'കടം വാങ്ങി സ്ത്രീധനം നൽകി പെങ്ങളുടെ വിവാഹം..ഒടുവിൽ..അത്ഭുതപ്പെടുത്തിയ 2 പുരുഷൻമാർ';കിടിലം ഫിറോസ്
കൊച്ചി; സ്ത്രീധന പീഡനത്തെ തുടർന്ന് കൊല്ലം സ്വദേശിയായ വിസ്മയ ആത്മഹത്യ ചെയ്തതിന് പിന്നാലെ സ്ത്രീധന വിഷയം വീണ്ടും ചർച്ചയായിരിക്കുകയാണ്. പഠിപ്പും വിവരവുമുണ്ടെന്ന് ഭാവിക്കുന്നവർ പോലും സ്ത്രീയല്ല, സ്ത്രീധനമാണ് വലുതെന്ന് ഈ കാലത്തും ചിന്തിക്കുമ്പോൾ മാറ്റത്തിന്റെ ചുഴലി വീശിയടിക്കേണ്ട സമയം അതിക്രമിച്ചെന്ന് പലരും ചൂണ്ടിക്കാട്ടുന്നു.
ഇപ്പോഴിതാ അത്തരത്തിലൊരു കുറിപ്പ് പങ്കിടുകയാണ് ബിഗ് ബോസ് സീസൺ ത്രീ മത്സരാർത്ഥി കൂടിയായ ആർജെ ഫിറോസ്. 'അത്ഭുതപ്പെടുത്തിയ രണ്ടു പുരുഷന്മാർ' എന്ന് പറഞ്ഞാണ് ഫിറോസിന്റെ കുറിപ്പ്. പോസ്റ്റ് വായിക്കാം
സ്ത്രീധനത്തിനെതിരെ പ്രതിഷേധമുയർത്തി എസ്എഫ്ഐ- ചിത്രങ്ങൾ
കിഷോറിനെ ആദ്യം കാണുന്നത് ;ഒരിക്കൽ ,
ദുബായിൽ ഒരു വല്ലാത്ത ദുരിതകാലത്ത് അബ്ദു എന്ന സുഹൃത്ത് ഏർപ്പാടാക്കി തന്ന ,ഒരു കുഞ്ഞു മുറിയിൽ മരുഭൂമിയിലെ ചൂടിൽ ,ശീതീകരണ സംവിധാനങ്ങളൊന്നും ഇല്ലാത്ത ഒരു കുടുസ്സ് കൂട്ടിൽ കുറച്ചേറെ നാൾ താമസിക്കുന്ന കാലം .ബിൽഡിങ്ങിനു താഴെ പാർക്ക് ചെയ്യുന്ന കാറുകൾ കഴുകി കിട്ടുന്ന ചെറിയ വരുമാനത്തിൽ സക്കീറിക്കാന്റെ കടയിലെ കാലിച്ചായയും കുടിച്ചു കഴിഞ്ഞ കാലത്തിന്റെ വസന്തവും ഓർത്തിരിക്കുമ്പോളാണ് ഒരു ചെറുപ്പക്കാരൻ കടയുടെ മുൻപിൽ വന്നു നിന്നത് .വെളുത്തു മെലിഞ്ഞു ഉയരമുള്ള ,നടന്നു വിയർത്തു ക്ഷീണിച്ച ഒരു 25 വയസു തോന്നിക്കുന്ന ചെക്കൻ .എന്തോ ശങ്കയോടെ അയാൾ പോക്കറ്റിൽ നിന്ന് പേഴ്സ് എടുത്തു തുറന്ന് നോക്കി .പതിയെ മടക്കി പോക്കറ്റിലിട്ടു .ഒന്നുകൂടി സക്കീറിക്കാന്റെ ഷവർമത്തട്ടിലേക്ക് നോക്കിയിട്ട് മുന്നോട്ട് തലകുനിച്ചു നടന്നു .എന്തോ ,ഞാനും ഇറങ്ങി പുറകേ നടന്നു . ഒപ്പം നടന്നെത്തിയപ്പോൾ മുഖത്ത് നോക്കി ചിരിച്ചു .ഞാൻ ചോദ്യങ്ങളുമായി ഒപ്പം ചേർന്നു .
കിഷോർ എന്നാണ് പേര്
കിഷോർ എന്നാണ് പേര് . നോർത്ത് ഇന്ത്യയിൽ നിന്ന് ജോലി അന്വേഷിച്ചു വന്നതാണ് .ദിവസവും ഓരോ ഇടങ്ങളിൽ പോയി നേരിട്ട് അന്വേഷിക്കുന്നുണ്ട് .കെട്ടിക്കാനൊരു പെങ്ങളുണ്ട് .അവൾക്കായി എന്തെങ്കിലും ഉണ്ടാക്കണം .പറഞ്ഞുറപ്പിച്ച പയ്യൻ ഒരു ഓട്ടോമൊബൈൽ കമ്പനി മാനേജർ എങ്ങാണ്ടാണ് .കനത്തൊരു തുക ഇല്ലാതെ കല്യാണം നടക്കില്ല !അച്ഛൻ മരണപ്പെട്ടു .അമ്മയും പെങ്ങളുമാണ് വീട്ടിൽ .ഇവിടെ വിസിറ്റിംഗ് വിസയിൽ വന്നതാണ് .സുഹൃത്തിന്റെ മുറിയിൽ ആയിരുന്നു താമസം .രണ്ടു ദിവസമായി അവൻ നാട്ടിൽ പോയിട്ട് .ഒരാഴ്ച്ചകഴിഞ്ഞു വരുംവരെ മൻഖൂൽ ഉള്ള ഒരു ഒഴിഞ്ഞ കാർഷെഡിൽ താമസം ശരിയാക്കിയിട്ടാണ് സുഹൃത്ത് പോയത് .അങ്ങോട്ടേക്കുള്ള യാത്രയാണ് .
ഞാനവനെയും കൊണ്ട് തിരികെ നടന്നു .സക്കീറിക്കാന്റെ കടയിൽ നിന്ന് പറ്റിൽ രണ്ട് ബറോട്ടയും കറിയും പകുത്തു .ഒപ്പം ഒരുപാട് നാളുകളായി പരിചയമുള്ള രണ്ടുപേരെപോലെ സൗഹൃദവും പകുത്തു പിരിഞ്ഞു .കണ്ണുകളിൽ നോക്കിച്ചിരിച്ചു മടങ്ങി കിഷോറിനെ രണ്ടാമത് കാണുന്നത് !കൊല്ലം രണ്ടോളം കഴിഞ്ഞു .ദുബായ് മീഡിയ സിറ്റിയിൽ ഒരു media ട്രെയ്നറുടെ വമ്പൻ ഓഫിസിൽ ഞാൻ ജോലി നോക്കുന്ന സമയം .സഫിക്കയുടെ claps എന്ന ഇവൻറ് കമ്പനിയുടെ ക്രീയേറ്റീവ് ഹെഡുമാണ് ഞാനപ്പോൾ .ഇടക്കാലത്തെ ദുരിതം മാറി പച്ചപിടിച്ചു തുടങ്ങിയ സമയമാണ് .അബുദാബിയിൽ ഒരു ഫൈവ്സ്റ്റാർ ഹോട്ടലിൽ ബ്രിടീഷുകാരിയായ മീഡിയ ട്രെയ്നറുടെ അസിസ്റ്റന്റായി മാളു എന്ന പ്രിയ പെങ്ങൾക്കൊപ്പം ട്രെയിനിങ് ക്ലാസ്സിൽ നിൽക്കുമ്പോളാണ് കിഷോറിനെ രണ്ടാമത് കാണുന്നത് .
അവിടെ സ്വീപ്പർ തസ്തികയിൽ ആണ് ചെക്കൻ .ഒന്നുകൂടി ഒന്ന് കൊഴുത്തു .കണ്ണുകളിലെ സ്നേഹവും ഇഷ്ടവും അതുപോലെ തന്നെയുണ്ട് .പെങ്ങളുടെ കല്യാണം കഴിഞ്ഞു .നല്ല നിലക്ക് കടം മേടിച്ചും ലോണെടുത്തും സ്ത്രീധനവും കൊടുത്തു .ശമ്പളം തീരെ കുറവാണെങ്കിലും ഖുബ്ബൂസ് കുതിർത്തു തിന്നു മിച്ചം പിടിച്ച പണം നാട്ടിലയച്ചു കടം കുറേശ്ശെ വീട്ടുന്നുണ്ട് .അന്നും ഞങ്ങൾ ഒരുമിച്ചിരുന്നു ചായ കുടിച്ചു .കുറേ സംസാരിച്ചു പിരിഞ്ഞു .
കിഷോറിനെ മൂന്നാമത് കാണുന്നത് !
അതേ ഹോട്ടലിൽ ക്ലാപ്സ് ഇവെന്റ്സ് ന്റെ ഒരു പരിപാടിക്ക് സുരാജേട്ടൻ അതിഥിയായി വരുന്ന സമയം .അദ്ദേഹം അവിടെയാണ്താമസവും .നാഷണൽ അവാർഡ് കിട്ടി നിൽക്കുന്ന സമയമാണ് .സഫിക്കയും സുരാജേട്ടനും സംസാരിച്ചിരുന്ന സമയത്തു ഞാൻ കിഷോറിനെ അന്വേഷിച്ചിറങ്ങി .അവൻ വല്ലാത്തൊരു അവസ്ഥയിലായിരുന്നു ! രണ്ടാഴ്ച മുൻപ് പെങ്ങൾ മരണപ്പെട്ടു !!! പാചകത്തിനിടയിൽ വസ്ത്രത്തിലേക്ക് തീ പടർന്നായിരുന്നു മരണം .നാട്ടിൽ പോകാൻ ലീവും കിട്ടിയില്ല .
അമ്മ അലമുറയിട്ട് കരഞ്ഞു കിടപ്പാണ് .പെങ്ങളുടെ കൈക്കുഞ്ഞിനെ പെങ്ങളുടെ ഭർത്താവ് അമ്മയുടെ അടുത്ത് കൊണ്ടാക്കി എങ്ങോ പോയി !!എന്ത് ചെയ്യണം എന്നറിയില്ല !!എനിക്കും എന്ത് പറയണം എന്നറിയില്ലായിരുന്നു !!എന്തൊക്കെയോ പറഞ്ഞാശ്വസിപ്പിച്ചു മൊബൈൽ നമ്പറും കൊടുത്തു ഞാൻ പിരിഞ്ഞു .പിന്നെ ഞാൻ നാട്ടിൽ 92.7 BIG FM ന്റെ പ്രോഗ്രാമിങ് ഹെഡ് ആയി ചുമതലയേറ്റു .പോകും മുൻപും വന്നു ജോലിയിൽ പ്രവേശിച്ചപ്പോഴും ഒക്കെ വാട്സാപ്പിൽ കിഷോർ വിശേഷങ്ങൾ അറിയിച്ചു കൊണ്ടിരുന്നു .
എന്റെ ചിന്തയിൽ ഒരു മണിക്കൂറിൽ ഒരു പെൺകുട്ടി വീതം സ്ത്രീധനത്തിന്റെ പേരിൽ മരണപ്പെടുന്ന നമ്മുടെ ഇന്ത്യയിൽ ,അന്വേഷണം നടക്കാതെ പോയ ഒരു സ്ത്രീധനക്കൊലപാതകം തന്നെയായിരുന്നു അവന്റെ പെങ്ങളുടേത് എന്നതായിരുന്നു .പക്ഷേ കഥയൊക്കെ മാറി .പെങ്ങളുടെ ഭർത്താവ് ഗൾഫിലേക്ക് ചേക്കേറി .കിഷോറാകട്ടെ ജോലി ഉപേക്ഷിച്ചു അമ്മയ്ക്കും മരണപ്പെട്ട സഹോദരിയുടെ വാവയ്ക്കും ഒപ്പം താമസം തുടങ്ങി .നാട്ടിലെ ഒരു ചെറിയ കമ്പനിയിൽ ജോലിക്കു കയറി.കടം വീടാനുള്ള ലോൺ ഇടയ്ക്കു മുടങ്ങിയും പിന്നെയും അടഞ്ഞും ഒക്കെ ഇഴഞ്ഞിങ്ങനെ പോയി .
വിശേഷങ്ങൾ ഇടയ്ക്കു കിഷോർ വിളിച്ചറിയിക്കും .കാലങ്ങൾ പിന്നെയും കടന്നൊരുനാൾ അവനെന്നെ വിളിച്ചത് ഒരു സന്തോഷം അറിയിക്കാനാണ് .മരണപ്പെട്ട സഹോദരിയുടെ ഭർത്താവിന്റെ ഒരു നന്മ പറയുവാൻ !ജോലിക്കു കയറിയ അന്നുമുതൽ മകൾക്കുള്ള ചിലവ് കൂടാതെ പെങ്ങളുടെ ഭർത്താവ് മാസാമാസം അയാൾക്ക് കിട്ടുന്ന തുകയിൽ നിന്ന് ഒരു വിഹിതം മാറ്റിവച്ചു സ്വരുക്കൂട്ടിയ തുക കിഷോറിന് അയച്ചു കൊടുത്തു !!!!!
സഹോദരിയുടെ വിവാഹം നടത്താൻ ഒരു ചെറുപ്പക്കാരൻ മണലാരണ്യത്തിൽ കഷ്ടപ്പെട്ടുണ്ടാക്കിയത് എത്രയോ ,അത്രയും തുക മറ്റൊരു ചെറുപ്പക്കാരൻ മരുഭൂമിയിലെ വിയർപ്പിൽ നിന്നു തന്നെ അയച്ചു കൊടുത്തു !!!!അതിശയത്തോടെയാണ് ഞാനതു കേട്ടത് !അത്ഭുതപ്പെടുത്തിയ രണ്ടു പുരുഷന്മാർ !!!
ഈ അനുഭവക്കുറിപ്പ് ഇപ്പൊ പറയാൻ ഒരു കാരണമുണ്ട് .ഇന്നലെ കേട്ട ഒരു പെങ്ങളുടെ സങ്കട കഥയിൽ ,ലക്ഷങ്ങൾ മേടിച്ചു കെട്ടിയിട്ട് ,അയാളുടെഉപദ്രവം സഹിക്കാനാകാതെ വിവാഹമോചനം നേടിയപ്പോൾ മേടിച്ച സ്ത്രീധനത്തിന്റെ ഒരംശം പോലും തിരിച്ചു കൊടുക്കാതെ അവൻ ആട്ടി വിട്ടത്രേ !!കോടതി പറഞ്ഞ ജീവനാംശം മുടങ്ങുമ്പോൾ ചോദിച്ചാൽ കേട്ടാലറയ്ക്കുന്ന ചീത്ത വിളിക്കുന്നത്രെ !!കുഞ്ഞിന് കാണണം എന്ന് ആവശ്യം പറഞ്ഞാൽ സ്വന്തം കുഞ്ഞിന്റെ പിതൃത്വത്തിൽ ആരോപണം നടത്തി പരിഹസിക്കുമത്രേ !!
എന്തോ ,ഉള്ളിൽ പ്രകാശമുള്ള രണ്ടു പുരുഷന്മാർ നിറഞ്ഞു നിൽക്കുകയാണ് !വെളുത്തുമെലിഞ്ഞു ഉയരമുള്ള ഒരു നോർത്ത് ഇന്ത്യക്കാരൻ കിഷോറും ,ഭാര്യ മരണപ്പെട്ടിട്ടും അവളോട് മേടിച്ച സ്ത്രീധനം തിരികെ നല്കാൻ പണിയെടുത്തു സ്വരുക്കൂട്ടിയ ഒരു ഭർത്താവും !!!ചില കഥകൾ മനസ്സിൽ തൊടും .അങ്ങനെ തൊട്ട ഈ പുരുഷന്മാർ,അങ്ങനെയല്ലാത്ത ഒരുപാട് പുരുഷന്മാർക്ക് മാതൃക ആയി മാറിയിരുന്നെങ്കിൽ !!!സ്ത്രീധനം എന്ന ആചാരത്തിനായി ലക്ഷോപലക്ഷം സഹോദരങ്ങൾക്ക് ,പിതാക്കന്മാർക്ക് ഇടനെഞ്ചിടറി അധ്വാനിക്കേണ്ടി വരാതിരുന്നെങ്കിൽ !!!സ്ത്രീധനം മേടിക്കില്ല /നൽകില്ല എന്ന് ഉറച്ചു തീരുമാനമെടുക്കുന്ന ഒരു ജനത നമുക്കിടയിൽ ആകാശമായെങ്കിൽ !!!!
ബെഡ് റൂമില് ഹോട്ട് ലുക്കുമായി പൂനം ബജ്വ; അടിപൊളി ഫോട്ടോഷൂട്ട് കാണാം
Click it and Unblock the Notifications
Sign in with Google