സുജിത് ഭക്തനെ ചതിച്ച് എമിലും ഹാരിസ് അമീറലിയും? വിവാദങ്ങൾക്ക് മറുപടിയുമായി ഹാരിസ്

ഒരു ഇന്ത്യ-നേപ്പാൾ-ഭൂട്ടാൻ യാത്രകൊണ്ട് മലയാളികൾക്കിടയിൽ ഏറെ പ്രിയങ്കരരായി മാറിയ ഒരു കൂട്ടുകെട്ടാണ് സുജിത് ഭക്തൻ, എമിൽ ജോർജ്, ഹാരിസ് അമീറലി

Published: Tuesday, June 29, 2021, 18:10 [IST]

യൂട്യൂബ് ഒരു വലിയ മാധ്യമമായി തന്നെ കൊണ്ടുനടക്കുന്ന നിരവധി ആളുകൾ നമുക്കിടയിലുണ്ട്. യുട്യൂബിന്റെ സാധ്യതകളെ പരമാവധി ഉപയോഗപ്പെടുത്തി വരുമാനം കണ്ടെത്തുന്ന നിരവധി മലയാളി വ്ലോഗർമാരാണ് ഇപ്പോഴുള്ളത്. ഇവർക്കിടയിലെ കൂട്ടായ്മയും ഭിന്നതെയുമെല്ലാം യുട്യൂബ് പ്രേക്ഷകർ സുപരിചിതവുമായിരിക്കും. പല വ്ലോഗർമാരും ഒന്നിച്ച് വീഡിയോസും യാത്രയുമെല്ലാം ചെയ്യാറുണ്ട്. ഇത്തരത്തിൽ ഒരു ഇന്ത്യ-നേപ്പാൾ-ഭൂട്ടാൻ യാത്രകൊണ്ട് മലയാളികൾക്കിടയിൽ ഏറെ പ്രിയങ്കരരായി മാറിയ ഒരു കൂട്ടുകെട്ടാണ് സുജിത് ഭക്തൻ, എമിൽ ജോർജ്, ഹാരിസ് അമീറലി.

ഉറ്റ ചങ്ങാതിമാരായിരുന്ന മൂവരുടെയും കൂട്ടുകെട്ടും തമാശയുമെല്ലാം പ്രേക്ഷകർ നന്നായി തന്നെ ആസ്വദിച്ചിരുന്നു. എന്നാൽ ഇടക്കാലത്ത് വെച്ച് മൂവരും ഒരു വീഡിയോയിൽ പ്രത്യക്ഷപ്പെടുന്നത് പെട്ടെന്ന് നിന്നു. സുജിത് ഭക്തനും മറ്റ് യുട്യൂബർമാരുമായുള്ള ചില വിഷയങ്ങൾ വലിയ ചർച്ചയാവുകയും ചെയ്തു. ഇതിനെല്ലാം പിന്നാലെയാണ് എമിൽ ജോർജും പുതിയതായി ഒരു യുട്യൂബ് ചാനൽ തുടങ്ങിയത്. ഇതിന്റെ പ്രെമോഷൻ എന്ന രീതിയിൽ ഹാരിസ് അമീറലി ഒരു വീഡിയോ ചെയ്യുകയും ഇരുവരും ഒന്നിച്ചുള്ള യാത്ര പദ്ധതിയിടുന്നുണ്ടെന്ന് വെളിപ്പെടുത്തുകയും ചെയ്തിരുന്നു.

ഇതാണ് ഏറ്റവും ഒടുവിൽ സുജിത്തുമായുള്ള ഭിന്നത വീണ്ടും ചർച്ചയാകാൻ കാരണം. ഹാരിസ് അമീറലിയുടെ വീഡിയോയ്ക്ക് നിരവധി ആളുകളാണ് സുജിത് ഭക്തനെ പിന്തുണച്ചും വിമർശിച്ചും രംഗത്തെത്തിയത്. ഇ ബുൾ ജെറ്റ്, മല്ലു ട്രാവലർ, അരുൺ സ്മോക്കി തുടങ്ങി മറ്റ് പല വ്ലോഗർമാരുമായി നേരത്തെയുണ്ടായ പ്രശ്നത്തിന്റെ അടിസ്ഥാനത്തിലാണ് ഒരു വിഭാഗം ആളുകൾ സുജിത്തിനെതിരെ രംഗത്തെത്തിയത്. അതേസമയം സുജിത്തിന്റെ ഫോളോവേഴ്സ് അദ്ദേഹത്തെ പിന്തുണച്ചുമെത്തി.

സംഭവം വിവാദമായതോടെ തങ്ങളുടെ ബന്ധത്തിൽ എന്താണ് സംഭവിച്ചതെന്ന വിശദീകരണവുമായി ഹാരിസ് അമീറലി തന്നെ രംഗത്തെത്തി. ഇത്തരം തല്ലുപിടുത്തമൊക്കെ കോണ്ടന്റ് ആയി കൊണ്ടുവരാൻ താൽപര്യം ഇല്ലാത്ത വ്യക്തിയാണ് താനെന്ന് പറഞ്ഞാണ് അദ്ദേഹം വീഡിയോ ആരംഭിക്കുന്നത്. എന്നാൽ ഒരുപാട് കോമന്റുകൾ വന്നതിന്റെ പശ്ചാത്തലത്തിലാണ് ഇത്തരമൊന്ന് ചെയ്യുന്നതെന്നും അദ്ദേഹം വ്യക്തമാക്കി. യുട്യൂബ് മേഖലയിൽ ആരുമായും ഒരു വിയോജിപ്പുമില്ലെന്ന് പറഞ്ഞ അദ്ദേഹം എന്തുകൊണ്ട് സുജിത് ഭക്തനുമായി വിഡിയോ ചെയ്യുന്നില്ല എന്നതിന്റെ കാരണവും വെളിപ്പെടുത്തി.

ഹാരിസ് അമീറലി എന്ന ചാനലിൽ ഇതിന് മുൻപ് എത്രയോ പേരൊടൊപ്പം വീഡിയോ ചെയ്തിട്ടുണ്ടെന്നും എല്ലാവരോടും നമുക്ക് സ്നേഹമാണെന്ന് ഹാരിസ് പറഞ്ഞു. ഇതെല്ലാം ഓരോരുത്തരുടെ കഴിവാണെന്നും യുട്യൂബ് എന്ന വലിയ കടലിൽ വലയിട്ട് പിടിക്കാൻ പറ്റുന്നത്ര മീൻ പിടിക്കുകയെന്നെയുള്ളൂവെന്നും അദ്ദേഹം പറഞ്ഞു. നൂറ് സബ്സ്‌ക്രൈബേഴ്സുള്ളത് മുതൽ മില്ല്യൺ വ്യൂസ് ഉള്ളവരോട് വരെ ഒരേ സ്നേഹമാണെന്നും അദ്ദേഹം കൂട്ടിച്ചേർത്തു.

സുജിത് ഭക്തനുമായി ബന്ധപ്പെട്ട് വന്ന കമന്റുകൾ ഏറ്റവും ബാലിശമാണെന്ന് പറഞ്ഞ ഹാരിസ് ഒരു യാത്രയിൽ സുജിത് ഇല്ലെന്ന് പറഞ്ഞാൽ അയാളുമായി തല്ലി പിരിഞ്ഞെന്നല്ല അർത്ഥമെന്നും കൂട്ടിച്ചേർത്തു. നേരത്തെ തന്നെ ഒരു ലൈവ് വീഡിയോയിൽ സുജിത് വ്യക്തമാക്കിയതാണ് മറ്റ് യുട്യൂബർമാരുമായി കോളാബ് ചെയ്യില്ലെന്ന്. പിന്നെ നമ്മൾ പുറകെ പോയി ചോദിക്കേണ്ട കാര്യമില്ലെന്നും നമുക്കെല്ലാവർക്കും ഓരോ ചനലുണ്ടെന്നും ഹാരിസ് വ്യക്തമാക്കി.