പ്രഭാവര്‍മ്മയെ തഴഞ്ഞ ജയചന്ദ്രന്‍ നായര്‍ പുറത്ത്

കൊച്ചി: സമകാലിക മലയാളം വാരികയുടെ പത്രാധിപര്‍ സ്ഥാനത്തുനിന്ന് എസ്. ജയചന്ദ്രന്‍ നായര്‍ രാജിവച്ചു. മാനേജ്‌മെന്റുമായുണ്ടായ അഭിപ്രായവ്യത്യാസത്തെത്തുടര്‍ന്നാണ് രാജിയെന്ന് പറയപ്പെടുന്നു. അടുത്തിടെ സാഹിത്യലോകത്ത് വന്‍ വിവാദം സൃഷ്ടിച്ച പ്രഭാവര്‍മ വിഷയമല്ല രാജിയ്ക്ക് കാരണമെന്ന് സൂചനകളുണ്ട്. കഴിഞ്ഞ രണ്ട് മാസമായി മാനേജ്മെന്റുമായി അസ്വാരസ്യത്തിലായിരുന്നു ജയചന്ദ്രന്‍ നായര്‍. മാസികയുടെ താഴ്ന്ന സര്‍ക്കുലേഷനാണ് പ്രധാന തര്‍ക്ക വിഷയം.

ദേശാഭിമാനി റസിഡന്റ് എഡിറ്ററും പ്രശസ്ത കവിയുമായ പ്രഭാവര്‍മയുടെ ശ്യാമ മാധവം എന്ന ഖണ്ഡകാവ്യത്തിന്റെ പരമ്പര ജയചന്ദ്രന്‍ നായര്‍ ഇടപെട്ട് പ്രസിദ്ധീകരണം നിര്‍ത്തിച്ചിരുന്നു. ടിപി ചന്ദ്രശേഖരന്റെ കൊലപാതകത്തെത്തുടര്‍ന്ന് പ്രഭാവര്‍മ ദേശാഭിമാനിയില്‍ എഴുതിയ ലേഖനത്തില്‍ സിപിഎമ്മിനെ ന്യായീകരിച്ചെന്നാരോപിച്ചാണ് കവിതയുടെ പ്രസിദ്ധീകരണം നിര്‍ത്തിയത്.

51 വെട്ടുകള്‍കൊണ്ട് മനുഷ്യജീവന്‍ അപഹകരിച്ചവരെ വാക്കുകൊണ്ട് ന്യായീകരിക്കാനുള്ള പ്രഭാവര്‍മയുടെ ശ്രമം നിന്ദ്യവും ഹീനവും ആണെന്ന് ജയചന്ദ്രന്‍ നായര്‍ ആരോപിച്ചിരുന്നു.

15 വര്‍ഷം മുമ്പ് വാരിക പ്രസിദ്ധീകരണം തുടങ്ങിയതുമുതല്‍ ജയചന്ദ്രന്‍ നായരാണ് എഡിറ്ററുടെ ചുമതല വഹിക്കുന്നത്. രാജിവെച്ച ബുധനാഴ്ചയും അദ്ദേഹം ഓഫിസില്‍ എത്തിയിരുന്നു. വൈകുന്നേരം അഞ്ചോടെ വാരികയുടെ മാനേജ്‌മെന്റായ ന്യൂ ഇന്ത്യന്‍ എക്‌സ്പ്രസ് ഗ്രൂപ്പ് എം.ഡിക്ക് രാജിക്കത്ത് നല്‍കി മടങ്ങുകയായിരുന്നു. നേരത്തെ അദ്ദേഹം കലാകൗമുദി എഡിറ്ററായിരുന്നു.