വിവാഹനിശ്ചയം 'വ്ലോഗ്' ആക്കി ചരിത്രം സൃഷ്ടിച്ച് ഒരു മലയാളി... സുജിത് ഭക്തന്റെ വീഡിയോ വൈറല്‍

കൊച്ചി: ഇന്നത്തെ കാലത്ത് വിവാഹ വീഡിയോയും വിവാഹ നിശ്ചയ വീഡിയോയും ഒന്നും ഒരു പുത്തരിയേ അല്ല. ആധുനിക സജ്ജീകരണങ്ങള്‍ ഒക്കെ ഉപയോഗിച്ചാണ് ഇതെല്ലാം ചിത്രീകരിക്കുന്നത്. ചില വീഡിയോകള്‍ സിനിമയെ പോലും വെല്ലുന്നവയാണെന്ന് പറയാതിരിക്കാനും ആവില്ല.

അതിനെ കുറിച്ചല്ല ഇവിടെ പറയുന്നത്. സ്വന്തം വിവാഹ നിശ്ചയം ഒരു വീഡിയോ ബ്ലോഗ് ആക്കിയ സുജിത് ഭക്തനെ കുറിച്ചാണ്. സുജിത്തിന്‌റെ വിവാഹനിശ്ചയം ഒരു വ്ലോഗ് ആയി അദ്ദേഹം തന്നെ യൂട്യൂബിലും ഫേസ്ബുക്കിലും പങ്കുവച്ചിരിക്കുകയാണ്.

ഓണ്‍ലൈന്‍ ലോകത്ത് സജീവമായ ആളുകളെ സംബന്ധിച്ച് സുജിത് ഭക്തനെ കുറിച്ച് ഒരു ആമുഖം ആവശ്യമില്ല. പഴയ ആനവണ്ടി ബ്ലോഗിലൂടെ തന്നെ അദ്ദേഹം ഏറെ സുപരിചിതനാണ്. കെഎസ്ആര്‍ടിസിയെ ജനകീയമാക്കിയതില്‍ പോലും ആനവണ്ടിയുടെ പങ്ക് അത്ര ചെറുതല്ല. എന്നാല്‍ അധികൃതരും ആനവണ്ടി ബ്ലോഗും തമ്മില്‍ നടന്ന നിയമ പോരാട്ടങ്ങള്‍ അത്രപെട്ടെന്ന് ആര്‍ക്കും മറക്കാനാവില്ല.

ഇപ്പോള്‍ ടെക് ട്രാവല്‍ ഈറ്റ് എന്ന പേരില്‍ ഒരു ട്രാവല്‍ വ്‌ലോഗ് നടത്തുകയാണ് സുജിത്. അതും ഏറെ ശ്രദ്ധയാകര്‍ഷിക്കുന്ന ഒന്നാണ്. എന്തായാലും സുജിത് ഭക്തന്‍ വിവാഹിതനാവുകയാണ്. ശ്വേതയാണ് വധു. എറണാകുളത്തെ വൈറ്റ് ഫോര്‍ട്ട് ഹോട്ടലില്‍ വച്ചായിരുന്നു വിവാഹനിശ്ചയ ചടങ്ങുകള്‍. ഓഗസ്റ്റ് മാസത്തിലാണ് വിവാഹം.

English summary

Sujith Bhakthan made his marriage engagement function a video blog.