ബാഹുബലി മൂന്നാം ഭാഗം വരുന്നു? ചർച്ചയായി പ്രഭാസും അനുഷ്‌കയും റാണയും നൽകിയ സൂചന, ആരാധകർ ആവേശത്തിൽ

ബാഹുബലി മൂന്നാം ഭാഗത്തെ കുറിച്ച് ചർച്ചകൾക്ക് വഴിതുറന്ന് സോഷ്യൽ മീഡിയ. എക്കാലത്തെയും വലിയ ഹിറ്റ് ഫ്രാഞ്ചൈസിയായ ബാഹുബലി ദി ടോർച്ച്ബെയറർ എന്ന നെറ്റ്ഫ്ളിക്‌സ് ഡോക്യൂമെന്ററിയുടെ ഭാഗമായി നൽകിയ അഭിമുഖത്തിൽ പ്രഭാസ്, അനുഷ്‌ക, റാണ എന്നിവരുടെ പ്രതികരണമാണ് മൂന്നാം ഭാഗത്തെ കുറിച്ചുള്ള അഭ്യൂഹങ്ങൾക്ക് തിരി കൊളുത്തിയത്.

നാല് ഭാഗങ്ങളുള്ള ഡോക്യുമെന്ററി ഫ്രാഞ്ചൈസിയുടെ നിർമ്മാണത്തെക്കുറിച്ചുള്ള ഓർമ്മകൾ പുതുക്കുന്നതിലുപരി അതിലെ പ്രധാന അഭിനേതാക്കൾ തമ്മിലുള്ള രസകരമായ സംഭാഷണമാണ് ഇപ്പോൾ ഇന്റർനെറ്റിൽ തരംഗമായിരിക്കുന്നത്. പ്രഭാസ് മൂന്ന് വിരലുകൾ ഉയർത്തി കാണിക്കുന്നതും ബാഹുബലിയുടെ ലെഗസി തുടരുമെന്ന് പറഞ്ഞതുമാണ് വീണ്ടും ചർച്ചകൾക്ക് കാരണമായിരിക്കുന്നത്.

അതേസമയം, ഇന്ത്യൻ സിനിമയുടെ ചരിത്രത്തിൽ വഴിത്തിരിവായ് ചിത്രങ്ങളുടെ പട്ടികയിൽ ആദ്യ സ്ഥാനത്തുള്ളതാണ് ബാഹുബലി ഫ്രാഞ്ചൈസ്. സംവിധായകൻ എസ്എസ് രാജമൗലിയുടെ സ്വപ്‌നമായ ഈ ഫ്രാഞ്ചൈസിയിൽ ഇതുവരെ രണ്ട് മുഴുനീള ഫീച്ചർ സിനിമകൾ ഇറങ്ങിയിട്ടുണ്ട്. ആദ്യം ബാഹുബലി: ദി ബിഗിനിംഗ് (2015), പിന്നീട് രണ്ട് വർഷങ്ങൾക്ക് ശേഷം ബാഹുബലി 2: ദി കൺക്ലൂഷൻ (2017) എന്നീ രണ്ട് ചിത്രങ്ങൾ ഇന്ത്യൻ സിനിമയെ തന്നെ ആഗോളതലത്തിൽ ശ്രദ്ധേയമാക്കി.

അത്യാധുനിക വിഎഫ്എക്‌സ്, ബ്രഹ്മാണ്ഡ സെറ്റുകൾ, ശക്തമായ കഥാപാത്രങ്ങൾ, വ്യത്യസ്‌തമായ കഥപറച്ചിൽ രീതികൾ എന്നിവയുടെ സമന്വയമായിരുന്നു ഈ സിനിമകൾ. തെലുങ്കിൽ നിർമ്മിച്ച ചിത്രങ്ങൾ മലയാളം ഉൾപ്പെടെ തമിഴ്, ഹിന്ദി, കന്നഡ ഭാഷകളിലേക്കും മൊഴിമാറ്റം ചെയ്‌ത്‌ റിലീസ് ചെയ്‌തതോടെ ഇന്ത്യയിലുടനീളം വൻ ജനപ്രീതി നേടി.

2015 ജൂലൈ 10-നാണ് ബാഹുബലി: ദി ബിഗിനിംഗ് തിയേറ്ററുകളിലെത്തിയത്. ഏകദേശം 180 കോടി മുതൽ 200 കോടി വരെയായിരുന്നു ചിത്രത്തിന്റെ നിർമ്മാണച്ചെലവ്. അന്നത്തെ ഏറ്റവും ചെലവേറിയ ഇന്ത്യൻ സിനിമകളിലൊന്നായിരുന്നു ഇത്. റിലീസിന് പിന്നാലെ ചിത്രം ലോകമെമ്പാടുമായി 650 കോടിയിലധികം കളക്ഷൻ നേടി റെക്കോർഡുകൾ സൃഷ്‌ടിച്ചു. ഇന്ത്യൻ സിനിമയുടെ മാർക്കറ്റ് എത്രത്തോളം വലുതാണെന്ന് തെളിഞ്ഞ സംഭവമായിരുന്നു അത്.

ചിത്രത്തിൽ പ്രഭാസ്, റാണ ദഗ്ഗുബാട്ടി, അനുഷ്‌ക ഷെട്ടി, തമന്ന ഭാട്ടിയ, രമ്യ കൃഷ്‌ണൻ, സത്യരാജ്, നാസർ, അദിവി ശേഷ്, പ്രഭാകർ, സുബ്ബരാജു, രോഹിണി, തനികെല്ല ഭരണി, സുദീപ് എന്നിവരാണ് പ്രധാന വേഷങ്ങളിൽ എത്തിയത്. കീരവാണി ആയിരുന്നു സംഗീത സംവിധാനം, കലാസംവിധാനം സാബു സിറിളും കെകെ സെന്തിൽ കുമാർ ഛായാഗ്രഹണവും നിർവഹിച്ചു.

തുടർന്ന് 2017 ഏപ്രിൽ 28-നാണ് ബാഹുബലി 2: ദി കൺക്ലൂഷൻ റിലീസ് ചെയ്‌തത്. ഏകദേശം 250 കോടി മുതൽ 300 കോടി വരെയായിരുന്നു ചിത്രത്തിന്റെ നിർമ്മാണച്ചെലവ്. ലോകമെമ്പാടും ചിത്രം 1,800 കോടിയിലധികം കളക്ഷൻ നേടി, ഇന്ത്യൻ സിനിമയുടെ ചരിത്രത്തിലെ ഏറ്റവും വലിയ വിജയങ്ങളിൽ ഒന്നായി മാറി. ഏതാണ്ട് ഒന്നാം ഭാഗത്തിൽ അഭിനയിച്ചവർ എല്ലാവരും തന്നെ രണ്ടാം ഭാഗത്തിലും ഉണ്ടായിരുന്നു.

വൻ താരനിരകൾ അണിനിരന്ന ചിത്രങ്ങളായ ബാഹുബലി ഒന്നും രണ്ടും പ്രേക്ഷകർ എക്കാലവും ഓർക്കുന്ന വിജയങ്ങളാണ് ദക്ഷിണേന്ത്യൻ സിനിമക്ക് സമ്മാനിച്ചത്. ഇപ്പോഴിതാ ബാഹുബലി മൂന്നാം ഭാഗത്തെ കുറിച്ചുള്ള ചർച്ചകൾ വരുമ്പോൾ പ്രേക്ഷകരും ആകാംക്ഷയിലാണ്. എന്നാൽ എസ്എസ് രാജമൗലിയോ നിർമ്മാതാക്കളോ ഇക്കാര്യത്തിൽ സ്ഥിരീകരണം നടത്തിയിട്ടില്ല.