തന്‍റേതെന്ന പേരില്‍ അശ്ലീല ചിത്രം വാട്ട്സ് ആപില്‍ പ്രചരിയ്ക്കുന്നതിനെതിരെ നടി അഞ്ജലി രംഗത്ത്

കൊച്ചി: ഫേസ്ബുക്ക്, വാട്ട്‌സ് ആപ് തുടങ്ങിയ മാധ്യമങ്ങളിലൂടെ തന്റെ പേരില്‍ അശ്ലീല ചിത്രം പ്രചരിയ്ക്കുന്നതിനെതിരെ നടി അഞ്ജലി അനീഷ് രംഗത്ത്. നടിമാരുടെ പേരില്‍ മോര്‍ഫ് ചെയ്ത അശ്ലീല ചിത്രങ്ങള്‍ പ്രചരിയ്ക്കുന്നത് പതിവായിട്ടുണ്ട്. ഇതിന്റെ ഒടുവിലത്തെ ഇരയാണ് അഞ്ജലി.

അഞ്ജലിയുടേതെന്ന പേരിലാണ് വാട്ട്‌സ് ആപിലൂടെ അശ്ലീല ചിത്രങ്ങള്‍ പ്രചരിയ്ക്കുന്നത്. സംഭവവുമായി ബന്ധപ്പെട്ട് പൊലീസില്‍ പരാതി നല്‍കിയിരിയ്ക്കുകയാണവര്‍. സ്വന്തം അമ്മയുടേയെ സഹോദരിയുടെയോ ശരീരം ഉപയോഗിച്ച് അതില്‍ തല മാത്രം എന്റെ ചിത്രമാക്കി മറ്റാരോ വാട്ട്‌സ് ആപില്‍ കൂടി നഗ്ന ചിത്രങ്ങള്‍ പ്രചരിപ്പിയ്ക്കുന്നുവെന്ന് നടി ഫേസ്ബുക്കില്‍ പോസ്റ്റ് ചെയ്തു.

സംഭവവുമായി ബന്ധപ്പെട്ട് ഒരാള്‍ അറസ്‌ററിലായതായും റിപ്പോര്‍ട്ടുണ്ട്. അടുത്തിടെ നടി ജ്യോതി കൃഷ്ണയുടേതെന്ന പേരില്‍ അശ്ലീല ചിത്രങ്ങള്‍ സോഷ്യല്‍ മീഡിയയിലൂടെ പ്രചരിച്ചു. മോര്‍ഫ് ചെയ്യപ്പെട്ട ചിത്രത്തിന്റെ യഥാര്‍ത്ഥ ഫോട്ടോ ഫേസ്ബുക്കില്‍ പോസ്റ്റ് ചെയ്താണ് ജ്യോതി കൃഷ്ണ വ്യാജന്‍മാര്‍ക്ക് മറുപടി കൊടുത്തത്. ഒട്ടേറെ നടിമാരാണ് ഇത്തരം സൈബര്‍ ആക്രമണങ്ങള്‍ക്ക് നിരന്തരം ഇരയാകുന്നത്.

English summary

Fake photos of actress Anjali spreading on Whats App.