വീണയുടെ സ്വയംവരത്തിന് നാലരക്കോടി

മുംബൈ: റിയാലിറ്റി ഷോയില്‍ വെച്ച് വരനെ മാലയിട്ടാല്‍ പാകിസ്താന്‍ സൂപ്പര്‍മോഡല്‍ വീണാ മാലിക്കിന് ഒന്നരക്കോടി രൂപ സമ്മാനമായി ലഭിക്കും. സ്വയംവര മാതൃകയിലുള്ള ഈ ടിവി ഷോയില്‍ പ്രത്യക്ഷപ്പെടുന്ന ആദ്യ മുസ്ലീം പെണ്‍കുട്ടിയായിരിക്കും വീണ. റിയാലിറ്റി ഷോയില്‍ പങ്കെടുക്കുന്നതിന് വീണയ്ക്ക് മൂന്നു കോടി പ്രതിഫലം നല്‍കുന്നുണ്ട്. പരിപാടിക്കൊടുവില്‍ കല്യാണവും കൂടി കഴിച്ചാല്‍ നാലരക്കോടി കിട്ടുമെന്ന് ചുരുക്കം. എന്‍ഡിടിവിയുടെ ഇമേജിന്‍ ചാനലിലാണ് പരിപാടി സംപ്രേഷണം ചെയ്യുക.

ഇതിനു മുമ്പുള്ള മൂന്ന് സീസണുകളില്‍ രാഖി സാവന്ത്, രാഹുല്‍ മഹാജന്‍, രതന്‍ രാജ്പുത് എന്നിവരാണ് പങ്കെടുത്തത്. ആദ്യ എഡിഷനില്‍ രാഖി സാവന്ത് എലേഷ് പരുന്‍ജന്‍ വാലയെയാണ് ഭര്‍ത്താവായി തിരഞ്ഞെടുത്തത്. പക്ഷേ, രണ്ടു പേരും ഇതുവിവാഹം കഴിച്ചിട്ടില്ല. പ്രമോദ് മഹാജന്റെ മകനായ രാഹുല്‍ മഹാജന്‍ വാക്കുപാലിച്ചു. ഷോയിലൂടെ കണ്ടെത്തിയ ഡിംപി മഹാജനെ വിവാഹം കഴിച്ചു. രതന്‍ രാജഗുപ്തയാവട്ടെ ഫൈനല്‍ റൗണ്ടിലെത്തിയ മൂന്നു പേരില്‍ ഒരാളെ വിവാഹം കഴിക്കാന്‍ തീരുമാനിച്ചു.

ടെലിവിഷന്‍ ചാനല്‍ രണ്ട് കരാറുകളാണ് നടിക്ക് നല്‍കിയിട്ടുള്ളത്. അതേ സമയം ഫൈനല്‍ റൗണ്ടില്‍ വിവാഹത്തിനു തയ്യാറാവുമോയെന്ന കാര്യത്തില്‍ വീണ ഇതുവരെ മനസ്സ് തുറന്നിട്ടില്ല. കാരണം ബോയ്ഫ്രണ്ടായ അഷ്മിത് പട്ടേലുമായി വീണ ഇപ്പോഴും ബന്ധം തുടരുന്നുണ്ട്. അഷ്മിത് വെറും ഒരു ഫ്രണ്ട് മാത്രമല്ലെന്ന് ചില ടാബ്ലോയ്ഡുകള്‍ക്കു നല്‍കിയ അഭിമുഖത്തില്‍ നടി വ്യക്തമാക്കിയിട്ടുണ്ട്. ഇത്തരമൊരു ബന്ധം നിലനിന്നാല്‍ ഷോയ്ക്ക് അര്‍ത്ഥമില്ലാതാവുമെന്നതിനാല്‍ സംഘാടകര്‍ ഇപ്പോള്‍ അങ്കലാപ്പിലാണ്.

English summary

Veena Malika offered Rs 3 crore for her appearance on the reality TV show based on the epic Indian tradition of Swayamvar, we heard that the lady has been offered an extra Rs 1.5 crore if agrees to tie the knot to one of the many suitors on the show itself.