സൺസ്ക്രീൻ ഉപയോഗിച്ചാൽ കാൻസർ സാധ്യത കൂടുമോ? വേനൽച്ചൂടിൽ ഇത് ഉപയോഗിച്ചാൽ ഗുണങ്ങൾ എന്തൊക്കെ?
കടുത്ത വേനൽചൂടിലൂടെയാണ് നാമെല്ലാം കടന്നുപോവുന്നത്. പുറത്തിറങ്ങാൻ കഴിയാത്ത അത്രയും ശക്തമായ വെയിലും ചൂടുമൊക്കെയാണ് പലയിടത്തും അനുഭവപ്പെടുന്നത്. വീടിനകത്ത് ആയാലും ചൂടിന് ഒട്ടും ശമനമില്ല. സംസ്ഥാനത്ത് പലയിടത്തും അൾട്രാവയലറ്റ് രശ്മികളുടെ തോത് അപകടകരമായ തോതിൽ വളർന്നിരിക്കുകയാണ്. ഇക്കാരണത്താൽ തന്നെ നമ്മൾ വളരെയധികം ശ്രദ്ധിക്കേണ്ട പരിതസ്ഥിതിയാണ് നിലവിലുള്ളത്.
വീടിന് വെളിയിൽ ഇറങ്ങുമ്പോൾ പരമാവധി ശരീരഭാഗങ്ങൾ മറച്ചുകൊണ്ട് ഇറങ്ങുന്നതാവും ഉചിതം. എന്നാൽ അതിന് മാത്രം നമ്മെ സംരക്ഷിക്കാൻ കഴിയുമോ എന്ന് ചോദിച്ചാൽ ഇല്ലെന്നാവും ഉത്തരം. അങ്ങനെയുള്ളപ്പോൾ എന്താണ് അതിനെ മറികടക്കാനുള്ള മാർഗം എന്നാവും നാം ചിന്തിക്കുക. പ്രധാനമായും നമ്മളൊക്കെ ഉപയോഗിക്കുന്ന സൺസ്ക്രീൻ തന്നെയാണ് കഠിനമായ വെയിലിൽ നിന്ന് നമ്മുടെ ചർമ്മത്തെ സംരക്ഷിക്കാനുള്ള മാർഗം.
ഇത്രയൊക്കെ ആണെങ്കിൽ കാലങ്ങളായി ഈ സൺസ്ക്രീനിനെ കുറിച്ച് ഒട്ടേറെ പ്രചാരണങ്ങൾ നാം കേട്ട് വരുന്നുണ്ട്. അതിൽ ഗുരുതരമായ ആരോപണങ്ങൾ വരെയുണ്ടെന്നതാണ് പ്രത്യേകത. അതുകൊണ്ട് തന്നെ സൺസ്ക്രീൻ ഉപയോഗിക്കാൻ പലരും മടിക്കുന്നു. സൺസ്ക്രീനിനെതിരായ തെറ്റായ പ്രചാരണങ്ങൾ എന്തൊക്കെ ആണെന്നും അതിലെ യാഥാർഥ്യം എന്തെന്നും അറിയാം.
വേനൽക്കാലത്ത് മാത്രമാണ് സൺസ്ക്രീൻ വേണ്ടതെന്നാണ് പൊതുവെ നാം കേട്ടിട്ടുള്ളത്. എന്നാൽ അതല്ല യാഥാർഥ്യം. മഴക്കാലത്തു ആയാലും, മേഘങ്ങൾ അൾട്രാവയലറ്റ് രശ്മികളെ തടയുന്നില്ല, അവ ഇപ്പോഴും അന്തരീക്ഷത്തിലേക്ക് തുളച്ചുകയറുകയും ചർമ്മത്തിനെ കേടുവരുത്തുകയും ചെയ്യും. കാലാവസ്ഥ എന്തുതന്നെയായാലും, ദോഷകരമായ അൾട്രാവയലറ്റ് വികിരണങ്ങളിൽ നിന്ന് ചർമ്മത്തെ സംരക്ഷിക്കുന്നതിന് സൺസ്ക്രീൻ കൂടിയേ തീരൂ.
ദിവസം ഒരിക്കൽ മാത്രമേ സൺസ്ക്രീൻ ഉപയോഗിക്കാവൂ എന്നതിലും കഴമ്പില്ല. ഈ തെറ്റിദ്ധാരണ സൺസ്ക്രീനിന്റെ ഫലം തന്നെ ഇല്ലാതാക്കും. പരമാവധി സംരക്ഷണം ഉറപ്പാക്കാൻ, സൂര്യപ്രകാശം, വിയർപ്പ്, ജല സമ്പർക്കം എന്നിവയെ ആശ്രയിച്ച്, കൃത്യമായ ഇടവേളകളിൽ സൺസ്ക്രീൻ വീണ്ടും പുരട്ടണമെന്നാണ് ചർമ്മ വിദഗ്ധർ ആവശ്യപ്പെടുന്നത്.
ഇക്കൂട്ടത്തിലെ ഏറ്റവും വലിയ പ്രചാരണമാണ് സൺസ്ക്രീൻ കാൻസറിന് കാരണമാവും എന്നത്. ഈ പൊതു തെറ്റിദ്ധാരണ തികച്ചും തെറ്റാണ്. വാസ്തവത്തിൽ, സൺസ്ക്രീനുകൾ അൾട്രാവയലറ്റ് രശ്മികളുടെ എക്സ്പോഷർ മൂലമുണ്ടാകുന്ന മെലനോമയും മറ്റ് ചർമ്മ കാൻസറുകളും തടയാൻ സഹായിക്കുന്നു എന്നതാണ് സത്യം.
വളരെ കുറച്ച് അളവിൽ മാത്രം സൺസ്ക്രീൻ പുരട്ടുന്ന പ്രവണതയും നമ്മുടെ നാട്ടിൽ കണ്ടു വരുന്നുണ്ട്. മിക്ക ആളുകളും ആവശ്യത്തിന് സൺസ്ക്രീൻ ഉപയോഗിക്കാറില്ല. അതുകൊണ്ട് തന്നെ അവയുടെ ഫലപ്രാപ്തി കുറയുകയും ചെയ്യും. മികച്ച സംരക്ഷണത്തിനായി, മുഖത്തും കഴുത്തിലും ഒരു ടീസ്പൂൺ സൺസ്ക്രീൻ പുരട്ടേണ്ടതുണ്ട്.
ഡിസ്ക്ലെയിമർ- ഗൂഗിളിൽ നിന്നും ലഭിച്ച വിവരങ്ങളുടെ അടിസ്ഥാനത്തിൽ തയ്യാറാക്കിയതാണ് ഈ ലേഖനം. വൺഇന്ത്യ മലയാളത്തിന് ഇത് സംബന്ധിച്ച് ശാസ്ത്രീയ അറിവുകൾ ഇല്ല. അതിനാൽ ഇവ പിന്തുടരുന്നതിന് മുൻപ് ആരോഗ്യവിദഗ്ധരുടെ ഉപദേശം സ്വീകരിക്കണം.
Click it and Unblock the Notifications
Sign in with Google