യുഎഇയിലെ ന്യൂ ഇയർ ആഘോഷം മഴ കൊണ്ടുപോവുമോ? ശക്തമായ കാറ്റിന് സാധ്യത, ബീച്ചിൽ പോവേണ്ട!

ദുബായ്: പുതുവർഷ രാവിലേക്ക് അടുക്കുമ്പോൾ യുഎഇയുടെ വിവിധ ഭാഗങ്ങളിൽ ഒറ്റപ്പെട്ട മഴ തുടരുമെന്ന് ദേശീയ കാലാവസ്ഥാ കേന്ദ്രത്തിന്റെ പ്രവചനം. ഇത് തണുത്ത അന്തരീക്ഷം, ശക്തമായ കാറ്റുകൾ, കൂടാതെ കടലിൽ അപകടകരമായ സാഹചര്യങ്ങൾ എന്നിവയ്ക്ക് കാരണമാകുമെന്നാണ് പ്രവചനത്തിൽ പറയുന്നത്. ഇതോടെ യുഎഇയിലെ പുതുവത്സര ആഘോഷങ്ങൾ വെള്ളത്തിലാവുമോ എന്നാണ് താമസക്കാർ മുഴുവൻ ഉറ്റുനോക്കുന്നത്.

പുതുവർഷ രാവായ ഇന്ന് താപനിലയിൽ കൂടുതൽ കുറവ് പ്രതീക്ഷിക്കുന്നുവെന്നാണ് കാലാവസ്ഥാ കേന്ദ്രം അറിയിച്ചത്. മിക്കവാറും തെളിഞ്ഞതോ ഭാഗികമായി മേഘാവൃതമായതോ ആയ ആകാശം, ദ്വീപുകളിലും ചില തീരദേശ, വടക്കൻ പ്രദേശങ്ങളിലും താഴ്ന്ന മേഘങ്ങളും ഉണ്ടാവാം. രാത്രിയോടെ ഈർപ്പം വർധിക്കുകയും വ്യാഴാഴ്‌ച രാവിലെ ഉൾപ്രദേശങ്ങളിൽ നേരിയ മൂടൽമഞ്ഞ് രൂപപ്പെടാൻ സാധ്യതയുണ്ടെന്നും എൻസിഎം കൂട്ടിച്ചേർത്തു.

അസ്ഥിരമായ ഈ കാലാവസ്ഥ വടക്കൻ, കിഴക്കൻ പ്രദേശങ്ങളിൽ താപനില ഗണ്യമായി കുറയ്ക്കുകയും കാഴ്‌ച പരിധി മങ്ങിക്കുകയും ചെയ്യുന്നു. ശക്തമായ വടക്ക്-പടിഞ്ഞാറൻ കാറ്റുകൾ പൊടിയും മണലും ഉയർത്തുന്നത് തുടരുകയാണ്. കാറ്റിന്റെ വേഗത മണിക്കൂറിൽ 40 കിലോമീറ്റർ വരെ എത്തി, ചിലപ്പോൾ ഇത് കൂടുതൽ ശക്തിപ്പെടാനും സാധ്യതയുണ്ട്.

പുതുവർഷ രാവിൽ കടൽ പ്രക്ഷുബ്‌ധമോ, ചിലപ്പോൾ വളരെ പ്രക്ഷുബ്‌ധമോ ആയി തുടരുമെന്നാണ് മുന്നറിയിപ്പിൽ പറയുന്നത്. ഒമാൻ കടലിൽ തിരമാലകളുടെ ഉയരം ആറ് അടി വരെ എത്തി, കൂടാതെ അറബിക്കടലിൽ ബുധനാഴ്‌ച വൈകുന്നേരത്തോടെ ഏഴ് അടി വരെ ഉയരുമെന്നും പ്രവചിക്കുന്നു. അതിനാൽ ബീച്ച് യാത്രകൾ നടത്തുന്നവർ നിർബന്ധമായും ജാഗ്രത പാലിക്കണം.

നാളെയോടെ കാലാവസ്ഥയിൽ നേരിയ സ്ഥിരത പ്രതീക്ഷിക്കുന്നു. മിക്കവാറും തെളിഞ്ഞതോ ഭാഗികമായി മേഘാവൃതമായതോ ആയ ആകാശവും മൊത്തത്തിൽ കാറ്റിന്റെ തീവ്രത കുറയുകയും ചെയ്യും. രാത്രിയിലും വെള്ളിയാഴ്‌ച രാവിലെയും ഉയർന്ന ഈർപ്പം നിലനിൽക്കും, ചില തീരദേശ, ഉൾപ്രദേശങ്ങളിൽ മൂടൽമഞ്ഞിനോ നേർത്ത മൂടൽമഞ്ഞിനോ സാധ്യതയുണ്ട്. കടൽ സാഹചര്യങ്ങൾ ശാന്തമാകുമെന്നും മിതമായതോ നേരിയതോ ആയ നിലയിലേക്ക് മാറുമെന്നും പ്രതീക്ഷിക്കുന്നു.

വെള്ളിയാഴ്‌ചയും തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥ തുടരും, താപനിലയിൽ നേരിയ വർധനവ് പ്രതീക്ഷിക്കുന്നു. കാറ്റ് നേരിയതോ മിതമായതോ ആയിരിക്കും, ചിലപ്പോൾ ശക്തിപ്പെട്ടേക്കാം. അതേസമയം, അറബിക്കടലിലെ കടൽക്ഷോഭം വെള്ളിയാഴ്‌ച രാത്രിയോടെ ക്രമേണ വർധിക്കാൻ സാധ്യതയുണ്ട്.

കടൽ പ്രക്ഷുബ്‌ധമാകുമ്പോൾ ജാഗ്രത പാലിക്കാനും, നീന്തൽ ഡൈവിംഗ് എന്നിവ ഒഴിവാക്കാനും, സമുദ്ര പ്രവർത്തനങ്ങൾ താൽക്കാലികമായി നിർത്തിവെക്കാനും കാലാവസ്ഥാ കേന്ദ്രം താമസക്കാർക്കും കടൽ യാത്രക്കാർക്കും മുന്നറിയിപ്പ് നൽകി. പ്രത്യേകിച്ച് പുതുവത്സരാഘോഷ വേളകളിൽ ബീച്ചുകളിലും മറ്റും എത്തുന്ന ആളുകളുടെ എണ്ണം ക്രമാതീതമായി ഉയരുന്ന സാഹചര്യത്തിലാണ് മുന്നറിയിപ്പ്.

അതിനിടെ പുതുവത്സര ആഘോഷങ്ങൾക്കായി യുഎഇ ഒന്നാകെ ഒരുങ്ങി കഴിഞ്ഞു. ദുബായ് ഉൾപ്പെടെയുള്ള വൻ നഗരങ്ങളിൽ വലിയ ഒരുക്കങ്ങളാണ് നടക്കുന്നത്. രാജ്യത്തുടനീളം വെടിക്കെട്ടുകൾ, അത്യാധുനിക ഡ്രോൺ ഷോകൾ, വർണ്ണാഭമായ ലേസർ പ്രദർശനങ്ങൾ എന്നിവ ഉൾപ്പെടെ ഉണ്ടാവും. അതിനിടെ മഴ രസംകൊല്ലിയാവുമോ എന്നാണ് കൂടുതൽ പേരുടെയും ആശങ്ക.

English summary

UAE Weather Alert On New Year Eve: chances of rain and strong wind, rough sea across Country.