ഹിംഗിസ്-കപ്രിയാറ്റി ഫൈനല്‍

മെല്‍ബണ്‍: ഈ വര്‍ഷത്തെ ആസ്ത്രേലിയന്‍ ഓപ്പണ്‍ കിരീടത്തിനായി സ്വിറ്റ്സര്‍ലാണ്ടിന്റെ മാര്‍ട്ടിനാ ഹിംഗിസും അമേരിക്കയുടെ ജെന്നിഫര്‍ കപ്രിയാറ്റിയും ഏറ്റുമുട്ടും.

ജനവരി 25 വ്യാഴാഴ്ച നടന്ന സെമിഫൈനലില്‍ അമേരിക്കക്കാരിയായ വീനസ് വില്യംസിനെ 6-1, 6-1ന് തകര്‍ത്ത് ഹിംഗിസ് ഫൈനലിലേക്ക് മുന്നേറിയപ്പോള്‍ കപ്രിയാറ്റി ഇപ്പോഴത്തെ ചാമ്പ്യനായ ലിന്‍ഡ്സെ ഡാവന്‍പോര്‍ട്ടിന്റെ മോഹങ്ങളാണ് അവസാനിപ്പിച്ചത്. സ്കോര്‍: 6-3, 6-4.

മൂന്നു തവണ ആസ്ത്രേലിയന്‍ ഓപ്പണ്‍ നേടിയ ഹിംഗിസിന്റെ മുന്നില്‍ കഴിഞ്ഞ വര്‍ഷത്തെ വിംബിള്‍ഡണ്‍-യുഎസ് ഓപ്പണ്‍ ജേതാവ് വീനസ് വില്യംസ് പതറിപ്പോയി. വെറും 53 മിനിറ്റിലാണ് ഹിംഗിസ് വീനസിനെ കെട്ടുകെട്ടിച്ചത്. വീനസിന്റെ സഹോദരി സെറീനയെ തോല്പിച്ചാണ് ഹിംഗിസ് സെമിയില്‍ കടന്നത്.

നിലവിലെ ചാമ്പ്യനായ ലിന്‍ഡ്സെ ഡാവന്‍പോര്‍ട്ടിനും വ്യാഴാഴ്ച മികച്ച ദിവസമായിരുന്നില്ല. 12ാം സീഡ് ജെന്നിഫര്‍ കപ്രിയാറ്റിയുടെ മുന്നില്‍ ഡാവന്‍പോര്‍ട്ട് വെറും നിഴല്‍ മാത്രമായിരുന്നു. ഒന്നേകാല്‍ മണിക്കൂര്‍ നീണ്ട മത്സരത്തില്‍ 6-3, 6-4 എന്ന സ്കോറിനാണ് കപ്രിയാറ്റി ഡാവന്‍പോര്‍ട്ടിനെ മറികടന്നത്. കപ്രിയാറ്റിയുടെ ആദ്യ ഗ്രാന്റ്സ്ലാം ഫൈനലാണ് ഇത്.