ഇന്റര്‍നെറ്റില്‍ ഒരു ചിത്രപ്രദര്‍ശനം

സപ്ന അനു ജോര്‍ജ്ജ്

തിരുവനന്തപുരം: വാടകക്കെടുത്ത ആര്‍ട്ട് ഗ്യാലറിയോ സമയപരിധിയുടെ പരിമിതികളോ ഇല്ലാതെ ഒരു ചിത്രപ്രദര്‍ശനം. ഡയറക്ടറിആര്‍ടിസ്റ്. കോം (http://www.directoryartist.com) എന്ന വെബ്സൈറ്റിലെ ഓണ്‍ലൈന്‍ ചിത്രപ്രദര്‍ശനത്തിലൂടെ സുഭാഷ് എന്ന ചിത്രകാരന്‍ ചിത്രകാരന്മാരുടെ കലാസൃഷ്ടികള്‍ പ്രദര്‍ശിപ്പിക്കുന്നതിന് പുതിയൊരു മാതൃക കണ്ടെത്തിയിരിക്കുന്നു.

വിവിധ ചിത്രകാരന്മാരുടെ ചിത്രങ്ങള്‍ ഈ വെബ്സൈറ്റില്‍ പ്രദര്‍ശിപ്പിക്കുന്നു. ഇന്റര്‍നെറ്റിന്റെ സാധ്യതകളുപയോഗിച്ച് സാധാരണരീതിയിലുള്ള ചിത്രപ്രദര്‍ശനങ്ങള്‍ക്ക് സങ്കല്പിക്കാനാവാത്ത കാഴ്ചക്കാരെയാണ് ഈ ചിത്രങ്ങള്‍ക്ക് കിട്ടുന്നത്.

ഡയറക്ടറി ആര്‍ടിസ്റ്.കോമില്‍ ഇപ്പോള്‍ ഒരു ചിത്രപ്രദര്‍ശനം നടന്നുവരുന്നുണ്ട്. ഈ വെബ്സൈറ്റിലെ 12-ാമത്തെ ചിത്രപ്രദര്‍ശനമാണിത്. വിവിധ മാധ്യമങ്ങളിലുള്ള 48 ചിത്രങ്ങളാണ് വൈബ് സൈറ്റില്‍ പ്രദര്‍ശിപ്പിക്കുന്നത്. ഈ പ്രദര്‍ശനം ജൂലൈ 31 വരെയാണ്.

2001 നവംബറിലാണ് സുഭാഷ് ഈ വെബ് സൈറ്റിന് തുടക്കമിട്ടത്. ഇതുവരെയായി നടത്തിയ 12 ചിത്രപ്രദര്‍ശനങ്ങളില്‍ ഒട്ടേറെ ചിത്രകാരന്മാരുടെ ചിത്രങ്ങള്‍ പ്രദര്‍ശിപ്പിച്ചു.

വെബ് സൈറ്റ് സന്ദര്‍ശിക്കുന്നവര്‍ക്ക് പ്രദര്‍ശിപ്പിച്ചിരിക്കുന്ന ചിത്രങ്ങള്‍ വാങ്ങാം. ചിത്രപ്രദര്‍ശനങ്ങള്‍ സംഘടിപ്പിക്കുന്നതിലെ ബുദ്ധിമുട്ടുകളാണ് ഇത്തരമൊരു വെബ് സൈറ്റ് തുടങ്ങുന്നതിനെ പറ്റി ആലോചിക്കാന്‍ കാരണമായതെന്ന് സുഭാഷ് പറഞ്ഞു.