ടൈംസ് ഓഫ് ഇന്ത്യ കൊച്ചി എഡിഷന്‍ തുടങ്ങുന്നു

കേരളത്തില്‍ ആദ്യമായി ഒരു എഡിഷന്‍ തുടങ്ങാന്‍ ടൈംസ് ഓഫ് ഇന്ത്യ ആലോചിയ്ക്കുന്നു. കൊച്ചിയില്‍ ആദ്യ എഡ‍ിഷന്‍ തുടങ്ങാനാണ് ആലോചന. ഇതിനായി കൊച്ചിയില്‍ ഒരു സംഘത്തെ നിയോഗിച്ചതായാണ് വാര്‍ത്തകള്‍.

ടൈംസ് ഓഫ് ഇന്ത്യയുടെ പതിപ്പ് തുടങ്ങാന്‍ കൊച്ചി എത്രമാത്രം യോജ്യമാണെന്നതിനെക്കുറിച്ച് പഠനം നടക്കുന്നുണ്ട്. ടൈംസ് ഓഫ് ഇന്ത്യ തന്നെ നേരിട്ടാണോ ആരോടെങ്കിലും ചേര്‍ന്നുകൊണ്ടാണോ പതിപ്പ് തുടങ്ങുകയെന്ന കാര്യം തീരുമാനിച്ചിട്ടില്ലെന്നാണ് ടൈംസ് അധികൃതര്‍ പറയുന്നത്.

വളരെക്കാലത്തെ ആലോചനയ്ക്ക് ശേഷമാണ് ടൈംസ് 2008 ല്‍ അതിന്റെ ചെന്നൈ എഡിഷന്‍ തുടങ്ങിയത്. അതുവരെ ഹിന്ദു ദിനപ്പത്രത്തിന്റെ അധിപത്യമായിരുന്നു ചെന്നൈയില്‍. ഇപ്പോള്‍ ഹിന്ദുവിന് ഡക്കാണ്‍ ക്രോണിക്കിള്‍ എന്ന ദിനപ്പത്രത്തോടും ചെന്നൈയില്‍ മത്സരിയ്ക്കേണ്ടതുണ്ട്.

ടൈംസ് ഗോവയിലും ജയ്പൂരിലുംപതിപ്പുകള്‍ തുടങ്ങിയിട്ടുണ്ട്. ഉപഭോഗ സാധനങ്ങള്‍ വന്‍തോതില്‍ ചെലവാകുന്ന കേരളം എന്ന വിപണി എന്തുകൊണ്ടും ടൈംസിന് യോജിച്ചതാണെന്നാണ് പൊതുവേ ഉള്ള ധാരണ. പുതിയ തലമുറയ്ക്ക് വെറും വാര്‍ത്ത മാത്രം നല്‍കുന്ന പത്രമല്ല വേണ്ടത് മറിച്ച് അതിനപ്പുറത്തുള്ള കാര്യങ്ങളും ആവശ്യമാണ് എന്ന കണ്ടെത്തലാണ് കൊച്ചിയിലെ ടൈംസ് എഡിഷനെ ന്യായീകരിയ്ക്കുന്ന പ്രധാന കാര്യം.

ടൈംസ് ഓഫ് ഇന്ത്യയില്‍ വാര്‍ത്തയേക്കാളേറെ പരസ്യവും പരസ്യ സ്വഭാവമുള്ള വാര്‍ത്തകളുമാണല്ലോ.