ഷാരൂഖിന് വീണ്ടും മീശ അവതാര്‍

ദക്ഷിണേന്ത്യക്കാര്‍ക്ക് ഏറെ താല്‍പര്യമുള്ളതും ഉത്തരേന്ത്യക്കാര്‍ക്ക് വലിയ താല്‍പര്യമില്ലാത്തതുമായ കാര്യമാണ് ആണുങ്ങളുടെ മീശ. അതുകൊണ്ടുതന്നെ ബോളിവുഡ് താരങ്ങള്‍ ഭൂരിഭാഗത്തിനും മീശയില്ല. വളരെ അപൂര്‍വ്വമായിട്ടാണ് ഇവരെല്ലാം സിനിമകളിലും മറ്റും മീശ വച്ച് പ്രത്യക്ഷപ്പെടാറുള്ളത്. ഇടക്ക് സല്‍മാന്‍ ഖാനും അമീര്‍ ഖാനുമെല്ലാം മീശക്കാരായി സിനിമയിലെത്തിയിരുന്നു. ഇപ്പോഴിതാ ഷാരൂഖ് ഖാനാണ് മീശ അവതാരത്തിന് തയ്യാറെടുക്കുന്നത്.

നേരത്തേ ചക്‌ദേ ഇന്ത്യ, രബ് നേ ബനാദി ജോഡി, പഹേലി എന്ന ചിത്രത്തിളിലെല്ലാം മീശ വച്ച് ഷാരൂഖ് പ്രത്യക്ഷപ്പെട്ടിരുന്നു. ഇപ്പോള്‍ വീണ്ടും മീശ വച്ച് അഭിനയിക്കാനൊരുങ്ങുകയാണ് താരം, അത് പക്ഷേ സിനിമയിലല്ലെന്നുമാത്രം. ഡിഷ് ടിവിയുടെ പുതിയ പരസ്യചിത്രത്തിലാണ് ഷാരൂഖ് കൊമ്പന്‍ മീശവച്ച ഇന്‍സ്‌പെക്ടറുടെ വേഷത്തില്‍ എത്തുന്നത്.

ഷാരൂഖ് മീശ വച്ചുകൊണ്ട് ഡിഷ് ടിവിയുടെ മൂന്ന് വ്യത്യസ്ത പരസ്യങ്ങളിലാണ് പ്രത്യക്ഷപ്പെടുന്നത്. പിയൂഷ് രഘാനിയാണ് പരസ്യചിത്രങ്ങള്‍ സംവിധാനം ചെയ്യുന്നത്. എന്തായാലും ബോളിവുഡ് ബാദ്ഷയുടെ മീശ അവതാരം കാണാന്‍ ആരാധകര്‍ കാത്തിരിക്കുകയാണ്.