പ്രസ്താവനയില്‍ കുറ്റപ്പെടുത്തി.

അഷിത, ചന്ദ്രമതി, സി. എസ്. ചന്ദ്രിക, ലളിതാ ലെനിന്‍, റോസ് മേരി, സാറാ തോമസ്, അനിതാതമ്പി, വിമലാ മേനോന്‍, ആര്‍. പാര്‍വതീദേവി, മിനി സുകുമാര്‍, ഗീതാ നസീര്‍ എന്നിവരാണ് പ്രസ്താവന പുറപ്പെടുവിച്ചത്.

എഴുത്തഛന്റെ പേരിലുള്ള പുരസ്കാരം ഏറ്റവും അര്‍ഹിക്കുന്ന എഴുത്തുകാരിയാണ് കമലാ സുരയ്യയെന്ന് അവര്‍ പ്രസ്താവനയില്‍ ചൂണ്ടിക്കാട്ടി. സ്ത്രീജീവിതത്തിന്റെ സങ്കീര്‍ണതലങ്ങള്‍ക്കും അനുഭവങ്ങള്‍ക്കും സാഹിത്യാവിഷ്കാരം നല്‍കി സ്ത്രീസമൂഹത്തെ മുന്നോട്ടുകൊണ്ടു പോവുന്നതില്‍ കമലാ സുരയ്യയ്ക്ക് ആചാര്യസ്ഥാനമാണുള്ളതെന്ന് പ്രസ്താവനയില്‍ പറയുന്നു.