യുഎഇയിൽ വേനലിന്റെ കാഠിന്യം കൂടി; താപനില 47 ഡിഗ്രി വരെ, 40 കിലോമീറ്റർ വേഗതയിൽ വരെ കാറ്റ്..!
ദുബായ്: യുഎഇയിൽ ഇന്ന് പൊതുവെ തെളിഞ്ഞ കാലാവസ്ഥയായിരിക്കുമെന്ന് കാലാവസ്ഥാ വകുപ്പിന്റെ പ്രവചനം. എന്നാൽ കിഴക്കൻ പ്രദേശങ്ങളിൽ കുറഞ്ഞ മേഘസാന്നിധ്യം കാണാൻ സാധ്യതയുണ്ട്. ഉൾനാടൻ പ്രദേശങ്ങളിൽ താപനില 47 ഡിഗ്രി സെൽഷ്യസ് വരെ ഉയർന്നേക്കാമെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു.ഇത് ആശങ്ക ഉണ്ടാക്കുന്ന കാര്യമാണ്.
ഇന്ന് രാത്രിയിലും ശനിയാഴ്ച പുലർച്ചെയും തീരദേശ മേഖലകളിൽ അന്തരീക്ഷ ഈർപ്പം വർധിക്കാൻ സാധ്യതയുണ്ട്. ഇത് മൂടൽമഞ്ഞിനുള്ള സാധ്യത കൂട്ടുന്നു. മണിക്കൂറിൽ 10 മുതൽ 25 കിലോമീറ്റർ വേഗതയിൽ തെക്ക്-പടിഞ്ഞാറ്, വടക്ക്-പടിഞ്ഞാറ് ദിശകളിൽ നിന്ന് നേരിയതോ മിതമായതോ ആയ കാറ്റ് വീശിയടിക്കുമെന്നും ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു.
കാറ്റ് ചില സമയങ്ങളിൽ 40 കിലോമീറ്റർ വരെ വേഗത കൈവരിക്കാനും, പ്രത്യേകിച്ച് രാജ്യത്തിന്റെ പടിഞ്ഞാറൻ ഭാഗങ്ങളിൽ പൊടിക്കാറ്റ് രൂപപ്പെടാനും സാധ്യതയുണ്ട്. അറേബ്യൻ ഗൾഫിലും ഒമാൻ കടലിലും കടൽ ശാന്തമോ നേരിയ തോതിൽ പ്രക്ഷുബ്ധമോ ആയിരിക്കും. തീരപ്രദേശങ്ങളിലും ദ്വീപുകളിലും താപനില 36°C നും 42°C നും ഇടയിലായിരിക്കും.
അതേസമയം ഉൾനാടൻ പ്രദേശങ്ങളിൽ ഇത് 43°C മുതൽ 47°C വരെ ഉയർന്നേക്കാം. മലയോര മേഖലകളിൽ 32°C മുതൽ 37°C വരെയായിരിക്കും താപനില. ശനിയാഴ്ചയും പൊതുവെ തെളിഞ്ഞ കാലാവസ്ഥയായിരിക്കുമെങ്കിലും കിഴക്കൻ പ്രദേശങ്ങളിൽ ഭാഗികമായി മേഘാവൃതമാകാൻ സാധ്യതയുണ്ട്. രാത്രിയിലും ഞായറാഴ്ച പുലർച്ചെയും ഈർപ്പമുള്ള കാലാവസ്ഥ തുടരും.
തീരപ്രദേശങ്ങളിൽ മൂടൽമഞ്ഞിന് സാധ്യതയുണ്ട്. കാറ്റിന്റെ വേഗത അല്പം കുറയുമെന്നതിനൊപ്പം കടൽ താരതമ്യേന ശാന്തമായിരിക്കും. ഞായറാഴ്ച കാലാവസ്ഥയിൽ കാര്യമായ മാറ്റമുണ്ടാകില്ല; മിക്കയിടങ്ങളിലും തെളിഞ്ഞ ആകാശമായിരിക്കും. രാത്രിയാകുന്നതോടെ തീരപ്രദേശങ്ങളിൽ ഈർപ്പം വീണ്ടും വർധിക്കും. ഈ സമയത്ത് നേരിയതോ മിതമായതോ ആയ കാറ്റ് തെക്ക്-കിഴക്ക് ദിശയിൽ നിന്ന് വടക്ക്-പടിഞ്ഞാറ് ദിശയിലേക്ക് മാറി വീശും.
എന്നാൽ തിങ്കളാഴ്ചയോടെ കാറ്റിന്റെ വേഗത വർധിക്കും, പ്രത്യേകിച്ച് കടലിൽ കാറ്റിന്റെ വേഗത ചില സമയങ്ങളിൽ മണിക്കൂറിൽ 40 കിലോമീറ്റർ വരെ ഉയർന്നേക്കാം. രാത്രി വൈകുന്നതോടെ അറേബ്യൻ ഗൾഫ് പ്രക്ഷുബ്ധമാകാൻ സാധ്യതയുണ്ട്. എങ്കിലും താപനില ഈ സീസണിലെ പോലെ തന്നെ ഉയർന്ന നിലയിൽ തുടരുമെന്നാണ് കരുതുന്നത്.
ചൊവ്വാഴ്ചയോടെ രാജ്യത്തുടനീളം താപനില അൽപം കുറയുന്നത് ചൂടിൽ നിന്ന് നേരിയ ആശ്വാസം നൽകുമെന്നാണ് വിലയിരുത്തുന്നത്. എന്നാൽ വെല്ലുവിളിയായി ശക്തമായ വടക്ക്-പടിഞ്ഞാറൻ കാറ്റ് തുറസായ സ്ഥലങ്ങളിൽ വീണ്ടും പൊടിപടലങ്ങൾ ഉയർത്തിയേക്കാം. അറേബ്യൻ ഗൾഫിൽ കടൽ പ്രക്ഷുബ്ധമാകാനും സാധ്യതയുണ്ട്.
Click it and Unblock the Notifications
Sign in with Google