സക്കറിയയ്ക്ക് പുരസ്കാരം

കോഴിക്കോട്: ജനപ്രിയ ട്രസ്റ് ഏര്‍പ്പെടുത്തിയ സാഹിത്യ പുരസ്കാരം ചെറുകഥാകൃത്ത് സക്കറിയയ്ക്ക് ലഭിയ്ക്കും. നവാഗത എഴുത്തുകാര്‍ക്കുള്ള പുരസ്കാരം ഇന്ദു വി.മേനോന് നല്കും.

ഗാന്ധിവധത്തെ പശ്ചാത്തലമാക്കി സക്കറിയ എഴുതിയ ഇതാണെന്റെ പേര് എന്ന നോവല്‍ ഉള്‍പ്പെടെ സാഹിത്യത്തിലും സാമൂഹ്യരംഗത്തും സക്കറിയ നല്കിയ സേവനങ്ങള്‍ പരിഗണിച്ചാണ് അവാര്‍ഡ് നല്കുന്നതെന്ന് ട്രസ്റ് ചെയര്‍മാന്‍ പുനത്തില്‍ കുഞ്ഞബ്ദുള്ള പറഞ്ഞു. സക്കറിയയ്ക്ക് 25,000 രൂപയും പ്രശസ്തിപത്രവും ലഭിയ്ക്കും.

ഒരു ലെസ്ബിയന്‍ പശു എന്ന കഥാസമാഹാരമാണ് ഇന്ദു വി.മേനോനെ പുരസ്കാരത്തിനര്‍ഹയാക്കിയത്. ഇന്ദു വി.മേനോന് 5,000 രൂപ നല്കും. സംഗീതജ്ഞനായ ഉമയനെല്ലൂര്‍ എസ്. വിക്രമന്‍നായരുടെയും വി. സത്യവതിയുടെയും മകളാണ് ഇന്ദു. മധുര കാമരാജ് സര്‍വകലാശാലയില്‍ എംഫില്ലിന് പഠിയ്ക്കുകയാണ്.

2004 മാര്‍ച്ചില്‍ സക്കറിയയുടെ ജന്മഗ്രാമമായ പാലായില്‍ വച്ച് അവാര്‍ഡ് സമ്മാനിയ്ക്കും.