യുഎഇ നിവാസികളുടെ ശ്രദ്ധയ്ക്ക്; ഇന്ധന വില മുതൽ സ്കൂൾ തുറക്കൽ വരെ, ഓഗസ്റ്റിൽ ഈ മാറ്റങ്ങൾ
ദുബായ്: ഈ വർഷം ഓഗസ്റ്റിൽ യുഎഇയിലെ താമസക്കാരെ ബാധിക്കുന്ന നിരവധി പ്രധാന മാറ്റങ്ങൾ പ്രാബല്യത്തിൽ വന്നിരിക്കുകയാണ്. ഇന്ധനവില വർധന, ദുബായിൽ പുതിയ ഇലക്ട്രിക് ബസ് സർവീസ്, ലൂവർ അബുദാബിയിലെ പ്രത്യേക ഇളവ്, പുതിയ അധ്യയന വർഷത്തിന്റെ തുടക്കം, പൊതുഅവധി സാധ്യത എന്നിവയാണ് ഈ മാസത്തിലെ പ്രധാന വിശേഷങ്ങൾ.
ജൂലൈ 31-ന് പ്രഖ്യാപിച്ച പുതിയ ഇന്ധനവില ഓഗസ്റ്റ് 1 മുതലാണ് പ്രാബല്യത്തിൽ വന്നത്. പുതിയ നിരക്ക് പ്രകാരം സൂപ്പർ 98 പെട്രോളിന് ലിറ്ററിന് 3.60 ദിർഹവും സ്പെഷ്യൽ 95 പെട്രോളിന് 3.49 ദിർഹവും ഇ-പ്ലസ് 91 പെട്രോളിന് 3.41 ദിർഹവും ഡീസലിന് 3.80 ദിർഹവുമാണ് വില. വാഹനത്തിന്റെ ഇനം അനുസരിച്ച് ജൂലൈയെ അപേക്ഷിച്ച് ഒരു ടാങ്ക് നിറയ്ക്കാൻ 10.2 മുതൽ 14.8 ദിർഹം വരെ അധികം ചെലവാകും.
വേനലവധിയോടനുബന്ധിച്ച് യുഎഇ നിവാസികൾക്കായി ലൂവർ അബുദാബി പ്രവേശന ടിക്കറ്റിന് 30 ശതമാനം ഇളവ് പ്രഖ്യാപിച്ചിട്ടുണ്ട്. ഓഗസ്റ്റ് 1 മുതൽ സെപ്റ്റംബർ 30 വരെയാണ് ഈ ഓഫർ ലഭിക്കുക. കുട്ടികൾക്ക് പതിവുപോലെ സൗജന്യ പ്രവേശനം തുടരും. അവധിക്കാലം ആഘോഷിക്കുന്നവർക്ക് നല്ല ഓപ്ഷനാണ് ഇത്.
ദുബായിലെ ജുമൈറ ലേക്സ് ടവേഴ്സ് മേഖലയിൽ ജെഎൽടി ലിങ്ക് എന്ന പുതിയ ഇലക്ട്രിക് ബസ് സർവീസും ആരംഭിച്ചു. രണ്ട് റൂട്ടുകളിലായി സർവീസ് നടത്തുന്ന ഈ ബസ് ജെഎൽടിയിലെ വിവിധ ക്ലസ്റ്ററുകളെ ഡിഎംസിസി മെട്രോ സ്റ്റേഷനുമായും സോഭ റിയാൽറ്റി മെട്രോ സ്റ്റേഷനുമായും ബന്ധിപ്പിക്കും. ഓരോ യാത്രയ്ക്കും 3 ദിർഹമാണ് നിരക്ക്. യാത്രക്കാർക്ക് മൊബൈൽ ആപ്പിലൂടെ റൂട്ടുകൾ പരിശോധിക്കാനും ബസിന്റെ തത്സമയ സമയം അറിയാനും യാത്രാ നിരക്ക് അടയ്ക്കാനും കഴിയും.
യുഎഇയിലെ സ്കൂളുകളിലെ വേനലവധി ഈ മാസം അവസാനിക്കും. 2026-27 അധ്യയന വർഷം ഓഗസ്റ്റ് 31ന് ആരംഭിക്കും. സർക്കാർ, സ്വകാര്യ സ്കൂളുകൾ ഉൾപ്പെടെ രാജ്യത്തെ എല്ലാ വിദ്യാഭ്യാസ സ്ഥാപനങ്ങൾക്കും ഈ അക്കാദമിക് കലണ്ടർ ബാധകമാണ്. കിന്റർഗാർട്ടൻ മുതൽ ഗ്രേഡ് 12 വരെയുള്ള സർക്കാർ സ്കൂൾ വിദ്യാർഥികൾക്കുള്ള ഔദ്യോഗിക യൂണിഫോം മാർഗനിർദേശവും വിദ്യാഭ്യാസ മന്ത്രാലയം നേരത്തെ പുറത്തിറക്കിയിട്ടുണ്ട്.
അതുപോലെ തന്നെ ഓഗസ്റ്റ് അവസാനവാരം പ്രവാചകൻ മുഹമ്മദ് നബിയുടെ ജന്മദിനത്തോടനുബന്ധിച്ച് യുഎഇയിൽ മൂന്ന് ദിവസത്തെ ദീർഘവാരാന്ത്യത്തിന് സാധ്യതയുണ്ട്. നിലവിലെ അവധി പട്ടിക പ്രകാരം ഓഗസ്റ്റ് 25-ന് അവധിയായിരിക്കുമെന്നാണ് പ്രതീക്ഷ. എന്നാൽ ഇസ്ലാമിക കലണ്ടർ പ്രകാരമുള്ള ചന്ദ്രദർശനത്തെ അടിസ്ഥാനമാക്കിയുള്ള ഔദ്യോഗിക പ്രഖ്യാപനത്തിന് ശേഷമേ അന്തിമ തീയതി സ്ഥിരീകരിക്കൂ.
അതേസമയം, യുഎഇയിലെയും അറേബ്യൻ ഉപദ്വീപിലെയും ഏറ്റവും ചൂടേറിയതും വരണ്ടതുമായ കാലഘട്ടമായ 'ജംറത് അൽ ഖൈത്' ഓഗസ്റ്റ് 10-ന് അവസാനിക്കും. ജൂലൈ 3-ന് ആരംഭിച്ച ഈ ഘട്ടമാണ് വർഷത്തിലെ ഏറ്റവും കഠിനമായ വേനൽച്ചൂട് അനുഭവപ്പെടുന്ന കാലമെന്ന് എമിറേറ്റ്സ് അസ്ട്രോണോമിക്കൽ സൊസൈറ്റി വ്യക്തമാക്കിയിട്ടുണ്ട്. ഇത് യുഎഇ നിവാസികളെ സംബന്ധിച്ച് ആശ്വാസകരമായ കാര്യമാണ്.
Click it and Unblock the Notifications
Sign in with Google