ഹിംഗിസ്, കൊറേജ ക്വാര്‍ട്ടറില്‍

പാരീസ്: കടുപ്പമേറിയ ഒരു മത്സരത്തില്‍ റൊമാനിയയുടെ റുക്സാണ്ട്രാ ഡ്രാഗോമിറിനെ 6-3, 0-6, 6-1 എന്ന സ്കോറിന് മറികടന്ന് ഒന്നാം സീഡ് മാര്‍ട്ടിനാഹിംഗിസ് ഫ്രഞ്ച് ഓപ്പണ്‍ ടെന്നീസിന്റെ ക്വാര്‍ട്ടര്‍ ഫൈനലില്‍ കടന്നു.

ഡ്രാഗോമിറിനെതിരായ മത്സരത്തില്‍ ആദ്യസെറ്റ് 6-3-ന് എളുപ്പത്തില്‍ ഹിംഗിസ് കൈക്കലാക്കിയെങ്കിലും രണ്ടാം സെറ്റില്‍ ഡ്രാഗോമിര്‍ ശക്തമായ തിരിച്ചുവരവാണ് നടത്തിയത്. ഒരു ഗെയിം പോലും ഹിംഗിസിന് നല്‍കാതെ അവര്‍ 6-0-ത്തിന് സെറ്റ് നേടി. എന്നാല്‍ അവസാനസെറ്റില്‍ പരിചയസമ്പത്ത് ഹിംഗിസിന്റെ രക്ഷക്കെത്തി.

അമേരിക്കയുടെ ചന്ദാ റൂബിനാണ് ക്വാര്‍ട്ടറില്‍ ഹിംഗിസിന്റെ എതിരാളി. നതാഷാ സ്വെരേരയെ 6-4, 6-5 എന്ന സ്കോറിന് നേരിട്ടുള്ള സെറ്റുകള്‍ക്കാണ് റൂബിന്‍ തോല്പിച്ചത്.

പുരുഷവിഭാഗത്തില്‍ 10-ാം സീഡ് അലക്സ് കൊറേജയും 16-ാം സീഡ് ജുവാന്‍ കാര്‍ലോസ് ഫെരേറോയും ക്വാര്‍ട്ടറില്‍ ഏറ്റുമുട്ടും. കൊറേജ സ്വിറ്റ്സര്‍ലണ്ടിന്റെ റോജര്‍ ഫെഡററെ 75-, 7-6, 6-2 എന്ന സ്കോറിന് പരാജയപ്പെടുത്തിയാണ് ക്വാര്‍ട്ടറില്‍ എത്തിയത്.

ഒന്നാം റൗണ്ടില്‍ പീറ്റ് സാംപ്രാസിനെ പരാജയപ്പെടുത്തിയ എത്തിയ മാര്‍ക്ക് ഫീലിപ്പോസിസിനെയാണ് ഫെരേറോ തോല്പിച്ചത്. സ്കോര്‍: 6-2, 6-2, 3-6, 6-3.