ബോക്‌സ് ഓഫീസിൽ ജോർജ് കുട്ടിയുടെ തേരോട്ടം; 100 കോടിയിലേക്ക് കുതിച്ച് ദൃശ്യം 3, വാഴയെ വീഴ്ത്തുമോ?

മോഹൻലാൽ-ജീത്തു ജോസഫ് കൂട്ടുകെട്ടിൽ പുറത്തിറങ്ങിയ ക്രൈം ത്രില്ലർ ചിത്രം 'ദൃശ്യം 3' റിലീസ് ചെയ്‌ത്‌ ആദ്യ ദിനം തന്നെ ആഗോള ബോക്‌സ് ഓഫീസിൽ മികച്ച പ്രകടനം കാഴ്ച്ചവെച്ച് 100 കോടി ക്ലബ്ബിലേക്ക് കുതിക്കുകയാണ്. മെയ് 21-നാണ് ചിത്രം ലോകമെമ്പാടുമുള്ള തിയേറ്ററുകളിൽ എത്തിയത്. മലയാള സിനിമയുടെ ചരിത്രത്തിലെ ഏറ്റവും വലിയ ആഗോള ഓപ്പണിംഗുകളിൽ ഒന്നാണിത്.

ട്രേഡ് ട്രാക്കർമാരുടെ റിപ്പോർട്ടുകൾ പ്രകാരം, ആദ്യ ദിനം ഏകദേശം 43.37 കോടി രൂപയുടെ ആഗോള ഗ്രോസ് കളക്ഷനാണ് ചിത്രം നേടിയത്. ഇതിൽ ഇന്ത്യയിൽ നിന്ന് മാത്രം 18.37 കോടി രൂപയും വിദേശ മാർക്കറ്റുകളിൽ നിന്ന് ഏകദേശം 25 കോടി രൂപയും ലഭിച്ചു. ഇത് മലയാളികൾക്കിടയിലും മറ്റ് ദക്ഷിണേഷ്യൻ പ്രേക്ഷകർക്കിടയിലും 'ദൃശ്യം' ഫ്രാഞ്ചൈസിക്കുള്ള വലിയ സ്വീകാര്യതയാണ് വ്യക്തമാക്കുന്നത്.

നിരവധി ട്രേഡ് റിപ്പോർട്ടുകൾ അനുസരിച്ച്, മലയാള സിനിമയുടെ ചരിത്രത്തിലെ രണ്ടാമത്തെ വലിയ ആഗോള ഓപ്പണിംഗ് കളക്ഷനാണ് 'ദൃശ്യം 3' സ്വന്തമാക്കിയത്. മുൻപത്തെ ഏറ്റവും വലിയ മലയാളം ഓപ്പണിംഗ് ചിത്രമായ എമ്പുരാന് പിന്നിലാണ് ഇതിന്റെ സ്ഥാനം. അടുത്തിടെ വലിയ ഹൈപ്പോടെ ഇറങ്ങിയ പാട്രിയറ്റ് അടക്കമുള്ള ചിത്രങ്ങളെ ഇത് മറികടന്നു.

വളരെ ശക്തമായ അഡ്വാൻസ് ബുക്കിംഗോടെയാണ് 'ദൃശ്യം 3' റിലീസിനെത്തിയത്. ആദ്യ ദിനത്തിലെ പ്രീ-സെയിൽസ് മാത്രം ഏകദേശം 33-35 കോടി രൂപയിലെത്തിയെന്ന് വ്യവസായ വൃത്തങ്ങൾ സൂചിപ്പിക്കുന്നു. കേരളം, മറ്റ് ദക്ഷിണേന്ത്യൻ സംസ്ഥാനങ്ങൾ, ഗൾഫ് രാജ്യങ്ങളിലെ വലിയ മലയാളി സമൂഹങ്ങൾ എന്നിവിടങ്ങളിൽ ഉടനീളം ഈ ശക്തമായ ബുക്കിംഗ് ട്രെൻഡ് ദൃശ്യമായി.

മലയാളം, തമിഴ്, തെലുങ്ക്, കന്നഡ തുടങ്ങിയ വിവിധ ഭാഷകളിലാണ് ചിത്രം റിലീസ് ചെയ്‌തത്. മുൻ ഭാഗങ്ങളെ അപേക്ഷിച്ച് വിശാലമായ ഈ റിലീസ്, കേരളത്തിന് പുറത്തുള്ള ആദ്യ ദിനത്തിലെ കളക്ഷൻ വർധിപ്പിക്കാൻ സഹായിച്ചു. ബെംഗളൂരു, ഹൈദരാബാദ്, ചെന്നൈ, മുംബൈ തുടങ്ങിയ പ്രധാന മെട്രോ നഗരങ്ങളിലെ തിയേറ്ററുകളിൽ ഉന്നത നിലവാരമുള്ള സ്ക്രീനുകളിൽ നിറഞ്ഞ സദസുകളുണ്ടായി.

100 കോടി നാഴികക്കല്ലിനരികിൽ

ആദ്യ വാരാന്ത്യത്തിലെ കണക്കുകൾ സൂചിപ്പിക്കുന്നത് സൂചിപ്പിക്കുന്നത്, 'ദൃശ്യം 3' അതിവേഗം 100 കോടി രൂപയുടെ ആഗോള കളക്ഷനിലേക്ക് നീങ്ങിക്കൊണ്ടിരിക്കുന്നു എന്നാണ്. ശനിയാഴ്‌ച അവസാനത്തോടെ ചിത്രം ഏകദേശം 90 കോടി രൂപയുടെ കളക്ഷനിൽ എത്തുമെന്ന് രണ്ടാം ദിനത്തിലെ ട്രേഡ് റിപ്പോർട്ടുകൾ പ്രവചിച്ചു.

വലിയ ചിത്രങ്ങൾക്ക് ഞായറാഴ്‌ച ബിസിനസ്സ് വർധിക്കുന്ന പതിവ് കണക്കിലെടുത്താൽ, മോഹൻലാൽ ചിത്രം ആദ്യ വാരാന്ത്യത്തിൽ തന്നെ 100 കോടി ആഗോള ഗ്രോസ് നേടുമെന്ന് വ്യവസായ നിരീക്ഷകർ കരുതുന്നു. ഇത് സംഭവിച്ചാൽ, 100 കോടി ക്ലബ്ബിൽ അതിവേഗം ഇടം നേടുന്ന മലയാള ചിത്രങ്ങളിൽ ദൃശ്യം മൂന്നാം ഭാഗവും സ്ഥാനം പിടിക്കും.

ഇന്ത്യയിലെയും വിദേശത്തെയും പ്രകടനം

ഇന്ത്യയിലെ കളക്ഷൻ മികച്ചതാണെങ്കിലും, വിദേശത്തെ പ്രകടനമാണ് ഏറെ ശ്രദ്ധേയമാവുന്നത്. ഗൾഫ് രാജ്യങ്ങൾ, പ്രത്യേകിച്ച് യുഎഇയും മറ്റ് പശ്ചിമേഷ്യൻ കേന്ദ്രങ്ങളും, ആദ്യ ദിനം നേടിയ 25 കോടി രൂപയുടെ അന്താരാഷ്ട്ര ഗ്രോസ് കളക്ഷന്റെ വലിയൊരു പങ്കുവഹിച്ചു. വടക്കേ അമേരിക്കയിലും യൂറോപ്പിലുമുള്ള സ്ക്രീനിംഗുകളിലും പ്രീമിയർ ഷോകൾക്ക് മികച്ച പ്രതികരണം ലഭിച്ചു.

പുതിയ ഇൻഡസ്ട്രി ഹിറ്റാവുമോ?

ദൃശ്യം 3 പ്രദർശനം തുടരുമ്പോൾ ഏറ്റവും കൂടുതൽ ഉയരുന്ന ചോദ്യങ്ങളിൽ ഒന്ന് ഇത് അടുത്ത ഇൻഡസ്ട്രി ഹിറ്റാവുമോ എന്നാണ്. വാഴ 2 നേടിയ ബോക്‌സ് ഓഫീസ് വിജയത്തെ ദൃശ്യം മറികടക്കുമോ എന്നാണ് കണ്ടറിയേണ്ടത്. അടുത്ത ദിവസങ്ങളിൽ വീക്കെൻഡ് കഴിഞ്ഞാൽ മാത്രമേ ദൃശ്യത്തിന്റെ ഭാവി നിർണയിക്കാൻ കഴിയൂ എന്നാണ് ട്രേഡ് അനലിസ്‌റ്റുകൾ അഭിപ്രായപ്പെടുന്നത്.