കലാഭവന്‍ മസ്കറ്റില്‍ ശാഖ തുടങ്ങുന്നു

മസ്കറ്റ്: പ്രശസ്ത കലാസംഘടനയായ കലാഭവന്‍ മസ്കറ്റില്‍ ശാഖ തുടങ്ങുന്നു. ഗൗബ്രയിലാണ് കലാഭവന്‍ ശാഖ പ്രവര്‍ത്തനമാരംഭിക്കുക.

മിമിക്രി, ചിത്രരചന, ശാസ്ത്രീയ സംഗീതം, ലളിതഗാനം, ഉപകരണസംഗീതം എന്നിവ ഇവിടെ അഭ്യസിപ്പിക്കും. ഇവയ്ക്കു പുറമെ അറബികളുടെ പാരമ്പര്യ വാദ്യമായ ഔദും ഇവിടെ പരിശീലിപ്പിക്കുന്നുണ്ട്. ജൂലൈ ആറിന് കോഴ്സുകള്‍ക്കുള്ള രജിസ്ട്രേഷന്‍ ആരംഭിക്കും.

വ്യക്തികളുടെ കലാവാസനയെ പ്രോത്സാഹിപ്പിക്കുകയെന്ന ഉദ്ദേശത്തോടെയാണ് കലാഭവന്‍ ശാഖ ആരംഭിച്ചിരിക്കുന്നതെന്ന് കലാഭവന്‍ മസ്കറ്റ് ഡയറക്ടര്‍ അലി അല്‍ അമ്രി പറഞ്ഞു. കലാഭവനിലെ പൂര്‍വവിദ്യാര്‍ത്ഥികളായിരിക്കും ഇവിടുത്തെ അധ്യാപകര്‍. ഔദ് പരിശീലനം നല്‍കുക പരിശീലനം സിദ്ധിച്ച അറബി അധ്യാപകനായിരിക്കും.

വിദ്യാര്‍ത്ഥികളുടെ പ്രാഗത്ഭ്യം തെളിയിക്കാനുള്ള പരീക്ഷകള്‍ കലാഭവന്‍ നടത്തും. വിജയിക്കുന്നവര്‍ക്ക് സര്‍ട്ടിഫിക്കറ്റുകള്‍ നല്‍കും. ട്രിനിറ്റി കോളജ് ഓഫ് ലണ്ടന്‍ സിലബസായിരിക്കും സംഗീതകോഴ്സുകള്‍ക്ക് ഇവിടെ പിന്തുടരുകയെന്നും അലി പറഞ്ഞു.