യുഎഇയിൽ വ്യാപകമായ മഴ, കൂട്ടിന് ഇടിമിന്നലും ശക്തമായ കാറ്റും; കാരണം ന്യൂനമർദ്ദം, ഡ്രൈവർമാർ ജാഗ്രത!
ദുബായ്: യുഎഇയിൽ ഇന്നും കനത്ത മഴ തുടരുന്നു. വെള്ളിയാഴ്ചയും ശക്തമായ മഴ, ഇടിമിന്നൽ, ശക്തമായ കാറ്റ്, ആലിപ്പഴ വർഷം എന്നിവയുൾപ്പെടെയുള്ള തീവ്ര കാലാവസ്ഥ പ്രതീക്ഷിക്കുന്നതായി ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. വ്യാഴാഴ്ച രാത്രി മുതൽ വെള്ളിയാഴ്ച പുലർച്ചെ (മാർച്ച് 27) വരെ പ്രധാന നഗരങ്ങളിൽ തീവ്ര കാലാവസ്ഥ അനുഭവപ്പെട്ടു.
ഇടിമിന്നലും പേമാരിയും ആഞ്ഞുവീശിയതായി താമസക്കാർ സാക്ഷ്യപ്പെടുത്തുന്നു. ന്യൂനമർദ്ദം സൃഷ്ടിച്ച അസ്ഥിര കാലാവസ്ഥയാണ് തുടർച്ചയായ മഴക്കും കാറ്റിനും ഇടിമിന്നലിനും കാരണമെന്ന് എൻസിഎം വിശദീകരിച്ചു. യുഎഇ അധികൃതർ അബുദാബിയിൽ പ്രത്യേകിച്ചും ജാഗ്രത പാലിക്കാൻ അഭ്യർത്ഥിച്ചു. ശനിയാഴ്ച മുതൽ കാലാവസ്ഥ മെച്ചപ്പെടുമെന്നും തെളിഞ്ഞ ആകാശവും തണുത്ത താപനിലയും പ്രതീക്ഷിക്കാമെന്നും അവർ അറിയിച്ചു.
കനത്ത മഴയെ തുടർന്ന് എമിറേറ്റ്സ് റോഡിന്റെ (ബൈപാസ് റോഡ്) ചില ഭാഗങ്ങളിൽ വെള്ളം കയറി ഗതാഗതം തടസപ്പെടുത്തി. റാസ് അൽ ഖൈമയിൽ അൽ ബീഹ്, ഖദാ താഴ്വരകളിൽ നിന്നുള്ള വെള്ളം ഹൈവേയിലെത്തിയത് ഡ്രൈവർമാർക്ക് അപകടകരമായ സാഹചര്യങ്ങൾ ഉണ്ടാക്കുകയും ചെയ്തിരുന്നു. ഇടതടവില്ലാതെ പെയ്ത മഴയാണ് സാഹചര്യങ്ങൾ വഷളാക്കിയത്.
അതേസമയം, വാഹനമോടിക്കുന്നവർ വേഗത കുറയ്ക്കണം, സുരക്ഷിതമായ അകലം പാലിക്കണം, താഴ്വരകളും താഴ്ന്ന പ്രദേശങ്ങളും ഒഴിവാക്കണം. പകരം വഴികൾ ഉപയോഗിക്കാനും അധികൃതർ നിർദ്ദേശിച്ചു. ട്രാഫിക് നിയന്ത്രിക്കാനും സുരക്ഷ ഉറപ്പാക്കാനും പട്രോൾ ടീമുകൾ സ്ഥലത്തുണ്ടെന്നും അധികൃതർ വ്യക്തമാക്കി.
അവസാന മഴമേഘങ്ങൾ വ്യാഴാഴ്ച വൈകുന്നേരത്തോടെ പടിഞ്ഞാറൻ പ്രദേശങ്ങളെ സ്വാധീനിച്ചു. രാത്രിയോടുകൂടി ഇവ അൽ ദഫ്രയിലേക്കും അബുദാബിയിലേക്കും നീങ്ങുകയും ചെയ്തിരുന്നു. വെള്ളിയാഴ്ചയോടെ വടക്കൻ എമിറേറ്റുകളായ അൽ ഐനിലും കിഴക്കൻ മേഖലകളിലും മഴ പെയ്യാൻ സാധ്യതയുണ്ടെന്നാണ് പ്രവചനം.
വ്യാഴാഴ്ച ദുബായ്, ഷാർജ, അജ്മാൻ, റാസ് അൽ ഖൈമ, ഫുജൈറ എന്നിവിടങ്ങളിൽ കനത്ത മഴ രേഖപ്പെടുത്തിയിരുന്നു. ഇടിമിന്നലിനൊപ്പമെത്തിയ മഴ താപനിലയിൽ കാര്യമായ കുറവുണ്ടാക്കി. കഴിഞ്ഞ വാരാന്ത്യം മുതലുള്ള മേഘാവൃതമായ കാലാവസ്ഥ കിഴക്കൻ വാദികളിലും മലയിടുക്കുകളിലും ജലപ്രവാഹം വർധിപ്പിക്കാൻ ഇടയാക്കിയിരുന്നു.
മിതമായതും ശക്തവുമായ കാറ്റ് തുടരുമെന്നാണ് എൻസിഎം അറിയിച്ചത്. ചില സമയങ്ങളിൽ തുറന്ന പ്രദേശങ്ങളിൽ ഇത് കൂടുതൽ ശക്തി പ്രാപിക്കും. കാറ്റിന്റെ വേഗത മണിക്കൂറിൽ 15-30 കിലോമീറ്റർ ആയിരിക്കും, ചിലയിടങ്ങളിൽ ഇത് 60 കിലോമീറ്റർ വരെയാകാം. ഇത് പൊടിക്കാറ്റിനും കാഴ്ചക്കുറവിനും ഇടയാക്കിയേക്കാം. അറബിക്കടലിലും ഒമാൻ ഉൾക്കടലിലും കടൽ പ്രക്ഷുബ്ധമായിരിക്കും
ഞായറാഴ്ചയും തിങ്കളാഴ്ചയും സ്ഥിതിഗതികൾ കൂടുതൽ സ്ഥിരത കൈവരിക്കുമെന്നും പൊതുവെ തെളിഞ്ഞ കാലാവസ്ഥയും സമുദ്രസാഹചര്യങ്ങൾ മെച്ചപ്പെടുമെന്നും പ്രതീക്ഷിക്കുന്നതായി കാലാവസ്ഥാ നിരീക്ഷണ കേന്ദ്രം അറിയിച്ചിരുന്നു. വാരാന്ത്യത്തിൽ ചില പ്രദേശങ്ങളിൽ പുതിയ കാറ്റ് പൊടിപടലങ്ങൾക്ക് കാരണമായേക്കാമെന്നും അവർ കൂട്ടിച്ചേർത്തു.
Click it and Unblock the Notifications
Sign in with Google