ബെംഗളൂരു നമ്മ മെട്രോ പിങ്ക് ലൈൻ വൈകിയേക്കും; ഓഗസ്റ്റ് 15ന് തുറന്നുകൊടുക്കും, കാത്തിരിപ്പിൽ യാത്രക്കാർ
ബെംഗളൂരു: നമ്മ മെട്രോ പിങ്ക് ലൈൻ വൈകുമെന്ന് റിപ്പോർട്ട്. കലേന അഗ്രഹാരയ്ക്കും താവരേക്കരെയ്ക്കും ഇടയിലുള്ള 7.5 കിലോമീറ്റർ എലിവേറ്റഡ് പാത 2026 മെയ് മാസത്തിന് പകരം ഓഗസ്റ്റ് 15-ഓടെ മാത്രമേ തുറക്കാൻ സാധ്യതയുള്ളൂ. മെയ് 9-ന് സുരക്ഷാ പരിശോധനകൾ പൂർത്തിയായെങ്കിലും, പ്രധാനപ്പെട്ട അനുമതികളും സ്റ്റേഷൻ ജോലികളും ഇനിയും പൂർത്തിയാകാനുണ്ട്.
ഈ മാസം എലിവേറ്റഡ് ഭാഗത്തെ ട്രയൽ റൺ റിസർച്ച് ഡിസൈൻസ് ആൻഡ് സ്റ്റാൻഡേർഡ്സ് ഓർഗനൈസേഷൻ പൂർത്തിയാക്കി. അടുത്ത മൂന്നാഴ്ചക്കുള്ളിൽ ഇതിന്റെ റിപ്പോർട്ട് പ്രതീക്ഷിക്കുന്നു. അതിനുശേഷം, യാത്രക്കാർക്കായി സർവീസ് ആരംഭിക്കുന്നതിന് മുമ്പ് ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡിന് മെട്രോ റെയിൽ സുരക്ഷാ കമ്മീഷണറിൽ നിന്നും റെയിൽവേ ബോർഡിൽ നിന്നും അനുമതികൾ തേടണം.
ഗ്രേറ്റർ ബെംഗളൂരു അതോറിറ്റി തിരഞ്ഞെടുപ്പിന് മുന്നോടിയായി ഓഗസ്റ്റ് 15 ഉദ്ഘാടനം ലക്ഷ്യമിടാൻ മുതിർന്ന മെട്രോ ഉദ്യോഗസ്ഥർ അനൗപചാരികമായി ജീവനക്കാരോട് നിർദ്ദേശിച്ചിട്ടുണ്ട്. 2025 സെപ്റ്റംബർ, 2026 മാർച്ച്, 2026 മെയ് തുടങ്ങിയ മുൻകാല സമയപരിധികൾ ഇതിനോടകം ഏജൻസിക്ക് തെറ്റിയിരുന്നു. ഇത് ബാനർഘട്ട റോഡിലെ തുടരുന്ന ഗതാഗതക്കുരുക്കിന് പിന്നാലെ പൊതുജനങ്ങളിൽ വലിയ നിരാശയുണ്ടാക്കിയിട്ടുണ്ട്.
ഡയറി സർക്കിളിനും നാഗവാരയ്ക്കും ഇടയിലുള്ള 13.7 കിലോമീറ്റർ ഭൂഗർഭ പാതയുടെ നിർമ്മാണം 2026 ഡിസംബറോടെ പൂർത്തിയാക്കാനാണ് ഔദ്യോഗികമായി ലക്ഷ്യമിടുന്നത്. എന്നിരുന്നാലും, പദ്ധതിയുമായി ബന്ധപ്പെട്ട വൃത്തങ്ങൾ പറയുന്നത് ഈ ഭാഗം 2027-ലേക്ക് നീളാൻ സാധ്യതയുണ്ടെന്നാണ്. ഇതോടെ കലേന അഗ്രഹാര-നാഗവാര പാതയുടെ പൂർണമായ സർവീസ് നിലവിലെ ഷെഡ്യൂളിനേക്കാൾ വൈകിയേക്കും.
ബെംഗളൂരുവിന്റെ തെക്ക് കലേന അഗ്രഹാര മുതൽ വടക്ക് നാഗവാര വരെ 21.25 കിലോമീറ്റർ ദൂരത്തിലാണ് പിങ്ക് ലൈൻ നിർമ്മിക്കുന്നത്. ഇതിൽ 18 സ്റ്റേഷനുകളുണ്ട്, കൂടുതലും ഭൂഗർഭ പാതയിലാണ്. ബാനർഘട്ട റോഡ്, ഡയറി സർക്കിൾ, ലാംഗ്ഫോർഡ് ടൗൺ, എംജി റോഡ്, ശിവാജി നഗർ, കന്റോൺമെന്റ് പ്രദേശം, പോട്ടറി ടൗൺ, നാഗവാര എന്നിവയ്ക്ക് ചുറ്റുമുള്ള പ്രധാന സ്ഥലങ്ങളെ ഈ പാത ബന്ധിപ്പിക്കുന്നു.
ഒന്നാം ഘട്ടത്തിലെ കലേന അഗ്രഹാര-താവരേക്കരെ (7.5 കി.മീ) പാതയാണ് ഓഗസ്റ്റ് 15-ഓടെ തുറക്കാൻ സാധ്യതയുള്ളത്. രണ്ടാം ഘട്ടത്തിലെ ഡയറി സർക്കിൾ - നാഗവാര (13.7 കി.മീ) പാത 2026 ഡിസംബറോടെ പൂർത്തിയാകുമെന്ന് പ്രതീക്ഷിച്ചെങ്കിലും അതുണ്ടാവില്ലെന്ന് ഏറെക്കുറെ ഉറപ്പായി കഴിഞ്ഞു. ഇരു ഘട്ടങ്ങളും പൂർത്തിയായാൽ 21.25 കി.മീറ്ററുള്ള മുഴുവൻ ലൈനും യാത്രക്കാർക്കായി തുറക്കും.
ജയദേവ ഹോസ്പിറ്റൽ സ്റ്റേഷനിൽ യെല്ലോ ലൈനുമായും, എംജി റോഡിൽ പർപ്പിൾ ലൈനുമായും ഇത് ബന്ധിപ്പിക്കും. ഡയറി സർക്കിളിൽ റെഡ് ലൈനുമായും നാഗവാരയിൽ ബ്ലൂ ലൈനുമായും ഭാവിയിൽ ബന്ധിപ്പിക്കാൻ പദ്ധതിയുണ്ട്. കന്റോൺമെന്റ് റെയിൽവേ സ്റ്റേഷനിൽ ഇന്ത്യൻ റെയിൽവേ സബർബൻ സർവീസുകളിലേക്കും പ്രവേശനം ലഭിക്കും.
എലിവേറ്റഡ് പാതയ്ക്കായി ബിഇഎംഎൽ അഞ്ച് ട്രെയിൻ സെറ്റുകൾ എത്തിച്ചിട്ടുണ്ട്. പിങ്ക് ലൈനിനായി മൊത്തം 16 ട്രെയിനുകളാണ് നൽകുക. നൂതന ആശയവിനിമയ അധിഷ്ഠിത ട്രെയിൻ നിയന്ത്രണ സംവിധാനത്തിനാണ് ട്രെയിനുകൾ രൂപകൽപ്പന ചെയ്തിരിക്കുന്നത്. ആദ്യ വർഷങ്ങളിൽ ഡ്രൈവർമാർ സർവീസുകൾ നടത്തുമെങ്കിലും പിന്നീട് പൂർണമായും ഡ്രൈവറില്ലാത്ത ഓപ്പറേഷനാണ് ലക്ഷ്യമിടുന്നത്.
അതേസമയം, ചെലവ് വർധനവ് ഈ പദ്ധതിയുടെ മെല്ലെപ്പോക്കിന് അടിവരയിടുന്നു. ഒന്നാം ഘട്ട മെട്രോയുടെ ചെലവ് 2005-ൽ 6395 കോടി രൂപയായിരുന്നത് 14,133 കോടിയായി വർധിച്ചു. അതുപോലെ, രണ്ടാം ഘട്ടത്തിന്റെ കണക്കാക്കിയ ചെലവ് 2014-ൽ 26,405 കോടി രൂപയായിരുന്നത് 2024-ൽ 40,614 കോടി രൂപയിലെത്തി. ഇതോടെ എത്രയും പെട്ടെന്ന് തന്നെ ജോലികൾ പൂർത്തിയാക്കി പാത തുറന്ന് കൊടുക്കണമെന്നാണ് പ്രധാന ആവശ്യം.
Click it and Unblock the Notifications
Sign in with Google