'ഇന്നേവരെ മദ്യപിച്ചിട്ടില്ല, കൂട്ടുകാർ തലവഴി മദ്യം ഒഴിച്ചിട്ടുണ്ട് എന്നിട്ടും..'; മനസ് തുറന്ന് ഇടവേള ബാബു

Published: Thursday, January 25, 2024, 7:43 [IST]

മലയാള സിനിമയിൽ അധികം ചിത്രങ്ങൾ അഭിനയിച്ചിട്ടില്ലെങ്കിലും എല്ലാവർക്കും പരിചിതമായ ഒരുപേരാണ് ഇടവേള ബാബുവിന്റേത്. നടീനടൻമാരുടെ സംഘടനയായ അമ്മയുടെ ജനറൽ സെക്രട്ടറിയായി വർഷങ്ങളായി പ്രവർത്തിച്ചു വരികയാണ് ഇടവേള ബാബു. ഇതിനിടയിൽ ചെറുതല്ലാത്ത വേഷങ്ങളിലും താരം ഇടയ്ക്ക് പ്രത്യക്ഷപ്പെടാറുണ്ട്.

ഇപ്പോഴിതാ തന്റെ വ്യക്തി ജീവിതത്തെ കുറിച്ച് തുറന്ന് സംസാരിക്കുകയാണ് താരം. ജീവിതത്തിൽ ഒരിക്കലും മദ്യപിച്ചിട്ടില്ലെന്നും, പോലീസുകാരനായ തന്റെ അച്ഛന്റെ സ്വാധീനം പലപ്പോഴും ജീവിതത്തിൽ പ്രകടമാണെന്നും ബാബു പറയുന്നു. മദ്യപാനം തെറ്റാണെന്ന് ഒരിക്കലും പറയില്ലെന്നും, സുഹൃത്തുക്കൾ കൂടുതലും മദ്യപിക്കുന്ന ആളുകളാണെന്നും ഇടവേള ബാബു പറയുന്നു.

'ഇത് വലിയ ക്രെഡിറ്റ് ആയി പറയുന്നതല്ല, ഞാൻ മദ്യപിക്കാറില്ല. എന്റെ അച്ഛൻ മദ്യപിക്കാത്ത ആളായിരുന്നു. പോലീസിൽ ആയിരുന്നു, പക്കാ വെജിറ്റേറിയൻ. കുറെയധികം ക്വാളിറ്റി ഒക്കെയുള്ള ഒരു മനുഷ്യനായിരുന്നു അദ്ദേഹം. ബസിൽ മാത്രമേ അദ്ദേഹം യാത്ര ചെയ്യുകയുള്ളൂ. അത് എവിടെയൊക്കെയോ എന്റെ മനസിലും കയറിയിട്ടുണ്ട്, അത് ഇപ്പോഴും ഫോളോ ചെയ്യുന്നുവെന്ന് മാത്രം.' താരം പറഞ്ഞു.

'മദ്യപാനം തെറ്റാണെന്നല്ല. നിന്റെ സ്വന്തം പൈസകൊണ്ട് നിനക്ക് മദ്യപിക്കാം, സിഗരറ്റ് വലിക്കാം എന്നാണ് അച്ഛൻ പറയാറുള്ളത്. പിന്നെ സ്വന്തം പൈസ ആയപ്പോഴും എനിക്ക് മദ്യപിക്കാൻ ഇതുവരെ തോന്നിയിട്ടില്ല. എന്റെ എല്ലാ സുഹൃത്തുക്കളും മദ്യപാനികളാണ്. ഞാൻ എല്ലാ ബാറിലും കയറും. അവിടെ പോയി നല്ല ഭക്ഷണമോ, സോഡയോ ഒക്കെ കഴിക്കും. എന്നെ കുടിപ്പിക്കാൻ വേണ്ടി തലയിലൂടെ ഒഴിച്ചിട്ടുണ്ട് കൂട്ടുകാർ. പക്ഷെ ഞാൻ കുടിച്ചിട്ടില്ല.' ഇടവേള ബാബു പറയുന്നു.

'ചില സുഹൃത്തുക്കൾ പറയും മൂന്നെണ്ണം കഴിയുമ്പോൾ ഓർമ്മിപ്പിക്കണം എന്ന്, എന്നാൽ ഓർമ്മിപ്പിച്ചാൽ പിന്നെ കേൾക്കുക തെറിയാണ്. ചിലരുണ്ട് അവരുടെ ഭാര്യമാരുടെ വിളി സഹിക്കാതെ വരുമ്പോൾ എന്റെ പേര് പറയും. കാരണം എന്റെ പേര് കേൾക്കുമ്പോൾ അവർ ശാന്തമാകും, ഞാൻ മദ്യപിക്കാറില്ലല്ലോ' ബാബു പറഞ്ഞു.

'ഇപ്പോഴും എനിക്ക് മദ്യപിക്കാൻ തോന്നാറില്ല. ചില യാത്രകൾ കഴിഞ്ഞുവരുമ്പോൾ എന്റെ കൈയിൽ കുപ്പികൾ ഉണ്ടാകും. പക്ഷെ ഞാൻ അത് തൊടാറില്ല. ഞാൻ അത് ആർക്കെങ്കിലും ഒക്കെ കൊടുക്കും. ഞാൻ മദ്യപാനി ആണെന്ന് ആളുകൾ തെറ്റിദ്ധരിക്കും. എന്റെ കുംഭ കാണുമ്പൊൾ ഞാൻ നല്ല ബിയർ അടി ആണെന്ന് ആളുകൾ പറയുന്നത് കേൾക്കാം.' താരം വ്യക്തമാക്കി.

'എതെങ്കിലും ഒരു സിനിമയിലെ ഷോട്ടിന് പോലും ഞാൻ ഇത് കൈ കൊണ്ട് തൊട്ടിട്ടുള്ള ആളല്ല. ഞാൻ സിഗരറ്റ് വലിക്കുന്ന സീൻ ഉണ്ടെങ്കിൽ പുക അകത്തേക്ക് എടുക്കാറില്ല. അത് പുറത്തേക്ക് കളയുന്ന ആളാണ്. ഈ ലോകം മുഴുവൻ സഞ്ചരിക്കാൻ ഭാഗ്യം കിട്ടിയിട്ടുള്ള ആളാണ് ഞാൻ. എന്റെ വയർ ഐശ്വര്യമായിട്ടാണ് ഞാൻ കാണുന്നത്' ഇടവേള ബാബു കൂട്ടിച്ചേർത്തു.

Published On January 25, 2024