ഗാംഗുലിയുടെ ഒറ്റ ഫോണ്‍ കോള്‍, 7.2 കോടി കീശയിലാക്കി കുമാര്‍ കുശാഗ്ര; ലേലത്തില്‍ സംഭവിച്ചത് ഇങ്ങനെ

Updated: Tuesday, January 2, 2024, 0:15 [IST]

കുമാര്‍ കുശാഗ്രയ്ക്ക് ലോട്ടറിയടിച്ചെന്ന് പറഞ്ഞാല്‍ അതിശയോക്തിയില്ല. ഐപിഎല്‍ താരലേലത്തില്‍ ഇത്തവണ സര്‍പ്രൈസായി ഡല്‍ഹി ക്യാപിറ്റല്‍സ് വാങ്ങിയ താരമാണ് കുമാര്‍ കുശാഗ്ര. ജാര്‍ഖണ്ഡില്‍ നിന്നുള്ള ജൂനിയര്‍ എംഎസ് ധോണിയെന്ന വിശേഷണം കുശാഗ്ര ഇപ്പോള്‍ തന്നെ സ്വന്തമാക്കി കഴിഞ്ഞു. ലേലത്തിന്റെ അന്ന് താരത്തിനായി വലിയ മത്സരമാണ് നടന്നത്.

ഈ സമയം ഫോണ്‍ കോളുകളെ മുഴുവന്‍ അവഗണിച്ച് ലേലം കണ്ടുകൊണ്ടിരിക്കുകയായിരുന്നു കുശാഗ്ര. ഒടുവില്‍ ഡല്‍ഹി ക്യാപിറ്റല്‍സ് താരത്തെ സ്വന്തമാക്കുമ്പോള്‍ 7.20 കോടിയായിരുന്നു ലഭിച്ചത്. സൗരവ് ഗാംഗുലിയുടെ നീക്കങ്ങളാണ് ഇത്ര വലിയ തുക ലഭിക്കാന്‍ കുശാഗ്രയെ സഹായിച്ചത്.

തന്റെ പേര് ലേലത്തില്‍ 55ാം സ്ഥാനത്തായിരുന്നു. അത് പ്രഖ്യാപിക്കേണ്ട സമയത്താണ് അവര്‍ ഇടവേളയെടുത്തത്. ഞാനാണെങ്കില്‍ ഒന്നും കഴിച്ചിരുന്നില്ല. അപ്പോഴേക്കും സമയം വൈകീട്ട് ആറരയായിരുന്നു. തനിക്ക് വലിയ ബുദ്ധിമുട്ട് തോന്നിയ നിമിഷമായിരുന്നു അത്. എന്റെ പേര് ലേലത്തില്‍ ഉയര്‍ന്നപ്പോള്‍, ചെന്നൈ സൂപ്പര്‍ കിംഗ്‌സാണ് ആദ്യം മുന്നിലെത്തിയത്.

60 ലക്ഷമായിരുന്നു അവര്‍ മുന്നോട്ട് വെച്ച തുക. ഈ സമയത്ത് തനിക്ക് കോളുകള്‍ നിരന്തരം വരുന്നുണ്ടായിരുന്നുവെന്ന് കുശാഗ്ര പറയുന്നു. പതിനഞ്ചോളം കോളുകളാണ് വന്നത്. ഫോണിലായിരുന്നു ലേലം കണ്ടത്. ഫോണ്‍ വന്നത് കൊണ്ട് പലപ്പോഴും വിഷ്വല്‍ കൃത്യമായി കാണാനായില്ല. ഒടുവില്‍ നോക്കുമ്പോള്‍ തുക 7.20 കോടിയിലെത്തിയിരുന്നു.

ഡല്‍ഹിയും സിഎസ്‌കെയും തമ്മിലായിരുന്നു വലിയ മത്സരം നടന്നത്. ഒടുവില്‍ ഡല്‍ഹി കുശാഗ്രയെ സ്വന്തമാക്കുകയായിരുന്നു. ഈ സമയം തന്റെ ടീമംഗങ്ങളെല്ലാം വലിയ ആവേശത്തോടെ മുറിയിലേക്ക് ആഘോഷങ്ങള്‍ക്കായി വന്നുവെന്ന് കുശാഗ്ര പറയുന്നു. 23 കളിക്കാരും ചേര്‍ന്ന് ആഘോഷം ആരംഭിച്ചിരുന്നു.

അഞ്ച് മിനുട്ട് അവരോട് ആവശ്യപ്പെട്ടു. അമ്മയോട് സംസാരിക്കാനായിരുന്നു. വര്‍ഷങ്ങളുടെ കഠിനാധ്വാനത്തിലാണ് ഫലം കണ്ടിരിക്കുന്നതെന്നും കുശാഗ്ര പറഞ്ഞു. സ്‌കൂളില്‍ നല്ല രീതിയില്‍ പഠിച്ചിരുന്നു കുശാഗ്ര. എന്നാല്‍ അണ്ടര്‍ 16 ടീമിന്റെ ഭാഗമായതോടെ കുശാഗ്ര ജീവിതം ക്രിക്കറ്റിലേക്ക് മാറുകയായിരുന്നു.

ഡല്‍ഹി ക്യാപിറ്റല്‍സ് കുശാഗ്രയെ വാങ്ങാന്‍ നേരത്തെ തന്നെ തീരുമനിച്ചിരുന്നു. ഒരു കമന്റേറ്ററാണ് ഗാംഗുലിയുടെ സന്ദേശം താരത്തെ അറിയിച്ചത്. അന്ന് പക്ഷേ ട്രയല്‍സിന് പോകാന്‍ ജാര്‍ഖണ്ഡ് ടീം അനുമതി നല്‍കിയില്ല. എന്നാല്‍ ഗാംഗുലി കുശാഗ്രയെ നേരിട്ട് വിളിക്കുകയായിരുന്നു.

രണ്ട് ക്യാമ്പിലും അതിവേഗം താരം അര്‍ധ സെഞ്ച്വറി കുറിച്ചു. ഗാംഗുലിയെ ഇംപ്രസ് ചെയ്യാനും ഇതിലൂടെ സാധിക്കും. കുശാഗ്രയ്ക്ക് ബാറ്റിംഗ് ടെക്‌നിക്കില്‍ മാറ്റം പറഞ്ഞ് കൊടുത്തത് ഗാംഗുലിയാണ്. കൂടുതല്‍ ആക്രമിച്ച് കളിക്കാനും ഇത് താരത്തെ സഹായിച്ചു. റിഷഭ് പന്ത് കീപ്പിംഗിലും താരത്തിന് ഉപേേദശം നല്‍കിയിട്ടുണ്ട്.