ഇത് ഡിങ്കന്റെ പെങ്ങൾ ഡിങ്കത്തി.. രഞ്ജിനി ഹരിദാസിനെ പഞ്ഞിക്കിട്ട് സോഷ്യൽ മീഡിയ..

Published: Saturday, October 28, 2017, 15:16 [IST]

കോഴിക്കോട്: ഇടക്കാലത്ത് സോഷ്യല്‍ മീഡിയയിലെ ട്രോളന്മാരുടെ പ്രിയ ഇരയായിരുന്നു അവതാരകയായ രഞ്ജിനി ഹരിദാസ്. എന്നാല്‍ കെ സുരേന്ദ്രനും കുമ്മനം രാജശേഖരനും ഷീല കണ്ണന്താനവുമൊക്കെ ഇറങ്ങിയതോടെ രഞ്ജിനിയ്ക്ക് ട്രോളന്മാര്‍ ഇടവേള നല്‍കി. എന്നാല്‍ ട്രോളുകളിലേക്ക് പൂര്‍വ്വാധികം ശക്തിയോടെ തിരിച്ച് വന്നിരിക്കുകയാണ് രഞ്ജിനി. ഫേസ്ബുക്കിലിട്ട ഒരു ഫോട്ടോയുടെ പേരില്‍ താരത്തിന് പൊങ്കാലയാണ്.

റോബോട്ട് വേഷമാണ് വില്ലൻ

രഞ്ജിനി തന്റെ ഫേസ്ബുക്ക് പേജില്‍ പോസ്റ്റ് ചെയ്തിരിക്കുന്ന ഫോട്ടോ കണ്ടാല്‍ ട്രോളിയില്ലെങ്കിലേ അത്ഭുതപ്പെടാനുള്ളൂ. ഒരു പെണ്‍റോബോട്ടിനെ പോലുള്ള വേഷമാണ് ചിത്രത്തില്‍ രഞ്ജിനി ധരിച്ചിരിക്കുന്നത്.

പടച്ചട്ട വേഷം

കറുപ്പ് നിറത്തിലുള്ള വസ്ത്രത്തിന്റെ മുകള്‍ ഭാഗത്ത് സ്വര്‍ണ നിറത്തിലുള്ള പടച്ചട്ടയാണ്. ഏഷ്യാനെറ്റ് കോമഡി അവാര്‍ഡ്‌സില്‍ അവതരിപ്പിക്കുന്ന പരിപാടിയ്ക്ക് വേണ്ടിയുള്ളതായിരുന്നു വേഷം.

പേജ് പൊങ്കാലക്കലം

ഇത് കണ്ട് സോഷ്യല്‍ മീഡിയക്കാരും ട്രോളന്മാരും അടങ്ങിയിരിക്കുമോ. തുടങ്ങി പൊങ്കാല. ഫോട്ടോയ്ക്ക് കീഴിലുള്ള കമന്റ് സെക്ഷന്‍ പൊങ്കാല കൊണ്ട് നിറഞ്ഞ് കവിഞ്ഞിരിക്കുകയാണ്.

ഡിങ്കന്റെ അനിയത്തി ഡിങ്കത്തി

ഡിങ്കനെ മാത്രമല്ലേ കണ്ടിട്ടുള്ളൂ.. അവര്‍ക്കൊരു അനിയത്തി കൂടിയുണ്ട്- ഡിങ്കത്തി എന്നാണ് ഒരാളുടെ കമന്റ്. തീര്‍ന്നില്ല ഈ വേഷത്തില്‍ നേരെ ചന്ദ്രനിലേക്ക് വിട്ടോളൂ എന്ന് പറയുന്ന വിരുതന്മാരും ഉണ്ട്.

പട്ടി കടിക്കാതിരിക്കാനാണോ

പട്ടി കടിക്കാതിരിക്കാനാണോ ഈ വേഷം എന്നാണൊരാളുടെ ചോദ്യം. തെരുവ് പട്ടികളോടുള്ള സ്‌നേഹത്തിന്റെ പേരില്‍ പുലിവാല്‍ പിടിച്ച ആളു കൂടിയാണ് രഞ്ജിനി. അതിനും കിട്ടിയിട്ടുണ്ട് കണക്കിന് ട്രോളും പൊങ്കാലയും.

നല്ല ബോറായിട്ടുണ്ടേ

ആരെങ്കിലും ചോദിച്ചാല്‍ ചന്ദ്രനീന്ന് വന്ന ബന്ധുവാണ് എന്ന് പറഞ്ഞാല്‍ മതിയെന്ന് ഒരാള്‍ കളിയാക്കുന്നു. നല്ല ബോറായിട്ടുണ്ടെന്നും ദുരന്തം എന്ന് പറയുന്നവരും കുറവല്ല.

സൂപ്പർ വുമണെന്നും

ശക്തിമാനെന്നും സൂപ്പര്‍ വുമണെന്നും കളിയാക്കുന്നവരുമുണ്ട് കൂട്ടത്തില്‍. ലുക്ക് അടിപൊളി ആയിട്ടുണ്ടെന്ന് അഭിനന്ദിക്കുന്നുമുണ്ട് ചിലര്‍. കമന്റുകള്‍ കൂടാതെ ട്രോളന്മാരും പണി തുടങ്ങിക്കഴിഞ്ഞു.