ക്രിക്കറ്റ് കോഴ: സി ബി ഐ റിപ്പോര്‍ട്ട് നാളെ പ്രസിദ്ധപ്പെടുത്തും ;കപിലിന്റെ പേരില്ല

ദില്ലി: ക്രിക്കറ്റ് കോഴ വിവാദത്തെക്കുറിച്ചന്വേഷിച്ച സി ബി ഐ റിപ്പോര്‍ട്ടില്‍ മുന്‍ ഇന്ത്യന്‍ ക്യാപ്റ്റനും കോച്ചുമായിരുന്ന കപില്‍ ദേവിന്റെ പേരില്ലെന്ന് കേന്ദ്ര സ്പോര്‍ട്സ് വകുപ്പ് മന്ത്രി സുഖ്ദേവ്സിംഹ് ധിന്‍സ വെളിപ്പെടുത്തി. ഒക്ടോബര്‍ 31 ചൊവാഴ്ചയാണ് മന്ത്രി ധിന്‍സ ഇക്കാര്യം വെളിപ്പെടുത്തിയത്.

എന്നാല്‍ മുന്‍ ക്യാപ്റ്റന്‍ മുഹമ്മദ് അസ്ഹറുദ്ദീന്‍ കോഴ ഇടപാടുകളില്‍ ഏര്‍പ്പെട്ടതായി സി ബി ഐ കണ്ടെത്തിയിട്ടുണ്ടെന്നും ധിന്‍സ വെളിപ്പെടുത്തി.

ഏഴ് വിദേശ കളിക്കാരുടെ പേരുകളും റിപ്പോര്‍ട്ടിലുണ്ട്. മുന്‍ വെസ്റ്റിന്‍ഡീസ് ക്യാപ്റ്റന്‍ ബ്രയാന്‍ ലാറ, മുന്‍ ഇംഗ്ലണ്ട് ക്യാപ്റ്റന്‍ അലക് സ്റ്റ്യുവാര്‍ട്ട് എന്നിവര്‍ ഇക്കൂട്ടത്തില്‍ പെടുന്നു. ഒരു ഘട്ടത്തില്‍ ഇന്ത്യന്‍ ടീമിന്റെ കോച്ച് സ്ഥാനത്തേയ്ക്ക് പരിഗണിച്ചിരുന്ന മുന്‍ ആസ്ത്രേലിയന്‍ താരം ഡീന്‍ ജോണ്‍സിന്റെ പേരും റിപ്പോര്‍ട്ടിലുണ്ട്.

ഒക്ടോബര്‍ 30 തിങ്കളാഴ്ച സി ബി ഐ കൈമാറിയ റിപ്പോര്‍ട്ട് നവംബര്‍ ഒന്ന് ബുധനാഴ്ച ഔദ്യോഗികമായി പ്രസിദ്ധീകരിക്കുമെന്നും മന്ത്രി ധിന്‍സ പറഞ്ഞു. ചൊവാഴ്ച പ്രധാനമന്ത്രി വാജ്പേയി നിര്‍ദ്ദേശിച്ചതനുസരിച്ചാണ് റിപ്പോര്‍ട്ട് ബുധനാഴ്ച പ്രസിദ്ധീകരിക്കുന്നത്.