അഗാസി, കപ്രിയാറ്റി സെമിയില്‍;സെലസ് പുറത്ത്

മെല്‍ബണ്‍: ഇപ്പോഴത്തെ ചാമ്പ്യന്‍ ആന്ദ്രെ അഗാസി ആസ്ത്രേലിയന്‍ ഓപ്പണ്‍ ടെന്നീസിന്റെ പുരുഷവിഭാഗം സെമിഫൈനലില്‍ കടന്നു. എന്നാല്‍ വനിതാവിഭാഗത്തില്‍ നാലാം സീഡ് മോണിക്കാ സെലസ് പുറത്തായി.

മുന്‍ ലോക ഒന്നാം നമ്പര്‍താരവും മൂന്നാം സീഡുമായ പീറ്റ് സാംപ്രാസിനെ തകര്‍ത്തെത്തിയ ടോഡ് മാര്‍ട്ടിനെയാണ് ആന്ദ്രെ അഗാസി ക്വാര്‍ട്ടറില്‍ തോല്പിച്ചത്. 7-5, 6-3, 6-4 എന്ന നേരിട്ടുള്ള സെറ്റുകള്‍ക്കായിരുന്നു വിജയം. ആദ്യസെറ്റില്‍ മാത്രമേ മാര്‍ട്ടിന് അല്പമെങ്കിലും പൊരുതാന്‍ കഴിഞ്ഞുള്ളൂ. രണ്ടും മൂന്നും സെറ്റുകളില്‍ അഗാസി മാര്‍ട്ടിനെ അക്ഷരാര്‍ത്ഥത്തില്‍ വാരിക്കളഞ്ഞു.

12ാം സീഡ് ജെന്നിഫര്‍ കപ്രിയാറ്റിയാണ് മോണിക്കാ സെലസിന്റെ ആസ്ത്രേലിയന്‍ ഓപ്പണ്‍ മോഹങ്ങള്‍ തല്ലിക്കെടുത്തിയത്. ജനവരി 23 ചൊവാഴ്ച നടന്ന ക്വാര്‍ട്ടര്‍ ഫൈനലില്‍ 5-7, 6-4, 6-3 എന്ന സ്കോറിനാണ് കപ്രിയാറ്റി സെലസിനെ മറികടന്നത്. ആദ്യസെറ്റ് നഷ്ടപ്പെട്ട കപ്രിയാറ്റി ശക്തമായ തിരിച്ചുവരവാണ് നടത്തിയത്.