ചർമ്മത്തിന്റെ ആരോഗ്യത്തിന് വിറ്റാമിൻ സി നിർബന്ധം; ഈ പഴങ്ങൾ കഴിച്ചാൽ എളുപ്പം ലഭിക്കും, ഏതൊക്കെ?
ചർമ്മത്തിന്റെ ആരോഗ്യത്തിനും പൊതുവായ ക്ഷേമത്തിനും വിറ്റാമിൻ സി സമ്പന്നമായ പഴങ്ങൾ ലളിതവും ഫലപ്രദവുമായ മാർഗമാണ്. ഇന്ത്യയിൽ, കുറഞ്ഞ ചിലവിൽ ഉയർന്ന അളവിൽ വിറ്റാമിൻ സി നൽകുന്ന നിരവധി പ്രാദേശിക പഴങ്ങളുണ്ട്. വിദ്യാർത്ഥികൾക്കും യുവാക്കൾക്കും താങ്ങാനാവുന്ന അത്തരം പത്ത് ഫലങ്ങളെക്കുറിച്ചുള്ള വിവരണം താഴെ നൽകുന്നു.
വിറ്റാമിൻ സി ശരീരത്തിലെ കൊളാജൻ ഉൽപ്പാദനത്തെ സഹായിക്കുന്നതിനൊപ്പം ചർമ്മത്തെ കേടുപാടുകളിൽ നിന്ന് സംരക്ഷിക്കുകയും ചെയ്യുന്നു. കൂടാതെ ഇത് പ്രതിരോധശേഷി വർദ്ധിപ്പിക്കുകയും ഇരുമ്പ് ആഗിരണം ചെയ്യുന്നതിനെ പിന്തുണയ്ക്കുകയും ചെയ്യും. നമ്മുടെ ശരീരം വിറ്റാമിൻ സി സംഭരിക്കാത്തതിനാൽ, ദിനംപ്രതി ഇതിന്റെ ഉപയോഗം അത്യാവശ്യമാണ്. എളുപ്പത്തിൽ ലഭ്യമാകുന്ന ഈ പഴങ്ങൾ ശുപാർശ ചെയ്യുന്ന ദിവസേനയുള്ള അളവുകൾ നിലനിർത്താൻ സഹായിക്കും.
ഏതൊക്കെ പഴങ്ങൾ?
ഇന്ത്യൻ വിപണികളിൽ സാധാരണയായി കണ്ടുവരുന്ന പത്ത് പഴങ്ങളാണ് ഇവ. സീസണിനും നഗരത്തിനും അനുസരിച്ച് വിലയിൽ വ്യത്യാസമുണ്ടാകാമെങ്കിലും, ഇറക്കുമതി ചെയ്യുന്ന മിക്ക പഴങ്ങളെക്കാളും ഇവയ്ക്ക് സാധാരണയായി വില കുറവായിരിക്കും. ഇവ അസംസ്കൃതമായി കഴിക്കാനും സാലഡുകൾ, ജ്യൂസുകൾ, ലളിതമായ വീട്ടുവഭവങ്ങൾ എന്നിവയിൽ ഉപയോഗിക്കാനും കഴിയും.
വിലകുറഞ്ഞ ഫലങ്ങളിൽ ഒന്നാണ് പേരയ്ക്ക (ഓരോ 100 ഗ്രാമിലും 200-230 മില്ലിഗ്രാം വിറ്റാമിൻ സി). നാരുകൾ ധാരാളമുള്ള ഇത് ഉപ്പും മുളകും ചേർത്ത് കഴിക്കാൻ പലരും ഇഷ്ടപ്പെടുന്നു. ഇന്ത്യൻ നെല്ലിക്കയും (ആംല) വിറ്റാമിൻ സിയുടെ മികച്ച ഉറവിടമാണ് (ഓരോ 100 ഗ്രാമിലും 250-300 മില്ലിഗ്രാം). അച്ചാറുകൾ, മുരബ്ബ, ഫ്രഷ് ജ്യൂസ്, ച്യവനപ്രാശം എന്നിവയിൽ നെല്ലിക്ക വ്യാപകമായി ഉപയോഗിക്കുന്നു.
മിക്ക ഇന്ത്യൻ നഗരങ്ങളിലും പപ്പായ (ഓരോ 100 ഗ്രാമിലും 55-60 മില്ലിഗ്രാം വിറ്റാമിൻ സി) താങ്ങാനാവുന്ന വിലയ്ക്ക് ലഭ്യമാണ്. വിറ്റാമിൻ എയും നാരുകളുമടങ്ങിയ ഇത് ദഹനത്തിനായി പ്രാതലിന് കഴിക്കുന്നവരുണ്ട്. ഓറഞ്ചും (ഓരോ 100 ഗ്രാമിലും 45-50 മില്ലിഗ്രാം വിറ്റാമിൻ സി) മൊസമ്പിയും (ഓരോ 100 ഗ്രാമിലും 30-40 മില്ലിഗ്രാം വിറ്റാമിൻ സി) തണുപ്പുകാലത്തെ പ്രിയപ്പെട്ട പഴങ്ങളാണ്. ഇവയുടെ ജ്യൂസ് വഴിയോര കച്ചവടക്കാർക്കിടയിലും കഫേകളിലും സുലഭവുമാണ്.
നാരങ്ങ (ഓരോ 100 ഗ്രാമിലും 45-55 മില്ലിഗ്രാം വിറ്റാമിൻ സി) ഇന്ത്യൻ വീടുകളിൽ നിത്യോപയോഗമാണ്. വെള്ളത്തിൽ നാരങ്ങ പിഴിഞ്ഞൊഴിക്കുന്നത് ഭക്ഷണത്തിൽ വിറ്റാമിൻ സി കൂട്ടും. നിമ്പു പാനി, ചാട്ട്, മാരിനേഡുകൾ എന്നിവയിൽ ഇത് ഉപയോഗിക്കുന്നു. പൈനാപ്പിൾ (ഓരോ 100 ഗ്രാമിലും 45-50 മില്ലിഗ്രാം വിറ്റാമിൻ സി) അല്പം വില കൂടുതലാണെങ്കിലും പല വിപണികളിലും ഇടത്തരം നിരക്കിൽ ലഭ്യമാണ്. സാലഡുകളിൽ ഇത് മികച്ചൊരു രുചി നൽകുന്നു.
സ്ട്രോബെറി (ഓരോ 100 ഗ്രാമിലും 55-60 മില്ലിഗ്രാം വിറ്റാമിൻ സി) ഒരു സീസണൽ ഫലമാണ്. ഉത്പാദന മേഖലകളിൽ ഇവയ്ക്ക് വിലക്കുറവുണ്ടാകും. ഇത് മധുരപലഹാരങ്ങൾക്ക് മികച്ചൊരു പകരക്കാരനാണ്. മാമ്പഴത്തിൽ (ഓരോ 100 ഗ്രാമിലും 25-35 മില്ലിഗ്രാം വിറ്റാമിൻ സി) വിറ്റാമിൻ സിയും ബീറ്റാ കരോട്ടീനും ഉണ്ട്. പഴുത്ത മാങ്ങയിൽ കാലറി കൂടുതലെങ്കിലും വേനൽക്കാലത്ത് പലരും ഇത് മിതമായ അളവിൽ ആസ്വദിക്കാറുണ്ട്.
ഇവിടെ പട്ടികപ്പെടുത്തിയിട്ടുള്ള മിക്ക പഴങ്ങളെക്കാളും വിലകൂടിയതാണ് കിവി (ഓരോ 100 ഗ്രാമിലും 80-90 മില്ലിഗ്രാം വിറ്റാമിൻ സി). എന്നിരുന്നാലും, ഉയർന്ന വിറ്റാമിൻ സി ഉള്ളടക്കം കാരണം പലരും ഇത് തിരഞ്ഞെടുക്കാറുണ്ട്. യുവാക്കൾ കിവി വിലകുറഞ്ഞ മറ്റ് പഴങ്ങളുമായി ചേർത്ത് കഴിക്കാറുണ്ട്. ഇത് വിറ്റാമിൻ സി ലഭ്യത നിലനിർത്തിക്കൊണ്ട് ചെലവ് നിയന്ത്രിക്കാൻ സഹായിക്കും.
മികച്ച ചർമ്മത്തിനും ആരോഗ്യത്തിനും വ്യത്യസ്തതരം പഴങ്ങൾ കഴിക്കുന്നത് പ്രയോജനകരമാണ്. ആഴ്ചയിൽ രണ്ടോ മൂന്നോ പഴങ്ങൾ മാറിമാറി കഴിക്കുന്നത് നല്ലതാണ്. വിറ്റാമിൻ സി അടങ്ങിയ പഴങ്ങൾ ഇരുമ്പ് ചേർന്ന ഭക്ഷണങ്ങളോടൊപ്പം കഴിക്കുന്നത് പോഷകങ്ങൾ ആഗിരണം ചെയ്യാൻ സഹായിക്കും. ഭക്ഷണക്രമത്തിൽ വലിയ മാറ്റങ്ങൾ വരുത്തും മുമ്പ്, രോഗാവസ്ഥകളുള്ളവർ ഒരു ഡോക്ടറെയോ ഡയറ്റീഷ്യനെയോ സമീപിക്കുന്നത് ഉചിതമാണ്.
Click it and Unblock the Notifications
Sign in with Google