കണ്ണേ കൺമണിയേ...; ഈ പഴങ്ങൾ കഴിച്ചാൽ നിങ്ങളുടെ കാഴ്ച കൂടുന്നത് അനുഭവിച്ചറിയാം! ഏതൊക്കെ?
കണ്ണുകളുടെ ആരോഗ്യം വളരെ പ്രധാനപ്പെട്ട ഒരു കാര്യമാണ്. പലരും അതിനെ കുറിച്ച് ചിന്തിച്ചു തുടങ്ങുന്നത് അതിനെ മോശമായി ബാധിച്ചു തുടങ്ങുന്ന കാര്യങ്ങൾ പ്രകടമായി വരുമ്പോൾ മാത്രമാണ്. അത്തരത്തിൽ കണ്ണുകളെ നല്ല രീതിയിൽ സംരക്ഷിച്ചു നിർത്താൻ എന്തൊക്കെ ചെയ്യണമെന്ന് ചോദിച്ചാൽ ഉത്തരങ്ങൾ പലതുണ്ട്. ഇന്നത്തെ കാലത്ത് ചെറുപ്പക്കാർക്ക് പോലും സ്ക്രീൻ ടൈം അധികമായതിനാൽ കണ്ണുകൾക്ക് പെട്ടെന്ന് ഓരോ പ്രശ്നങ്ങൾ ഉണ്ടാവാൻ സാധ്യതയുണ്ട്.
അതിനെ മറികടക്കാൻ കഴിവതും ഭക്ഷണത്തിലൂടെയും ജീവിതശൈലിയിലൂടെയും തന്നെ ശ്രമിച്ചാൽ അത് സാധിക്കുന്നതാണ്. അതിനായി നമ്മൾ ആദ്യം വേണ്ടത് ഫോൺ ഉപയോഗം കുറയ്ക്കുകയും കണ്ണുകളുടെ ആരോഗ്യത്തെ സഹായിക്കുന്ന പഴങ്ങൾ പോലെയുള്ളവ കൂടുതലായി കഴിക്കുകയുമാണ്. അതിനായി ഒരുപാട് ദൂരമൊന്നും നിങ്ങൾ അലയേണ്ടതില്ല. നമുക്ക് ചുറ്റും ഒന്ന് കണ്ണോടിച്ചാൽ അതിനുള്ള പ്രതിവിധി നമുക്ക് ലഭിക്കും.
കണ്ണിന്റെ ആരോഗ്യത്തിന് ഗുണം ചെയ്യുന്ന വിവിധതരം പഴങ്ങൾ ധാരാളമായി ലഭിക്കുന്ന നാടാണ് നമ്മുടേത്. ഈ പഴങ്ങളിൽ വിറ്റാമിനുകളും ആന്റിഓക്സിഡന്റുകളും ധാരാളമായി അടങ്ങിയിട്ടുണ്ട്, ഇത് നല്ല കാഴ്ച നിലനിർത്താനും കണ്ണുമായി ബന്ധപ്പെട്ട ബുദ്ധിമുട്ടുകൾ തടയാനും നമ്മെ സഹായിക്കുന്നു. കൂടാതെ കുറഞ്ഞ വിലയിൽ നമ്മുടെ നാട്ടിൽ ലഭിക്കുന്ന ഈ പഴങ്ങൾക്ക് അല്ലാതെയുള്ള ആരോഗ്യ ഗുണങ്ങളും നമുക്ക് നൽകാൻ കഴിയും.
ഓറഞ്ച്: കണ്ണുകളുടെ ആരോഗ്യത്തിന് അത്യാവശ്യമായ പോഷകമായ വിറ്റാമിൻ സി ഓറഞ്ചിൽ അടങ്ങിയിട്ടുണ്ട്. തിമിരത്തിനും പ്രായവുമായി ബന്ധപ്പെട്ട മാക്കുലാർ ഡീജനറേഷനും സാധ്യത കുറയ്ക്കാൻ ഈ വിറ്റാമിൻ സഹായിക്കുന്നു. ഓറഞ്ച് പതിവായി കഴിക്കുന്നത് കണ്ണുകളുടെ മൊത്തത്തിലുള്ള പ്രവർത്തനത്തെ നല്ല രീതിയിൽ സഹായിക്കും.
മാമ്പഴം: പഴങ്ങളുടെ രാജാവ് എന്നറിയപ്പെടുന്ന മാമ്പഴത്തിൽ വിറ്റാമിൻ എ ധാരാളം അടങ്ങിയിട്ടുണ്ട്. നല്ല കാഴ്ചശക്തി നിലനിർത്തുന്നതിനും നിശാന്ധത തടയുന്നതിനും ഈ വിറ്റാമിൻ നിർണായകമായ ഒന്നാണ്. നിങ്ങളുടെ ഭക്ഷണത്തിൽ മാമ്പഴം ഉൾപ്പെടുത്തുന്നത് കാഴ്ച വ്യക്തത വർധിപ്പിക്കാൻ ഉതകുന്നതാണ്. മാത്രമല്ല ഇത് നമ്മുടെ നാട്ടിൽ സുലഭമായി ലഭിക്കുകയും ചെയ്യും.
പപ്പായ: പപ്പായയിൽ ബീറ്റാ കരോട്ടിൻ ധാരാളമായി അടങ്ങിയിട്ടുണ്ട്, ഇത് ശരീരത്തിൽ എത്തുമ്പോൾ വിറ്റാമിൻ എ ആയി മാറുന്നു. ഈ പോഷകം ആരോഗ്യകരമായ കാഴ്ചയെ പിന്തുണയ്ക്കുകയും എഎംഡി വികസിപ്പിക്കാനുള്ള സാധ്യത കുറയ്ക്കുകയും ചെയ്യുന്നു. കണ്ണുകളെ കേടുപാടുകളിൽ നിന്ന് സംരക്ഷിക്കുന്ന മറ്റ് ആന്റിഓക്സിഡന്റുകളും പപ്പായയിൽ ധാരാളമായി അടങ്ങിയിട്ടുണ്ട്.
പേരയ്ക്ക: വിറ്റാമിൻ സിയുടെ മറ്റൊരു മികച്ച ഉറവിടമാണ് പേരയ്ക്ക. ഓക്സിഡേറ്റീവ് സമ്മർദ്ദത്തിൽ നിന്ന് സംരക്ഷിക്കുന്നതിലൂടെ കണ്ണിന്റെ ആരോഗ്യം മെച്ചപ്പെടുത്താൻ ഇവ നമ്മളെ സഹായിക്കുന്നു. പേരയ്ക്ക പതിവായി കഴിക്കുന്നത് മികച്ച കാഴ്ചയ്ക്കും നേത്രരോഗ സാധ്യത കുറയ്ക്കുന്നതിനും സഹായിക്കും. പലതരം വകഭേദങ്ങൾ ഉള്ള പേരയ്ക്ക നമ്മുടെ നാട്ടിൽ ധാരാളമായി ലഭിക്കുന്നതും വില കുറവുള്ളതുമായ ഒരു പഴമാണ്.
കിവി: കണ്ണിന്റെ ആരോഗ്യത്തിന് ഗുണം ചെയ്യുന്ന രണ്ട് ആന്റിഓക്സിഡന്റുകളായ ല്യൂട്ടിൻ, സിയാക്സാന്തിൻ എന്നിവയാൽ കിവി പഴം സമ്പന്നമാണ്. ഈ സംയുക്തങ്ങൾ ദോഷകരമായ നീല വെളിച്ചം ഫിൽട്ടർ ചെയ്യാനും എഎംഡിയിൽ നിന്ന് സംരക്ഷിക്കാനും സഹായിക്കുന്നു. കിവി കഴിക്കുന്നത് കണ്ണുകളുടെ ആരോഗ്യം പ്രോത്സാഹിപ്പിക്കും. ആള് വിദേശിയാണെങ്കിലും ഇന്ത്യയിൽ എല്ലായിടത്തും ഇത് ലഭ്യമാവും.
ഡിസ്ക്ലെയിമർ- ഗൂഗിളിൽ നിന്നും ലഭിച്ച വിവരങ്ങളുടെ അടിസ്ഥാനത്തിൽ തയ്യാറാക്കിയതാണ് ഈ ലേഖനം. വൺഇന്ത്യ മലയാളത്തിന് ഇത് സംബന്ധിച്ച് ശാസ്ത്രീയ അറിവുകൾ ഇല്ല. അതിനാൽ ഇവ പിന്തുടരുന്നതിന് മുൻപ് ആരോഗ്യവിദഗ്ധരുടെ ഉപദേശം സ്വീകരിക്കണം.
Click it and Unblock the Notifications
Sign in with Google