മൊബൈലിലൂടെ ഗായകരെ കണ്ടെത്തുന്നു

കൊച്ചി: ഗായകപ്രതിഭകളെ കണ്ടെത്തുന്നതിനായി മലയാളം ടിവി ചാനല്‍ ഏഷ്യാനെറ്റുമായി ചേര്‍ന്ന് മൊബൈല്‍ ഫോണ്‍ സര്‍വീസ് കമ്പനിയായ ഐഡിയ മത്സരം സംഘടിപ്പിക്കുന്നു.

ഐഡിയ സ്റാര്‍ സിംഗര്‍ എന്ന് പേരിട്ടിരിക്കുന്ന ഈ പരിപാടിയില്‍ മൊബൈല്‍ ഫോണിലൂടെയാണ് മത്സരാര്‍ത്ഥികളെ തിരഞ്ഞെടുക്കുക. തിരഞ്ഞെടുക്കപ്പെടുന്നവര്‍ക്ക് പ്രതിഭകളെ കണ്ടെത്താനായി നടത്തുന്ന റിയാലിറ്റി ടെലിവിഷന്‍ ഷോയില്‍ പങ്കെടുക്കാം.

ടാലന്റ് ഹണ്ടില്‍ ഐഡിയ ഫോണ്‍ കണക്ഷനുള്ളവര്‍ക്കു മാത്രമേ പങ്കെടുക്കാനാവൂ. മത്സരാര്‍ത്ഥികള്‍ക്ക് 4560101 എന്ന നമ്പറില്‍ ഡയല്‍ ചെയ്തതിനു ശേഷം തമിഴ്, മലയാളം, തമിഴ് ഭാഷകളിലെ ആറ് ഗാനങ്ങള്‍ റെക്കോഡ് ചെയ്യാം. ഇതിന് രജിസ്ട്രേഷന്‍ ഫീസ് 25 രൂപയാണ്. കോളിന് മിനിട്ടിന് 6.99 രൂപയും ഈടാക്കും.

തിരുവനന്തപുരം, കോട്ടയം, എറണാകുളം, തൃശൂര്‍, കോഴിക്കോട്, കണ്ണൂര്‍ എന്നീ ആറ് ജില്ലകളില്‍ നടത്തുന്ന പ്രാഥമിക മത്സരങ്ങളിലൂടെ 40 പേരെ തിരഞ്ഞെടുക്കും. ടെലിവിഷനില്‍ നടക്കുന്ന ഷോയില്‍ ഓരോ ആഴ്ചയും രണ്ടു പേര്‍ പുറത്താകും. ചലച്ചിത്ര സംഗീത സംവിധായകന്‍ എം.ജയചന്ദ്രനാണ് പ്രതിഭകളെ തിരഞ്ഞെടുക്കുന്നത്.