ആർസിബി വക വമ്പൻ ലോട്ടറി, 20 ലക്ഷത്തിൽ നിന്ന് 11 കോടിയിലേക്ക് ഒറ്റയടിക്ക് കുതിപ്പ്; ആരാണീ ഭാഗ്യവാൻ?

ഇന്ത്യൻ പ്രീമിയർ ലീഗ് താരലേലം അടുത്തിടെയാണ് സമാപിച്ചത്. രണ്ട് ദിവസങ്ങളിലായി നടന്ന താരലേലത്തിന് വേദിയായത് സൗദിയിലെ ജിദ്ദയായിരുന്നു. നൂറുകണക്കിന് താരങ്ങളാണ് ലേലത്തിൽ മാറ്റുരച്ചത്. പത്ത് ഐപിഎൽ ടീമുകൾ തങ്ങൾക്ക് ആവശ്യമായ താരങ്ങളെ തിരഞ്ഞെടുക്കാൻ മുൻപന്തിയിൽ തന്നെയുണ്ടായിരുന്നു. എന്നാൽ ഞെട്ടിക്കുന്ന ചില സംഭവവികാസങ്ങളും ഇവിടെയുണ്ടായി എന്നതാണ് പ്രധാന കാര്യം.

അതിലൊന്ന് ചെറിയ താരങ്ങൾ പോലും, അപ്രതീക്ഷിതമായി വന്ന് വലിയ പ്രതിഫലവുമായി മടങ്ങിയെന്നതാണ്. അത്തരത്തിൽ ഒരു താരത്തെയാണ് ഇന്ന് പരിചയപ്പെടാനുള്ളത്. കേവലം 20 രൂപ അടിസ്ഥാന വില നിശ്‌ചയിച്ചിരുന്ന ഈ താരത്തെ ഒറ്റയടിക്ക് അതിന്റെ എത്രയോ അമ്പതിരട്ടിയോളം വരുന്ന തുകയ്ക്കാണ് മുൻനിര ടീമുകളിൽ ഒന്ന് വിളിച്ചെടുത്തത്.

ഇന്ത്യൻ ദേശീയ ടീമിൽ കളിച്ചിട്ടുള്ള വിക്കറ്റ് കീപ്പർ ബാറ്ററായ ജിതേഷ് ശർമ്മയാണ് ഈ താരം. ഏകദേശം 5500 ശതമാനത്തിന്റെ ഞെട്ടിക്കുന്ന വർധനവാണ് ജിതേഷിന്റെ ഐപിഎൽ വരുമാനത്തിൽ ഉണ്ടായിരിക്കുന്നത് എന്നതാണ് ശ്രദ്ധേയമായ കാര്യം. ഇന്ത്യൻ പ്രീമിയർ ലീഗിൽ ഇതുവരെ കിരീടം നേടിയിട്ടില്ലെങ്കിലും ഏറ്റവും കൂടുതൽ ആരാധകരുള്ള ടീമുകളിൽ ഒന്നായ റോയൽ ചലഞ്ചേഴ്‌സ് ബാംഗ്ലൂരാണ് ജിതേഷിനെ സ്വന്തമാക്കിയത്.

20 ലക്ഷം അടിസ്ഥാന വിലയിൽ നിന്ന് ആർസിബി ജിതേഷിനായി 11 കോടി രൂപ വരെ ലേലം വിളിച്ചുവെന്നതാണ് ശ്രദ്ധേയമായ കാര്യം. ചെന്നൈ സൂപ്പർ കിംഗ്‌സ്, ഡൽഹി ക്യാപ്പിറ്റൽസ്, ലക്‌നൗ സൂപ്പർ ജയന്റ്സ് എന്നീ ടീമുകളും ജിതേഷിനായി സജീവമായി രംഗത്തുണ്ടായിരുന്നു. എന്നാൽ അവസാന നറുക്ക് വീണത് ആർസിബിക്കായിരുന്നു.

ഇതോടെ ഇന്ത്യൻ ക്രിക്കറ്റിലെ എന്നല്ല, ലോക ക്രിക്കറ്റിലെ തന്നെ ഏറ്റവും വലിയ താരങ്ങളിൽ ഒരാളായ വിരാട് കോലിക്കൊപ്പം കളിക്കാനുള്ള ഭാഗ്യമാണ് ജിതേഷ് ശർമ്മയ്ക്ക് കൈവന്നിരിക്കുന്നത്. പ്രതിഫലത്തിൽ ജിതേഷിനെക്കാൾ കൂടുതൽ വാങ്ങുന്ന താരങ്ങൾ ഒട്ടേറെ ഉണ്ടായിരുന്നിട്ടും ലാഭ ശതമാനത്തിൽ ജിതേഷ് തന്നെയാണ് മുന്നിലുള്ളത്.

ഐപിഎൽ താരലേലത്തിൽ ഇന്ത്യൻ താരങ്ങളുടെ ഡിമാൻഡ് ഊട്ടിയുറപ്പിക്കുന്നതാണ് ജിതേഷ് ശർമ്മയ്ക്ക് വേണ്ടി നടന്ന മത്സരം. എങ്കിലും പൃഥ്വി ഷാ, സർഫറാസ് ഖാൻ എന്നിവർ ഉൾപ്പെടെയുള്ള യുവതാരങ്ങളെ ഒരു ടീമും സ്വന്തമാക്കിയിരുന്നില്ല. ഡേവിഡ് വാർണർ, കെയ്ൻ വില്യംസൺ അടക്കമുള്ളവരും ലേലത്തിൽ നിന്ന് പുറത്തായിരുന്നു. എന്നിട്ടും ഇത്രയും ഉയർന്ന തുകയ്ക്ക് മുൻനിര ടീം സ്വന്തമാക്കി എന്നതാണ് ജിതേഷിനെ സംബന്ധിച്ച് സന്തോഷം പകരുന്ന കാര്യം.

അതേസമയം, ഇത്തവണ ഐപിഎൽ ലേലത്തിൽ ഇന്ത്യൻ യുവതാരങ്ങളായ റിഷഭ് പന്ത്, ശ്രേയസ് അയ്യർ എന്നിവരാണ് റെക്കോർഡ് വിലയുമായി മുന്നിട്ട് നിന്നത്. പന്തിനെ ലക്‌നൗ സൂപ്പർ ജയന്റ്സ് സ്വന്തമാക്കിയത് 27 കോടി രൂപ എന്ന വൻ തുകയ്ക്കാണ്. മറുവശത്ത് പഞ്ചാബ് കിംഗ്‌സ് ആവട്ടെ 26.75 കോടി രൂപ മുടക്കിയാണ് ശ്രേയസിനെ ടീമിൽ എത്തിച്ചത്. 23.75 കോടി രൂപയ്ക്ക് വെങ്കിടേഷ് അയ്യറിനെ ടീമിൽ എത്തിച്ച് കെകെആറും ഞെട്ടിച്ചിരുന്നു.

English summary

IPL Auction 2025: Meet This Batter Who Got Salary Hike From 20 Lakhs To 11 Crores, His Name Is.