ബ്രിട്ടാസ് ഒഴിഞ്ഞു; ഇനി വെങ്കിട്ടരാമന്‍

കൊച്ചി: സിപിഎമ്മിന്റെ പരോക്ഷ നിയന്ത്രണത്തിലുള്ള മലയാളം കമ്മ്യൂണിക്കേഷന് പുതിയ ഭാരവാഹികള്‍. ചീഫ് ഓപ്പറേറ്റിംഗ് ഓഫീസറായി എം വെങ്കിട്ടരാമനെയും എക്‌സിക്യുട്ടീവ് ഡയറക്ടറായി ടി ആര്‍ അജയനെയുമാണ് തിരഞ്ഞെടുത്തിരിയ്ക്കുന്നത്. എന്‍ പി ചന്ദ്രശേഖരന്‍ ന്യൂസ് ഡയറക്ടറായി ചുമതലയേല്‍ക്കും. ചൊവ്വാഴ്ച കൊച്ചിയില്‍ ചേര്‍ന്ന ഡയറക്ടര്‍ ബോര്‍ഡാണ് തീരുമാനമെടുത്തത്. സ്ഥാനമൊഴിഞ്ഞ ജോണ്‍ബ്രിട്ടാസിന് ഡയറക്ടര്‍ ബോര്‍ഡ് യോഗം യാത്രയയപ്പും നല്‍കി.

ബ്രിട്ടാസ് ചുമതലയൊഴിയുന്നതുമായി ബന്ധപ്പെട്ട് മാധ്യമങ്ങള്‍ ഭാവനാപൂര്‍ണമായി കഥകള്‍ മെനയുകയായിരുന്നുവെന്ന് യോഗത്തില്‍ സംസാരിച്ച സിപിഐ എം സംസ്ഥാന സെക്രട്ടറി പിണറായി വിജയന്‍ പറഞ്ഞു.

മലയാളം കമ്മ്യൂണിക്കേഷന്റെ മാനേജിങ് ഡയറക്ടറും എഡിറ്ററുമായ ജോണ്‍ ബ്രിട്ടാസ് ഈ മാസമാദ്യം രാജിസന്നദ്ധത അറിയിച്ചിരുന്നു. കഴിഞ്ഞ 19ന് തിരുവനന്തപുരത്ത് ചേര്‍ന്ന സി പി എം സെക്രട്ടേറിയറ്റ് യോഗം ബ്രിട്ടാസിന് ചാനല്‍ വിട്ടുപോകാന്‍ അനുമതിയും നല്‍കി. ബ്രിട്ടാസിന്റെ ഭാവി പദ്ധതികളെപ്പറ്റി ഇപ്പോഴും അഭ്യൂഹങ്ങള്‍ നിലനില്‍ക്കുകയാണ്.