ഡാവന്‍പോര്‍ട്ട്, റാഫ്റ്റര്‍ സെമിയില്‍

മെല്‍ബണ്‍: കാണികളുടെയും മാധ്യമപ്രവര്‍ത്തകരുടെയും ഹരമായ സുന്ദരിക്ക് നിലവിലെ ചാമ്പ്യന്റെ മുന്നില്‍ അടിതെറ്റി. ടെന്നീസിലെ ഫാഷന്‍ സുന്ദരി റഷ്യക്കാരി അന്ന കുര്‍ണിക്കോവ രണ്ടാം സീഡും ഇപ്പോഴത്തെ ചാമ്പ്യനുമായ ലിന്‍ഡ്സെ ഡാവന്‍പോര്‍ട്ടിനോട് തോറ്റ് ആസ്ത്രേലിയന്‍ ഓപ്പണില്‍ നിന്ന് പുറത്ത്.

ജനവരി 23 ചൊവാഴ്ച നടന്ന ക്വാര്‍ട്ടര്‍ ഫൈനല്‍ മത്സരത്തില്‍ അന്ന ഡാവന്‍പോര്‍ട്ടിന് എതിരാളിയേ അല്ലായിരുന്നു. ഒരു മണിക്കൂര്‍ നീണ്ട മത്സരത്തില്‍ 6-4, 6-2 എന്ന സ്കോറിനാണ് ഡാവന്‍പോര്‍ട്ട് അന്നയെ തറപറ്റിച്ചത്. മോണിക്കാ സെലസിനെ തോല്പിച്ച ജെന്നിഫര്‍ കപ്രിയാറ്റിയാണ് ഡാവന്‍പോര്‍ട്ടിന്റെ സെമി എതിരാളി.

പുരുഷവിഭാഗത്തില്‍ നാട്ടുകാരായ കാണികളുടെ പിന്തുണയോടെ കളിച്ച 12ാം സീഡ് പാട്രിക് റാഫ്റ്റര്‍ സെമിയില്‍ കടന്നു. 14ാം സീഡ് ഡൊമിനിക് ഹ്ബാറ്റിയെയാണ് റാഫ്റ്റര്‍ ക്വാര്‍ട്ടറില്‍ തോല്പിച്ചത്. സ്കോര്‍: 6-2, 6-7, 7-5, 6-0.

ആദ്യസെറ്റ് എളുപ്പത്തില്‍ നേടിയ റാഫ്റ്റര്‍ കളി പെട്ടെന്നുതന്നെ ജയിക്കുമെന്ന് തോന്നിയെങ്കിലും രണ്ടാം സെറ്റില്‍ ഹ്ബാറ്റി ശക്തമായി തിരിച്ചുവന്നു. ഇരുവരും സര്‍വീസുകള്‍ നിലനിര്‍ത്തിപോയപ്പോള്‍ രണ്ടാം സെറ്റിന്റെ ഫലമറിയാന്‍ ടൈബ്രേക്കര്‍ വേണ്ടിവന്നു. മൂന്നാം സെറ്റിന്റെ തുടക്കത്തിലും ഹ്ബാറ്റി മികച്ച ഫോമിലായിരുന്നു. എന്നാല്‍ അവസരത്തിനൊത്തുയര്‍ന്ന റാഫ്റ്റര്‍ സെറ്റ് 7-5ന് കൈക്കലാക്കി. അവസാന സെറ്റില്‍ ഹ്ബാറ്റിയ്ക്ക് റാഫ്റ്ററിനെ എതിരിടാനുള്ള മനക്കരുത്ത് ഇല്ലായിരുന്നു. സെമിയില്‍ റാഫ്റ്റര്‍ നിലവിലുള്ള ചാമ്പ്യന്‍ ആന്ദ്രേ അഗാസിയെ നേരിടും.