രാത്രിയിൽ ഉറക്കം കിട്ടാതെ ബുദ്ധിമുട്ടിലാണോ? ഇനി തലപുകയ്‌ക്കേണ്ട, ഈ ഭക്ഷണങ്ങൾ നിങ്ങളെ സഹായിക്കും!

Updated: Wednesday, March 18, 2026, 15:38 [IST]

രാജ്യത്തെ ആരോഗ്യ വിദഗ്‌ധർ ഉറക്കമില്ലായ്‌മ നേരിടുന്നവർക്ക് പ്രകൃതിദത്തമായ ഭക്ഷണരീതികൾ സഹായകമാവുമെന്ന് ചൂണ്ടിക്കാട്ടുന്നു. യുവാക്കൾക്ക് നല്ല ഉറക്കം കിട്ടാൻ, സാധാരണ ഇന്ത്യൻ ഭക്ഷണങ്ങൾ പയോഗിക്കാമെന്ന് ഇവർ പറയുന്നു. ഒരു പ്രത്യേക ഭക്ഷണക്രമം മാത്രം ഉറക്കമില്ലായ്‌മ പൂർണ്ണമായും മാറ്റുമെന്ന ധാരണയെ ഈ നിർദ്ദേശങ്ങൾ ചോദ്യം ചെയ്യുന്നു. ഡോക്‌ടർമാർ പറയുന്നതനുസരിച്ച്, വൈകി കഴിക്കുന്ന അത്താഴം, അമിതമായ ലഘുഭക്ഷണങ്ങൾ, കാപ്പി എന്നിവയെല്ലാം മോശം ഉറക്കത്തിന് കാരണമാകാറുണ്ട്. ട്രിപ്റ്റോഫാൻ, മഗ്നീഷ്യം, മെലാറ്റോണിൻ പോലുള്ള പോഷകങ്ങൾ ഉറക്കചക്രത്തെ സഹായിക്കുന്നുണ്ട്.

കൃത്യസമയത്തുള്ള ഭക്ഷണം, രക്തത്തിലെ പഞ്ചസാരയുടെ സ്ഥിരത, ലളിതമായ രാത്രിഭക്ഷണം എന്നിവ തലച്ചോറിനെ വിശ്രമസമയത്തേക്ക് മാറ്റാൻ സഹായിക്കും. ചൂടുപാൽ, ബദാം, വാൽനട്ട്, വാഴപ്പഴം, ഓട്സ്, മത്തങ്ങ വിത്തുകൾ, എന്നിവയാണ് പ്രധാനമായും നിർദ്ദേശിക്കുന്ന ചില പ്രകൃതിദത്ത ഭക്ഷണങ്ങൾ. എളുപ്പത്തിൽ ലഭ്യമാവുന്നതും വില കുറഞ്ഞതുമായ ഈ ഇന്ത്യൻ വിഭവങ്ങളിൽ പ്രോട്ടീൻ, സങ്കീർണ്ണ കാർബോഹൈഡ്രേറ്റ്, ആരോഗ്യകരമായ കൊഴുപ്പുകൾ, ഉറക്കത്തെ ശാന്തമാക്കുന്ന ധാതുക്കൾ എന്നിവ അടങ്ങിയിരിക്കുന്നു.

ഉറങ്ങുന്നതിന് മുമ്പ് ചൂടുപാൽ കുടിക്കുന്നത് ഒരു പഴയ ശീലമാണ്. സെറോടോണിനും മെലാറ്റോണിനും ഉണ്ടാക്കുന്നതിന് സഹായിക്കുന്ന ട്രിപ്റ്റോഫാൻ പാലിലുണ്ട്. ഒരു നുള്ള് മഞ്ഞളോ ജാതിക്കയോ ചേർക്കുന്നത് കൂടുതൽ സുഖം നൽകിയേക്കാം. പഞ്ചസാര ചേർക്കുന്നത് ഒഴിവാക്കണമെന്നും, ഉറങ്ങുന്നതിന് ഒരു മണിക്കൂർ മുമ്പെങ്കിലും പാൽ കുടിക്കണമെന്നും ഡോക്ടർമാർ നിർദ്ദേശിക്കുന്നു.

മഗ്നീഷ്യം, പ്രോട്ടീൻ, നല്ല കൊഴുപ്പുകൾ എന്നിവയാൽ സമ്പുഷ്‌ടമാണ് ബദാമും വാൽനട്ടും. വാൽനട്ടിൽ പ്രകൃതിദത്തമായ മെലാറ്റോണിനും അടങ്ങിയിട്ടുണ്ട്. വൈകുന്നേരങ്ങളിൽ ഒരു ചെറിയ പിടി കഴിക്കുന്നത് നല്ലതാണെന്ന് ആരോഗ്യ വിദഗ്‌ധർ പറയുന്നു; അമിതമായി കഴിക്കരുത്. ഉറങ്ങുന്നതിന് തൊട്ടുമുമ്പ് നട്‌സ് അധികം കഴിക്കുന്നത് വയറിന് ഭാരമുണ്ടാക്കാനും ഉറക്കം നഷ്‌ടപ്പെടുത്താനും സാധ്യതയുണ്ട്.

വാഴപ്പഴത്തിലും ഓട്‌സിലും സങ്കീർണ്ണ കാർബോഹൈഡ്രേറ്റുകളും നാരുകളും ധാരാളമുണ്ട്. ഇവ രാത്രിയിൽ രക്തത്തിലെ പഞ്ചസാരയുടെ അളവ് പെട്ടെന്ന് കുറയുന്നത് തടയാൻ സഹായിക്കും. വാഴപ്പഴത്തിലെ വിറ്റാമിൻ ബി6 ട്രിപ്റ്റോഫാൻ ഉപയോഗിക്കാൻ ശരീരത്തെ സഹായിക്കുന്നു. ഓട്‌സും മെലാറ്റോണിന്റെ ഒരു ചെറിയ ഉറവിടമാണ്. ഇവ രണ്ടും രാത്രിയിലെ ലഘുഭക്ഷണത്തിൽ ഉൾപ്പെടുത്തുന്നതാണ് ഏറ്റവും ഉത്തമം.

മത്തങ്ങ വിത്തുകളും വറുത്ത മഖാനയും ലഘുഭക്ഷണങ്ങളായി നിർദ്ദേശിക്കുന്നു. മത്തങ്ങ വിത്തുകളിൽ മഗ്നീഷ്യം, സിങ്ക്, ട്രിപ്റ്റോഫാൻ എന്നിവയുണ്ട്. മഖാനയിൽ കൊഴുപ്പ് കുറവും ദഹിക്കാൻ എളുപ്പവുമാണ്. അമിതമായി ഉപ്പും നെയ്യുമില്ലാതെ, ചെറിയൊരു പാത്രം വറുത്ത മഖാന വൈകുന്നേരങ്ങളിൽ ചിപ്‌സിന് പകരമായി ഉപയോഗിക്കാം.

രാത്രിഭക്ഷണം ലളിതമാക്കാനും നേരത്തെ കഴിക്കാനും ആരോഗ്യ പ്രവർത്തകർ നിർദ്ദേശിക്കുന്നു. കൃത്യമായ ഉറക്കസമയം പാലിക്കുക, മങ്ങിയ വെളിച്ചം ഉപയോഗിക്കുക, ഉറങ്ങുന്നതിന് മുമ്പ് മൊബൈൽ ഫോൺ പോലുള്ള സ്ക്രീനുകൾ ഒഴിവാക്കുക എന്നിവയും പ്രധാനമാണ്. കാപ്പി, എനർജി ഡ്രിങ്കുകൾ, രാത്രിയിലെ എരിവുള്ള ഭക്ഷണം എന്നിവ കുറയ്ക്കണം. ഈ ഭക്ഷണങ്ങൾ ശാന്തമായ ഒരു ദിനചര്യയുടെ ഭാഗമാകുമ്പോൾ മികച്ച ഫലം നൽകും. ഭക്ഷണരീതിയിലെ മാറ്റങ്ങൾ വൈദ്യോപദേശത്തിന് പകരമാവില്ലെന്ന് ഡോക്‌ടർമാർ മുന്നറിയിപ്പ് നൽകുന്നു.

ദീർഘകാലമായുള്ള ഉറക്കമില്ലായ്‌മ, വിഷാദം, അമിതമായ കൂർക്കംവലി എന്നിവയുള്ളവർ കൃത്യമായ വൈദ്യപരിശോധന നടത്തണം. നട്‌സ് അലർജിയോ ലാക്ടോസ് അസഹിഷ്‌ണുതയോ ഉള്ളവർ അപകടകരമായ ഭക്ഷണങ്ങൾ ഒഴിവാക്കണം. പ്രകൃതിദത്തമായ ഭക്ഷണങ്ങൾ ഉറക്കത്തെ പിന്തുണയ്ക്കാൻ സഹായിക്കുമെങ്കിലും, പൂർണമായ ചികിത്സ ഉറപ്പുനൽകുന്നില്ലെന്ന് വിദഗ്‌ധർ ഓർമ്മിപ്പിക്കുന്നു.