'അശ്വന്ത് കോക്കിന്റെ റിവ്യൂ വളരെ മോശം ഭാഷയിലായിരുന്നു'; സിയാദ് കോക്കറിനെ ന്യായീകരിച്ച് അരുൺ ബോസ്

മലയാള സിനിമയിലെ റിവ്യൂ ബോംബിംഗ് വിവാദത്തിൽ പുതിയ വഴിത്തിരിവ് സൃഷ്‌ടിച്ചുകൊണ്ട് മാരിവില്ലിൻ ഗോപുരങ്ങൾ എന്ന ചിത്രത്തിന്റെ നിർമ്മാതാവ് സിയാദ് കോക്കർ പ്രമുഖ റിവ്യൂവർ അശ്വന്ത് കോക്കിനെതിരെ പരാതി നൽകിയത് വർത്തയാവുകയാണ്. ഇപ്പോഴിതാ ചിത്രത്തിന്റെ സംവിധായകൻ അരുൺ ബോസ് തന്നെ അശ്വന്ത് കൊക്കിനെതിരെ രംഗത്ത് വന്നിരിക്കുകയാണ്.

അശ്വന്ത് കോക്ക് റിവ്യൂ ചെയ്യുന്ന ഭാഷയാണ് പ്രശ്‌നമെന്നും അത് മോശമെന്നും സിനിമയെ ബാധിക്കുമെന്നുമാണ് അരുൺ പറയുന്നത്. സിയാദ് കോക്കറിന്റെ നടപടിയെ അരുൺ ബോസ് ന്യായീകരിക്കുകയും ചെയ്‌തു.

'സിനിമയെപ്പറ്റി അഭിപ്രായം പറയാൻ എല്ലാവർക്കും സ്വാതന്ത്ര്യമുണ്ട്. എന്നാൽ അശ്വന്ത് കോക്കിന്റെ റിവ്യൂ വളരെ മോശമായ ഭാഷ ഉപയോഗിച്ചായിരുന്നു. അതിനോടുള്ള പെട്ടെന്ന് ഉണ്ടായ പ്രതികരണമാണ് സിയാദ് കോക്കർ നടത്തിയത്. സാധാരണ ഗതിയിൽ സംസാരിക്കുമ്പോഴുള്ള ഭാഷ മാത്രമേ അദ്ദേഹം ഉപയോഗിച്ചിട്ടുള്ളൂ.' എന്നായിരുന്നു അരുൺ ബോസ് ചൂണ്ടിക്കാട്ടിയത്.

'സോഷ്യൽ മീഡിയയിലെ പ്രതികരണങ്ങളെ നമുക്ക് ഒരിക്കലും തടയാനാവില്ല. റിവ്യൂകളുടെ ഭാഷയാണ് പലപ്പോഴും ആളുകളെ സിനിമയിൽ നിന്നും അകറ്റുന്നത്. എന്ത് കാണണമെന്ന് തീരുമാനിക്കേണ്ടത് പ്രേക്ഷകരാണ്. സിനിമ തുടങ്ങിയത് മുതൽ നിരൂപകരും ഉണ്ട്. നിരൂപകർ പിന്നീട് ചലച്ചിത്ര പ്രവർത്തകരായി മാറിയവരുണ്ട്. സിനിമയുടെ മുഖം തന്നെ മാറ്റിയ നിരൂപകരും നമുക്ക് ചുറ്റുമുണ്ട്' എന്നായിരുന്നു അരുൺ ബോസിന്റെ പ്രതികരണം.

കഴിഞ്ഞ ദിവസം റിവ്യൂ ബോംബിങ് ആരോപണത്തിൽ അശ്വന്ത് കോക്കിനെതിരെ ഹൈക്കോടതിയിൽ പരാതി നൽകിയ നിർമ്മാതാവ് സിയാദ് കോക്കർ കടുത്ത ഭാഷയിൽ ഇയാളെ വിമർശിക്കുകയും ചെയ്‌തിരുന്നു. ഈ തൊഴിൽ ഉപേക്ഷിച്ച് വേറെ പണിക്കു പോകാനും കാശുണ്ടാക്കാൻ വേറെ പല മാർഗങ്ങളുമുണ്ടെന്നുമായിരുന്നു സിയാദ് കോക്കറിന്റെ ഉപദേശം.

'സിനിമ നശിക്കണമെന്നാണ് അദ്ദേഹത്തിന്റെ ലക്ഷ്യം. ഒരുകാര്യവുമില്ലാതെ ആളുകളുടെ പ്രശ്‌നത്തിൽ ഇടപെട്ട് സംസാരിക്കുന്ന ആളല്ല ഞാൻ. എല്ലാവർക്കും ഇവിടെ അഭിപ്രായ സ്വാതന്ത്ര്യമുണ്ട്. എന്തുവേണമെങ്കിലും പറയാം. പക്ഷേ ഇത്രയും നീചമായ രീതിയിൽ മിമിക്രി ചെയ്യുന്നത് പോലെ റിവ്യൂ ഇടുന്നതിനെയാണ്‌ എതിർക്കുന്നത്.' എന്നായിരുന്നു സിയാദ് കോക്കറിന്റെ പ്രതികരണം.

അതിനിടെ കഴിഞ്ഞ ദിവസം ശാന്തിവിള ദിനേശും അശ്വന്ത് കോക്കിനെതിരെ രംഗത്ത് വന്നിരുന്നു. പണം വാങ്ങിയാണ് അശ്വന്ത് റിവ്യൂ ചെയ്യുന്നതെന്നായിരുന്നു ശാന്തിവിളയുടെ ആരോപണം. രണ്ട് ലക്ഷം രൂപ കൊടുത്താൽ നല്ല പാടത്തെയും മോശമെന്ന് പറയുന്ന ആളാണ് അശ്വന്ത് എന്നും തല്ലിപ്പൊളി പടത്തിനെ അടിപൊളി എന്ന് പറയിക്കാനും പണം വാങ്ങുന്നു എന്നുമായിരുന്നു ശാന്തിവിള ദിനേശിന്റെ ആരോപണം.

English summary

Director Arun Bose Opens Up About Review Bombing; Said Aswanth Kok's Language Is The Issue