അകലത്തിന്റെ അതിരു ഭേദിക്കാന്‍ നെറ്റ് ഫോണ്‍

അമേരിക്കയിലോ ആഫ്രിക്കയിലോ അറേബ്യയിലോ ഉളള അടുത്ത ബന്ധുവിനോട്, സുഹൃത്തിനോട്, ഭാവി പങ്കാളിയോട് കൊച്ചു വര്‍ത്തമാനം പറയുന്നതിനുളള ചെലവ് ഏപ്രില്‍ ഒന്നു മുതല്‍ വളരെ കുറയും. ഗള്‍ഫിലെ കണവനോടുളള സ്വകാര്യസൊളളലിനിടയില്‍ ഇനി ടെലിഫോണ്‍ കാള്‍ മീറ്ററില്‍ നോക്കി നെഞ്ചിടിപ്പു കൂട്ടേണ്ട. പകരം അടുത്തുളള ഇന്റര്‍നെറ്റ് കഫേയില്‍ ചെന്ന് സൗകര്യമായി കാര്യങ്ങള്‍ പറയാം. കിന്നാരം ചൊല്ലല്‍ മണിക്കൂറുകള്‍ നീണ്ടാലും മണിപ്പേഴ്സിന്റെ കനം കാര്യമായി കുറയില്ല.

വിളിക്കുന്ന സ്ഥലമനുസരിച്ച് ചാര്‍ജില്‍ ഏറ്റക്കുറച്ചില്‍ വരും. അമേരിക്കയില്‍ വിളിക്കുന്ന ചാര്‍ജല്ല, അറേബ്യയിലേയ്ക്കു വിളിക്കാന്‍. ഇപ്പോഴത്തെ ടെലിഫോണ്‍ നിരക്കനുസരിച്ച് അമേരിക്കയിലേയ്ക്കുളള ഒരു കോളിന് മിനിട്ടില്‍ 45 രൂപ നല്‍കണം. എന്നാല്‍ നെറ്റ് നിരക്കില്‍ ഇത് മിനിട്ടിന് 10 രൂപയേ ആകൂ. ഒരു മിനിട്ടില്‍ 35 രൂപ വരെ ലാഭിക്കാം.

വിദേശ രാജ്യത്തേയ്ക്ക് കമ്പ്യൂട്ടറില്‍ നിന്നും ടെലിഫോണിലേയ്ക്കും ഫോണ്‍ ചെയ്യാം. എന്നാല്‍ ഇന്ത്യയ്ക്കകത്ത് കമ്പ്യൂട്ടറില്‍ നിന്നും കമ്പ്യൂട്ടറിലേയ്ക്ക് മാത്രമേ കോള്‍ അനുവദിക്കപ്പെട്ടിട്ടുളളൂ.

ഇന്റര്‍നെറ്റില്‍ സൗജന്യ ഫോണ്‍ സേവനം അനുവദിക്കുന്ന സൈറ്റുകളുമുണ്ട്. ബഡ്ഡി ഫോണ്‍, ഡയല്‍പാഡ്, പിസി2ഫോണ്‍ മുതലായ സോഫ്റ്റ്വെയറുകള്‍ ഡൗണ്‍ലോഡു ചെയ്താല്‍ സൗജന്യമായി സംസാരിക്കാം. എന്നാല്‍ ഇത്തരം സൗജന്യം കഫേകള്‍ അനുവദിക്കുമോ എന്ന് കണ്ടറിയണം. അനുവദിച്ചാല്‍ ഭാഗ്യം. കാരണം നെറ്റ് നിരക്ക് മാത്രം നല്‍കി ഫോണ്‍ ചെയ്യാം. പലേടത്തും ഇപ്പോള്‍ മണിക്കൂറിന് 10 -25 രൂപവരെയാണ് ഇന്റര്‍നെറ്റ് നിരക്ക്.

പുതിയ സമ്പ്രദായം നിലവില്‍ വരുന്നതോടെ ഇന്റര്‍നെറ്റ് സേവന ദാതാക്കളുടെയും നെറ്റ് കഫേകളുടെയും ഭാഗ്യം തെളിയുമെന്നാണ് നെറ്റ് - ടെലികോം വിദഗ്ദ്ധരുടെ അഭിപ്രായം. പുതിയ അവസരങ്ങള്‍ ഇതു മൂലം തുറന്നു കിട്ടുമെന്ന് ഐഎസ്പി അസോസിയേഷന്‍ ( ഇന്‍റ്നെറ്റ് സേവന ദാതാക്കളുടെ സംഘടന) പ്രസിഡന്റ് അമിതാഭ് സിംഗാള്‍ പറയുന്നു.

വിവിധ ഇന്റര്‍നെറ്റ് ദാതാക്കളും ടെലികോം വകുപ്പുമായി രൂക്ഷമായ മത്സരത്തിന് ഇതോടെ അരങ്ങു തെളിയും. സ്വകാര്യ മേഖലയുമായി മത്സരത്തിനുറച്ചാണ് ടെലികോം നിരക്കുകള്‍ അടുത്തിടെ വന്‍ തോതില്‍ കുറച്ചത്. നെറ്റ് ഫോണ്‍ നിലവില്‍ വരുന്നത് കണക്കിലെടുത്ത് ഏപ്രില്‍ ഒന്നുമുതല്‍ എസ് ടി ഡി, ഐ എസ് ഡി നിരക്കുകള്‍ വീണ്ടും കുറച്ചിട്ടുണ്ട്.

1