വൻ മാറ്റങ്ങൾക്ക് ഒരുങ്ങി യുഎഇ; കോടിക്കണക്കിന് ദിർഹം ചിലവഴിച്ച് വിവിധ പദ്ധതികൾ, ലക്ഷ്യം നല്ല ഭാവി
ദുബായ്: സുസ്ഥിര വളർച്ച ലക്ഷ്യമിട്ട് ഊർജ്ജം, ജലം, ഗതാഗതം, നഗരവികസനം തുടങ്ങിയ സുപ്രധാന മേഖലകളിൽ നിരവധി അടിസ്ഥാന സൗകര്യ വികസന പദ്ധതികൾക്ക് തുടക്കം കുറിച്ച് യുഎഇ. ഊർജ്ജം, ജലം, ഗതാഗതം, റോഡുകൾ, നഗരവികസനം, സാമ്പത്തിക മേഖലകൾ എന്നിങ്ങനെ വിവിധങ്ങളായ രംഗങ്ങളിൽ വ്യാപിച്ചുകിടക്കുന്ന യുഎഇയുടെ പദ്ധതികൾ, തന്ത്രപരമായ ആസൂത്രണം, കാര്യക്ഷമമായ നിർവ്വഹണം, നൂതന സാങ്കേതികവിദ്യകളുടെ ഉപയോഗം എന്നിവയോടുള്ള രാജ്യത്തിന്റെ ദൃഢമായ പ്രതിബദ്ധതയെയാണ് വരച്ചുകാട്ടുന്നത്.
സർക്കാർ കെട്ടിടങ്ങളിലെ ഊർജ്ജ-ജല ഉപഭോഗം കുറയ്ക്കുന്ന പദ്ധതിയുടെ ആദ്യഘട്ടം ഊർജ്ജ, അടിസ്ഥാന സൗകര്യ മന്ത്രാലയം ആരംഭിച്ചിട്ടുണ്ട്. റാസൽ ഖൈമയിലെ അബ്ദുള്ള ബിൻ ഓമ്രാൻ ആശുപത്രി ഉൾപ്പെടെ 60 സ്ഥാപനങ്ങളിൽ 120 ദശലക്ഷം ദിർഹം നിക്ഷേപത്തോടെ ഇത് നടപ്പിലാക്കുന്നു. പദ്ധതിയുടെ രണ്ടാം ഘട്ടത്തിൽ, 360 കെട്ടിടങ്ങളിലേക്ക് ഇത് വ്യാപിപ്പിക്കാനായി സ്വകാര്യ പങ്കാളിത്തത്തോടെ 1 ബില്യൺ ദിർഹം വകയിരുത്തിയിട്ടുണ്ട്.
അബുദാബിയിലെ 3.3 GW ശേഷിയുള്ള അൽ നൗഫ് 1 ഇൻഡിപെൻഡന്റ് പവർ പ്രൊഡ്യൂസർ പദ്ധതിക്കായി എമിറേറ്റ്സ് വാട്ടർ ആൻഡ് ഇലക്ട്രിസിറ്റി കമ്പനി നിരവധി ടെൻഡറുകൾ ക്ഷണിച്ചു. കൂടാതെ, റാസൽ ഖൈമ 60,000 ഘനമീറ്റർ പ്രതിദിന ശേഷിയുള്ള പുതിയ മലിനജല ശുദ്ധീകരണ പ്ലാന്റിന് ദീർഘകാല കരാറിൽ ഒപ്പുവച്ചു. ഏകദേശം 300,000 താമസക്കാർക്ക് ഇത് പ്രയോജനം ചെയ്യുമെന്നാണ് കരുതുന്നത്.
ഡ്രെയിനേജ് അടിസ്ഥാന സൗകര്യങ്ങൾ മെച്ചപ്പെടുത്തുന്നതിൽ ദുബായ് വലിയ നിക്ഷേപം നടത്തുകയാണെന്നും റിപ്പോർട്ടുകൾ വ്യക്തമാക്കുന്നു. അൽ ഖൂസ് ക്രിയേറ്റീവ് സോണിലെ മലിനജല, മഴവെള്ള നിർഗ്ഗമന ശൃംഖലകൾ നവീകരിക്കാൻ 250 ദശലക്ഷം ദിർഹമിന്റെ പദ്ധതി പ്രഖ്യാപിച്ചു. ഇത് 500 ദശലക്ഷം ദിർഹമിന്റെ വലിയ പദ്ധതിയുടെ ഭാഗമാണ്.
ഡെയ്റാ മഴവെള്ള നിർഗ്ഗമന പദ്ധതിയുടെ 36 ശതമാനം പൂർത്തിയായി. 500 ദശലക്ഷം ദിർഹം ചെലവ് വരുന്ന ഈ പദ്ധതി 13 പ്രദേശങ്ങളെയും 60 കിലോമീറ്റർ ഡ്രെയിനേജ് ശൃംഖലകളെയും ബന്ധിപ്പിക്കുന്നു. 2027-ഓടെ ഇത് പൂർത്തിയാക്കാൻ ലക്ഷ്യമിട്ടിരിക്കുന്നു. ഷാർജയിൽ, കൽബയിലെ ജലവിതരണ ശേഷി പ്രതിദിനം 6 ദശലക്ഷം ഗാലനിൽ നിന്ന് 9 ദശലക്ഷം ഗാലനായി വർധിപ്പിച്ചു.
പൊതുഗതാഗത സംവിധാനം മെച്ചപ്പെടുത്താൻ ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി 726 ആധുനിക ബസ് ഷെൽട്ടറുകൾ സ്ഥാപിച്ചു. മറൈൻ ഗതാഗത കാത്തിരിപ്പ് കേന്ദ്രങ്ങളും നവീകരിച്ചു. 490 വലിയ വാഹനങ്ങൾ ഉൾക്കൊള്ളുന്ന മൂന്ന് ട്രക്ക് വിശ്രമ കേന്ദ്രങ്ങളും ആർടിഎ ഒരുക്കിയിട്ടുണ്ട്. ഹെസ്സ സ്ട്രീറ്റ് വികസന പദ്ധതിയുടെ രണ്ടാം ഘട്ടത്തിനുള്ള കരാർ ഒപ്പുവച്ചു.
3 കിലോമീറ്റർ നീളമുള്ള ഈ പദ്ധതിയിൽ പ്രധാന പാലങ്ങളും ഒരു തുരങ്കവും ഉൾപ്പെടുന്നു. ചുറ്റുമുള്ള ഏകദേശം 650,000 താമസക്കാർക്ക് ഈ പദ്ധതി ഗുണകരമാകും. മറ്റ് എമിറേറ്റുകളിലും റോഡ് വികസനം നടക്കുന്നു. ഉമ്മുൽ ഖുവൈൻ അതിന്റെ ആഭ്യന്തര റോഡ് ശൃംഖലയുടെ ആദ്യഘട്ടം പൂർത്തിയാക്കി, ഇത് 30.74 കിലോമീറ്റർ ദൂരമാണ്.
നഗരവികസന പ്രവർത്തനങ്ങളും യുഎഇയിൽ ഊർജിതമായി നടക്കുന്നുണ്ടെന്നതാണ് മറ്റൊരു പ്രത്യേകത. ഷാർജയിൽ, 2027-ലെ ഷാർജ അന്താരാഷ്ട്ര പുസ്തകമേളയ്ക്ക് ആതിഥേയത്വം വഹിക്കാൻ കഴിയുന്ന പുതിയ എക്സിബിഷൻ, കോൺഫറൻസ് സെന്ററിന്റെ നിർമ്മാണം ആരംഭിച്ചു കഴിഞ്ഞു. ഇതിനായി 500 ദശലക്ഷം ദിർഹമാണ് നിക്ഷേപം നടത്തിയിരിക്കുന്നത്.
ദുബായ് സിലിക്കൺ ഓയസിസ് വികസിപ്പിക്കാൻ 12.8 ബില്യൺ ദിർഹമും, ദുബായ് ഇന്റർനാഷണൽ ഫിനാൻഷ്യൽ സെന്റർ വിപുലീകരണത്തിനായി 100 ബില്യൺ ദിർഹമും ഉൾപ്പെടെയുള്ള വലിയ പദ്ധതികൾ പ്രഖ്യാപിച്ചു. ലിവാൻ ഒയാസിസ് ഇക്കോ-ലേസർ പദ്ധതിയും ദുബായ് ആരംഭിച്ചു. വരും വർഷങ്ങളിൽ രാജ്യത്തിന്റെ വികസനത്തിനും വളർച്ചയ്ക്കും ഉതകുന്ന രീതിയിലുള്ളവയാണ് പ്രഖ്യാപിച്ച പദ്ധതികളിൽ ഏറെയും.
Click it and Unblock the Notifications
Sign in with Google