യുഎഇയിൽ വേനലിന്റെ കാഠിന്യം കൂടും; ജമ്രത് അൽ ഖൈത്ത് തുടങ്ങി, താപനില 47 ഡിഗ്രി സെൽഷ്യസ് വരെ..!

ദുബായ്: യുഎഇയിൽ വേനൽക്കാലത്തിന്റെ ഏറ്റവും തീവ്രമായ ഘട്ടത്തിലേക്ക് രാജ്യം കടക്കാനിരിക്കെ, ജൂലൈ 3 മുതൽ ഓഗസ്‌റ്റ് 10 വരെ നീളുന്ന 'ജമ്രത് അൽ ഖൈത്ത്' കാലയളവ് ആരംഭിക്കുകയാണെന്ന് മുന്നറിയിപ്പ്. വർഷത്തിലെ ഏറ്റവും ചൂടേറിയതും വരണ്ടതുമായ ഈ ഘട്ടത്തിൽ തീരപ്രദേശങ്ങളിലും ഉൾനാടൻ മേഖലകളിലും അതിശക്തമായ ചൂടാണ് അനുഭവപ്പെടുക. ഈ വിവരം എമിറേറ്റ്സ് ആസ്ട്രോണമിക്കൽ സൊസൈറ്റിയാണ് പുറത്തുവിട്ടത്.

ദേശീയ കാലാവസ്ഥാ കേന്ദ്രത്തിന്റെ (എൻസിഎം) പ്രവചനമനുസരിച്ച്, ജൂലൈ 2 വ്യാഴാഴ്‌ച പൊതുവെ തെളിഞ്ഞ കാലാവസ്ഥയായിരിക്കും. കിഴക്കൻ തീരപ്രദേശങ്ങളിൽ നേരിയ മേഘസാന്നിധ്യം ഉണ്ടാകാൻ സാധ്യതയുണ്ട്. മണിക്കൂറിൽ 10 മുതൽ 20 കിലോമീറ്റർ വരെ വേഗതയിൽ തെക്ക്-പടിഞ്ഞാറൻ, വടക്ക്-പടിഞ്ഞാറൻ കാറ്റ് വീശും. ചില സമയങ്ങളിൽ കാറ്റിന്റെ വേഗം 35 കിലോമീറ്റർ വരെ ഉയരാനും സാധ്യതയുണ്ട്.

ഉൾനാടൻ പ്രദേശങ്ങളിൽ പരമാവധി താപനില 47 ഡിഗ്രി സെൽഷ്യസ് വരെ ഉയരുമെന്നാണ് മുന്നറിയിപ്പ്. അബുദാബിയിൽ 41 ഡിഗ്രി സെൽഷ്യസും ദുബായിൽ 39 ഡിഗ്രി സെൽഷ്യസുമാണ് പ്രതീക്ഷിക്കുന്ന ഉയർന്ന താപനില. രാത്രിയോടെ അബുദാബിയിലും ദുബായിലും കുറഞ്ഞ താപനില 30 ഡിഗ്രി സെൽഷ്യസിലേക്കും ഉൾനാടൻ മേഖലകളിൽ 23 ഡിഗ്രി സെൽഷ്യസിലേക്കും താഴാം.

അബുദാബിയിൽ ഈർപ്പത്തിന്റെ നില 25 മുതൽ 75 ശതമാനം വരെയും ദുബായിൽ 30 മുതൽ 65 ശതമാനം വരെയും ആയിരിക്കും. അറേബ്യൻ ഗൾഫിലും ഒമാൻ കടലിലും കടൽ പൊതുവെ ശാന്തമായിരിക്കുമെന്നാണ് കാലാവസ്ഥാ കേന്ദ്രത്തിന്റെ വിലയിരുത്തൽ. ഇത് നേരിയ ആശ്വാസം നൽകുന്ന വാർത്തയാണ്.

ജൂലൈ 3 മുതൽ ആരംഭിക്കുന്ന ജമ്രത് അൽ ഖൈത്ത് കാലയളവിൽ തീരപ്രദേശങ്ങളിൽ സാധാരണയായി 41 മുതൽ 43 ഡിഗ്രി സെൽഷ്യസ് വരെയും ഉൾനാടൻ, മരുഭൂമി മേഖലകളിൽ 45 മുതൽ 46 ഡിഗ്രി സെൽഷ്യസിന് മുകളിലുമാണ് താപനില രേഖപ്പെടുത്തുക. കടുത്ത ഉഷ്‌ണതരംഗങ്ങൾ ഉണ്ടാകുന്ന ദിവസങ്ങളിൽ ചില ഉൾനാടൻ പ്രദേശങ്ങളിൽ താപനില 50 ഡിഗ്രി സെൽഷ്യസും കടക്കാൻ സാധ്യതയുണ്ടെന്നും അധികൃതർ മുന്നറിയിപ്പ് നൽകി.

ഈ സാഹചര്യത്തിൽ പകൽ സമയങ്ങളിൽ നേരിട്ട് സൂര്യപ്രകാശത്തിൽ ദീർഘനേരം ചെലവഴിക്കുന്നത് ഒഴിവാക്കുകയും ആവശ്യത്തിന് വെള്ളം കുടിക്കുകയും ആരോഗ്യസംരക്ഷണ നിർദേശങ്ങൾ പാലിക്കുകയും ചെയ്യണമെന്ന് കാലാവസ്ഥാ വിദഗ്‌ധർ നിർദ്ദേശിക്കുന്നു. യുഎഇയിലെ വേനലിന്റെ കാഠിന്യം ഏറ്റവും അധികമായി അനുഭവപ്പെടുന്ന സമയങ്ങളിൽ ഒന്ന് കൂടിയാണിത്.