നെഞ്ചെരിച്ചിലും അസിഡിറ്റിയും വിട്ടുമാറുന്നില്ലേ? ആയുർവേദത്തിലെ ഈ 5 ഒറ്റമൂലികൾ മാറ്റം കൊണ്ടുവരും!
ആധുനിക ജീവിതശൈലിയും മാറിവരുന്ന ഭക്ഷണ ശീലങ്ങളും കാരണം ഇന്ന് പലരും നേരിടുന്ന വലിയൊരു പ്രശ്നമാണ് അസിഡിറ്റിയും നെഞ്ചെരിച്ചിലും. എരിവുള്ള ആഹാരങ്ങൾ അമിതമായി കഴിക്കുമ്പോഴോ, കൃത്യസമയത്ത് ഭക്ഷണം കഴിക്കാതിരിക്കുമ്പോഴോ നെഞ്ചിലും തൊണ്ടയിലും അനുഭവപ്പെടുന്ന നീറ്റൽ ഒട്ടും സുഖകരമല്ല. ഇതിന് ഉടനടി ആശ്വാസം ലഭിക്കാൻ വിപണിയിലെ താൽക്കാലിക മരുന്നുകളെ ആശ്രയിക്കുന്നതാണ് പൊതുവെ കണ്ടുവരുന്ന ശീലം. എന്നാൽ ഇവ ദീർഘകാലാടിസ്ഥാനത്തിൽ ശരീരത്തിന് ദോഷം ചെയ്യാനും പാർശ്വഫലങ്ങൾ ഉണ്ടാക്കാനും ഇടയാക്കും.
ആയുർവേദ ശാസ്ത്രപ്രകാരം ശരീരത്തിലെ 'പിത്ത' ദോഷത്തിന്റെ അസന്തുലിതാവസ്ഥയാണ് അസിഡിറ്റിക്ക് അല്ലെങ്കിൽ ആസിഡ് റിഫ്ലക്സിന് വഴിവെക്കുന്നത്. ആയുർവേദത്തിൽ ഈ അവസ്ഥയെ 'അമ്ലപിത്തം' എന്ന് വിശേഷിപ്പിക്കുന്നു. യാതൊരുവിധ പാർശ്വഫലങ്ങളുമില്ലാതെ, നമ്മുടെ വീട്ടിലെ ലളിതമായ പ്രകൃതിദത്ത ചേരുവകൾ ഉപയോഗിച്ച് അസിഡിറ്റിയും നെഞ്ചെരിച്ചിലും വളരെ പെട്ടെന്ന് തന്നെ മാറ്റിയെടുക്കാൻ നമുക്ക് സാധിക്കും. അസിഡിറ്റിക്ക് ഉടനടി പരിഹാരം നൽകുന്ന അഞ്ച് മികച്ച ആയുർവേദ ഒറ്റമൂലികളെക്കുറിച്ചും അവ ശാസ്ത്രീയമായി ഉപയോഗിക്കേണ്ട രീതികളെക്കുറിച്ചും മനസിലാക്കാം.
പെരുംജീരകം
ഭക്ഷണത്തിനു ശേഷം പെരുംജീരകം ചവച്ചരച്ച് കഴിക്കുന്നത് നമ്മുടെ നാട്ടിൽ പണ്ടുമുതലേയുള്ള ഒരു നല്ല ശീലമാണ്. ദഹന പ്രക്രിയ സുഗമമാക്കാൻ ഏറെ സഹായിക്കുന്ന ഒന്നാണ് പെരുംജീരകത്തിൽ അടങ്ങിയിരിക്കുന്ന പ്രത്യേകതരം എണ്ണകൾ. ഇത് ആമാശയത്തിലെ ആസിഡിന്റെ അളവ് ക്രമീകരിക്കുകയും വയറ്റിനുണ്ടാകുന്ന അസ്വസ്ഥതകൾക്ക് പെട്ടെന്ന് ആശ്വാസം നൽകുകയും ചെയ്യുന്നു. നെഞ്ചെരിച്ചിൽ ഉണ്ടാകുമ്പോൾ ഒരു ടീസ്പൂൺ പെരുംജീരകം കൈയിലെടുത്ത് സാവധാനം ചവച്ചരച്ച് അതോടൊപ്പം വരുന്ന ഉമിനീരിറക്കുന്നത് ആസിഡ് റിഫ്ലക്സിനെ തൽക്ഷണം തടയാൻ സഹായിക്കും.
ജീരകവെള്ളം
കേരളീയരുടെ വീടുകളിൽ നിത്യേന ഉപയോഗിക്കുന്ന ഒന്നാണ് ജീരകവെള്ളം. ആയുർവേദത്തിൽ ദഹനസംബന്ധമായ സകല പ്രശ്നങ്ങൾക്കും ഏറ്റവും കൂടുതൽ നിർദ്ദേശിക്കപ്പെടുന്ന ഒരു ഔഷധം കൂടിയാണിത്. ഉമിനീരിന്റെ ഉത്പാദനം ഗണ്യമായി വർദ്ധിപ്പിക്കാൻ ജീരകം സഹായിക്കുന്നു, ഇത് ദഹനം പെട്ടെന്നാക്കാനും ആമാശയത്തിലെ അമിത ആസിഡിനെ തടയാനും ഏറെ സഹായിക്കുന്നുണ്ട്. ആസിഡ് റിഫ്ലക്സ് മൂലം നെഞ്ചിൽ കടുത്ത ഭാരവും അസ്വസ്ഥതയും അനുഭവപ്പെടുമ്പോൾ അല്പം ജീരകം വായിലിട്ട് ചവച്ചരച്ച് കഴിക്കുന്നത് ഉടനടി ഫലം നൽകുന്ന ഒരു മികച്ച മാർഗ്ഗമാണ്.
ഇരട്ടിമധുരം
ആയുർവേദത്തിലെ മറ്റൊരു അമൂല്യ ഔഷധമാണ് ഇരട്ടിമധുരം അഥവാ യഷ്ടിമധു. ആമാശയത്തിന്റെ ഉൾഭിത്തിയെയും അന്നനാളത്തെയും സംരക്ഷിക്കുന്ന ഒരു സുരക്ഷിത പടലമായി പ്രവർത്തിക്കാൻ ഇരട്ടിമധുരത്തിന് കഴിയും. ആസിഡിന്റെ അമിതമായ ഉത്പാദനം മൂലം അന്നനാളത്തിലുണ്ടാകുന്ന വ്രണങ്ങളെയും വീക്കങ്ങളെയും തടയാൻ ഇത് സഹായകമാണ്. നെഞ്ചെരിച്ചിലും തൊണ്ടയിലെ പുകച്ചിലും പെട്ടെന്ന് കുറയ്ക്കാനും അന്നനാളത്തിലെ കഫക്കെട്ട് പോലുള്ള ബുദ്ധിമുട്ടുകൾ മാറ്റാനും ഇതിലടങ്ങിയിരിക്കുന്ന ആൻറി-ഇൻഫ്ലമേറ്ററി ഘടകങ്ങൾക്ക് പ്രത്യേക ശേഷിയുണ്ട്.
നെല്ലിക്ക
ശരീരത്തിലെ ചൂട് കുറയ്ക്കാനും പിത്ത ദോഷങ്ങളെ പൂർണ്ണമായും ശമിപ്പിക്കാനും നെല്ലിക്കയോളം പോന്ന മറ്റൊരു പ്രകൃതിദത്ത മരുന്നില്ല. വിറ്റാമിൻ സി ധാരാളമായി അടങ്ങിയിട്ടുള്ള നെല്ലിക്ക ദഹനനാളത്തിലെ വിഷാംശങ്ങളെ പുറന്തള്ളാൻ സഹായിക്കുന്നു. ആമാശയത്തിലെ പിഎച്ച് ലെവൽ കൃത്യമായി നിലനിർത്താനും നെഞ്ചെരിച്ചിലിന് പെട്ടെന്ന് ശമനം നൽകാനും നെല്ലിക്കയ്ക്ക് കഴിയും. ആയുർവേദത്തിൽ ദഹനക്കേടിനും നെഞ്ചെരിച്ചിലിനും പ്രതിവിധിയയായി നെല്ലിക്ക ലേഹ്യം, നെല്ലിക്കപ്പൊടി എന്നിവ പരമ്പരാഗതമായി നിർദ്ദേശിച്ചു വരുന്നു.
ഏലയ്ക്ക
ഏലയ്ക്ക അതിന്റെ സുഗന്ധത്തിന് മാത്രമല്ല, മികച്ച ഔഷധ ഗുണങ്ങൾക്കും പേരുകേട്ട സുഗന്ധവ്യഞ്ജനമാണ്. ആയുർവേദ പ്രകാരം ശരീരത്തിന് തണുപ്പ് നൽകാനും ദഹനരസങ്ങൾ ക്രമീകരിക്കാനും ഏലയ്ക്കയ്ക്ക് കഴിയും. ഇത് വയറ്റിലെ അധിക ആസിഡ് ഉൽപാദനത്തെ തടയുകയും ദഹനപ്രക്രിയ കൂടുതൽ സുഗമമാക്കുകയും ചെയ്യുന്നു. അസിഡിറ്റി മൂലം സാധാരണയായി കണ്ടുവരാറുള്ള വായിലെ കയ്പ്പ് രസം, ഓക്കാനം, തലകറക്കം എന്നിവ ഇല്ലാതാക്കാൻ ഏലയ്ക്ക ചവച്ചു തിന്നുന്നത് കൊണ്ട് വളരെയെളുപ്പത്തിൽ സാധിക്കും.
ഭക്ഷണശൈലിയിൽ വരുത്തേണ്ട മാറ്റങ്ങൾ
വീട്ടുവൈദ്യങ്ങൾ താൽക്കാലികമായി ആശ്വാസം നൽകുമെങ്കിലും അസിഡിറ്റിയുടെ യഥാർത്ഥ കാരണങ്ങൾ കണ്ടെത്തി അവ ഒഴിവാക്കുക എന്നതാണ് പ്രാധാന്യമർഹിക്കുന്നത്. ഇതിനായി ഭക്ഷണശൈലിയിൽ ചില കർശന നിയന്ത്രണങ്ങൾ ആവശ്യമാണ്. എരിവ്, പുളി, ഉപ്പ് എന്നിവ അമിതമായി അടങ്ങിയതും മസാലകൾ നിറഞ്ഞതുമായ ഭക്ഷണങ്ങൾ പരമാവധി കുറയ്ക്കേണ്ടതാണ്. മാത്രമല്ല മാസങ്ങളോളം തുടരുകയാണെങ്കിൽ വിദഗ്ധ ഡോക്ടറുടെ ചികിത്സ തേടുകയും വേണം.
Click it and Unblock the Notifications
Sign in with Google