മാറുന്ന തൊഴില് രംഗം, മാറാത്ത തൊഴിലാളി
മുഷിഞ്ഞു നാറിയ വേഷവുമായി ജോലി ചെയ്യുന്ന ഒരു ചുമട്ടു തൊഴിലാളിയും ഉടയാത്ത ഉടുപ്പും ഉലയാത്ത മുണ്ടുമായി അവനെ അഭിസംബോധന ചെയ്യാനെത്തുന്ന നേതാവും നമുക്ക് സുപരിചിതമായ കാഴ്ചയാണ്. വിലപേശലിന്റെ ആനുകൂല്യം മുഴുവന് നേതാവ് അനുഭവിക്കുമ്പോള്, പരുക്കന് സമീപനത്തിന്റെ പേരില് തൊഴിലാളി പഴി കേള്ക്കുന്നു.
കേരളത്തിലെ ട്രേഡ് യൂണിയന് നേതാക്കളുടെ മനോഭാവം മാറുകയാണെങ്കില് തൊഴില് പ്രശ്നങ്ങള് ഏറെക്കുറെ പരിഹരിക്കപ്പെടും. കാര്യങ്ങള് വ്യക്തമായി മനസിലാക്കാനും യുക്തമായ തീരുമാനങ്ങളെടുക്കാന് കഴിവില്ലാത്തതുമാണ് നേതൃത്വത്തിന്റെ കുഴപ്പം. പഴകിപ്പുളിച്ച കുറെ മുദ്രാവാക്യങ്ങളും വരട്ടു വാദങ്ങളുമല്ലാതെ അവര്ക്ക് ഏറെയൊന്നും അറിയില്ല. ആരോഗ്യകരമായ തൊഴിലാളി-തൊഴിലുടമ ബന്ധം നിലനിര്ത്തുന്നതില് ട്രേഡ് യൂണിയന് നേതൃത്വം തികഞ്ഞ പരാജയമാണ്.
മികച്ച മാനേജ്മെന്റ് വൈദഗ്ദ്ധ്യമാണ് നേതാക്കള്ക്കുണ്ടാകേണ്ടത്. നിര്ഭാഗ്യവശാല് അത് നമ്മുടെ ട്രേഡ് യൂണിയന് നേതാക്കള്ക്കന്യമാണ്. എന്നാല് ഒരേ സമയം മുതലാളിയും തൊഴിലാളിയുമായി സ്വന്തം ലാഭത്തിലൂന്നിയുളള ഒരു വ്യക്തിബന്ധം സൂക്ഷിക്കാന് നേതാക്കന്മാര് എപ്പോഴും ശ്രദ്ധാലുക്കളുമായിരിക്കും.
1